5 Moze 15:1-23
15 ”Ba gangohorita ndröfi si fitu, mifalua wangefa foʼömö.+
2 Simane daʼa lala na miʼefaʼö woʼömö: Niha samamizaʼö kefe khö nawönia, iʼefaʼö zi fahuwu khönia andrö moroi ba woʼömö sinangea ibuʼa. Tebai isugi dalifusönia mazui si fahuwu khönia börö me möi famosumange Yehowa na muʼefaʼö woʼömö.+
3 Tola misugi gefemi ba niha si fatewu,+ hizaʼi miʼefaʼö na so woʼömö dalifusömi khömi.
4 Hewaʼae mifalua daʼö, lö aekhu ami ba waʼanumana. Hasambalö ifahowuʼö ami+ Yehowa Lowalangimi ba danö nibeʼe Yehowa khömi si tobali ondröita.
5 Hizaʼi, miʼoʼö niwaʼö Yehowa Lowalangimi soroi ba dödö ba mifalua fefu goroisa nifaʼemagu khömi maʼökhö.+
6 Ifahowuʼö ami Yehowa Lowalangimi simane si no ifabuʼu khömi. Oya dania soi si möi mamiza khömi,* hizaʼi lö mamiza ami khöra.+ Oya soi nifatörömi, hizaʼi lö lafatörö ami.+
7 ”Na so dalifusömi si numana ba mbanua nibeʼe Yehowa Lowalangimi khömi, böi zi lö mihakhösi tödö ba böi atali ami* khönia.+
8 Yaʼoböwö ami* khönia.+ Fafizaʼö khönia hadia zoguna khönia mazui bönökhi zoʼamböta ia.
9 Böi tumbu ba dödömi zi lö sökhi, mimane wa no ahatö ndröfi si fitu yaʼia daʼö döfi wangefa,+ irege atali ami khö dalifusömi si numana andrö ba lö mibeʼe khönia hadia ia. Na iʼangadugö ami khö Yehowa, ba tobali horömi daʼö.+
10 Yaʼoböwö ami khönia,+ ba böi abua gölömi wameʼe hadia ia. Daʼö mbörö wa ifahowuʼö fefu nifaluami Yehowa Lowalangimi awö zi no miforege.+
11 Lö tebulö so niha si numana ba soimi,+ andrö wa ubeʼe khömi goroisa daʼa, ’Yaʼoböwö ami* khö dalifusömi si tosasa ba si numana ba soimi.’+
12 ”Na so samösa dalifusömi, he ira matua mazui ira alawe Heberaiʼo nifamawa khömi ba no mangai halöwö ia khömi önö fakhe waʼara, lö tola löʼö miʼefasi ia ba ndröfi si fitu.+
13 Na miʼefasi ia, böi mifofanö ia lö noro danga.
14 Yaʼoböwö ami wameʼe khönia urifö, bua nowi, fanikha awö nagu. Mibeʼe khönia simane me ifahowuʼö ami Yehowa Lowalangimi.
15 Mitörö tödömi wa no teʼosawuyu ami mböröta ba danö Miserai, ba no ihöli ami Yehowa Lowalangimi. Daʼö mbörö wa uwaʼö khömi enaʼö mifalua zimane daʼa.
16 ”Hizaʼi, na omasi ia toröi khömi börö waʼomasinia ami hegöi ba nösi nomomi, ba omuso dödönia me toröi ia khömi,+
17 miʼohe ia ba mbawandruhö ba mitögi dalingania, ba tobali ia dania sawuyumi sagötö faʼara. Daʼö göi nifaluami khö zawuyumi ira alawe.
18 Me miʼefasi ia ba mofanö ia iröi ami, böi afökhö khömi ia. Börö me fohalöwönia khömi sagötö zi önö fakhe andrö fagölö ira zi dua kali gazi zi samösa sohalöwö, ba no ifahowuʼö Yehowa Lowalangimi fefu nifaluami.
19 ”Fefu ziaʼa nono zawi si matua, biri-biri si matua, ba nambi si matua, enaʼö mifasambua* daʼö khö Yehowa Lowalangimi.+ Tebai mifohalöwö ziaʼa nono zawi khömi mazui mitaba mbu nono mbiri-biri siaʼa.
20 Ero röfi, miʼa nagole gurifö andrö föna Yehowa Lowalangimi, he yaʼami hegöi ösi nomomi ba nahia si no itatugöi Yehowa.+
21 Hizaʼi, na mofökhö gurifö daʼö, akela-kela, balunö mazui so zoʼamböta tanö böʼö, böi mibeʼe daʼö tobali sumange khö Yehowa Lowalangimi.+
22 Dozi niha, he si raʼiö hegöi si lö raʼiö, laʼa gurifö daʼö ba mbanuami* simane na miʼa nagole nago mazui böhö.+
23 Tebai miʼa ndro.+ Miduwagö tou ba danö ndronia simane idanö.+
Nisura ba gahe zura
^ Mazui ”mamiza khömi ba laʼohe gade”.
^ Sin.: ”böi gokhöi dangau”.
^ Sin.: ”Mibokai dangami”.
^ Sin.: ”Mibokai dangami”.
^ Mazui ”miʼamoniʼö”.
^ Sin.: ”bakha ba mbawa göli khömi”.
