5 Moze 17:1-20
17 ”Böi mibeʼe zawi mazui biri-biri si no mesokho hegöi sakela-kela tobali sumange khö Yehowa Lowalangimi börö me ogoro Yehowa Lowalangimi daʼö.+
2 ”Te so ba zi sambua banua nibeʼe Yehowa Lowalangimi khömi sangila ira matua mazui ira alawe samalua si lö sökhi föna Yehowa Lowalangimi, sanawö buʼusa linia,+
3 si faröi, samosumange ba sangalulu khö lowalangi tanö böʼö mazui ba luo, ba mbaŵa, ba fefu zaradadu zorugo+ hewaʼae no utegu ia.*+
4 Na so zangombakha mazui na mirongo daʼö, mihaogö wamareso samuza. Na sindruhu+ atö no lafalua zi raʼiö andrö ba danö Gizaraʼeli,
5 miʼohe ndra matua mazui ira alawe samalua si lö sökhi andrö ba mbawa göli mbanua, ba mitebu ia faoma kara irege mate.+
6 Awena tola mibunu ia na so darua mazui datölu zamaduhuʼö.+ Tebai mibunu ia na ha samösa zamaduhuʼö.+
7 Ira samaduhuʼö andrö zi oföna manebu yaʼia faoma kara ba wamunu yaʼia, awena laʼoʼö sato ba latebu ia faoma kara. Miheta fefu zi lö sökhi moroi ba gotaluami.+
8 ”Na so gabula dödö ba mbanuami sabua ba wangai angetula, duma-dumania fabunusa,+ amadöniwa huku, fabagosa hegöi fatötöisa tanö böʼö, miʼaeʼe ba nahia si no itatugöi Yehowa Lowalangimi.+
9 Mifalukhaisi ndra ere Lewi hegöi sanguhuku+ sangai halöwö ba ginötö daʼö, ba miʼandrö khöra wanuturu lala. Yaʼira zameʼe khömi angetula ba gabula dödö salua khömi andrö.+
10 Ba mifalua moloʼö si no laʼetuʼö ba nahia si no itatugöi Yehowa. Böi zi lö mifalua fefu wanuturu lala si no labeʼe khömi.
11 Mifalua moloʼö fanuturu lala ba angetula si no labeʼe khömi.+ Böi miholeʼö ami moroi ba gangetula si no labeʼe khömi, he ba gambölö hegöi ba gabera.+
12 Na so zasiliyawa si lö mamondrongo angetula zanguhuku mazui ere sangai halöwö khö Yehowa Lowalangimi, hasambalö mate niha daʼö.+ Miheta fefu zi lö sökhi ba danö Gizaraʼeli.+
13 Aefa daʼö, larongo dania daʼö fefu iraono Gizaraʼeli ba ataʼu ira, irege lö fayawa ira saʼae.+
14 ”Na mirugi danö nibeʼe Yehowa Lowalangimi khömi, mirabu ba toröi ami ba daʼö ba mimane, ’Miʼaine, datafataro khöda razo simane soi ba zi fasuida,’+
15 mifataro razo nifili Yehowa Lowalangimi.+ Razo nifataromi mihalö ba gotalua ndraono Gizaraʼeli. Tebai mifataro niha si fatewu si tenga talifusömi.
16 Hizaʼi, razo daʼö tebai iʼoyaʼö kudonia+ mazui ifatenge niha ba danö Miserai enaʼö monönö waʼoya kudonia+ börö me no irai iwaʼö Yehowa, ’Böi irai mifuli ami ba danö Miserai.’
17 Tebai göi ato woʼomonia faböi fandröndröu ia khögu.+ Tebai göi iʼoyaʼö ganaʼania awö wirö.+
18 Na no tobali ia razo, isali khönia goroisa daʼa ba zi sambua buku,* yaʼia daʼö Oroisa niʼiröʼö ndra ere Lewi.+
19 ”Böi aefa-aefa khönia mbuku daʼö ba ibaso sandrohu faʼaurinia,+ enaʼö ifomaha ia wangataʼufi Yehowa Lowalanginia, iʼoʼö Goroisa daʼa, ba ifalua fefu gamakhoita andre.+
20 Na ifalua daʼö, lö iwaʼö tödönia wa abölö sökhi ia moroi ba ndraono Gizaraʼeli tanö böʼö ba lö iholeʼö ia wamalua oroisa andrö, he ba gambölö mazui ba gabera, irege tobali ia razo ba Gizaraʼeli sagötö faʼara, simanö göi nononia matua.
