5 Moze 19:1-21
19 ”Ba ginötö ihori Yehowa Lowalangimi soi nibeʼe Yehowa Lowalangimi khömi, ba no mifofanö ira ba yaʼami zi toröi ba mbanuara hegöi ba nomora,+
2 mifili tölu ngawua mbanua ba danö nibeʼe Yehowa Lowalangimi khömi.+
3 Mibagi tölu danö andrö nibeʼe Yehowa Lowalangimi khömi. Mifazökhi lala ba mbanua andrö enaʼö tola moloi ba daʼö niha samunu awönia.
4 ”Daʼa nifalua niha samunu awönia soloi ba daʼö faböi mate ia, me lö iʼodödögö wamunu awönia ba tenga börö waʼafatuwunia ba niha daʼö.+
5 Duma-dumania, fao ira ba gatua wangozaragö eu. Me iʼobö geu niha daʼö, adeha ndranga watonia ba göna khö nawönia irege mate. Börö daʼö, moloi ia ba mbanua folumöʼö faböi mate ia.+
6 Hizaʼi, na talafo fandröndröu mbanua folumöʼö andrö, tola lakhamö ia niha solau balö+ börö wönura* ba labunu ia, hewaʼae sindruhunia tenga sinangea mate niha daʼö börö me lö si fatuwu ia khö nawönia andrö ba zilalö.+
7 Daʼö mbörö wa uwaʼö khömi enaʼö mifili tölu ngawua mbanua folumöʼö.
8 ”Na iʼeboloʼö danömi Yehowa Lowalangimi simane si no möi ia ba hölu khö ndra tuami,+ ba no ibeʼe khömi fefu danö nifabuʼunia khö ndra tuami,+
9 ba mifuli zui minönö tölu banua tö.+ (Ifalua fefu daʼö na sindruhu-ndruhu moroi ba dödömi miʼoʼö goroisania nifaʼemagu khömi maʼökhö, yaʼia daʼö miʼomasiʼö Yehowa Lowalangimi ba mitörö lalania.)+
10 Börö daʼö, lö labunu* niha si lö fasala+ ba danö nibeʼe Yehowa Lowalangimi khömi tobali ondröita, ba lö moʼömö do ami.+
11 ”Hizaʼi, na so niha si fatuwu khö nawönia+ ba no itarogö irege ifesokho ba mate, moloi ia ba ifili sambua mbanua si no mutatugöi ba daʼö,
12 ba lafahalöʼö ia ba daʼö ira satua mbanua, labeʼe ia ba danga niha sedöna molau balö, ba hasambalö labunu ia.+
13 Böi mihakhösi tödö ia. Miheta ba danö Gizaraʼeli niha samunu awönia si lö sala+ enaʼö ohahau dödömi.
14 ”Na mitema danö ondröita nibeʼe Yehowa Lowalangimi khömi, böi mifawuʼa nola danö nawömi+ moroi ba nahia si no latatugöi ira tuami.
15 ”Na no fasala zi samösa niha mazui no ifalua horö, tebai laʼetuʼö hukumania na ha samösa zamaduhuʼö.+ Awena aro zi sambua angombakhata na so darua mazui datölu zamaduhuʼö.+
16 Na ibeʼe wamaduhuʼö si samösa niha ha ba wamaʼala awönia hegöi ba wamöbögö si lö duhu,+
17 moguna muʼohe niha si darua andrö föna Yehowa, föna ndra ere hegöi sanguhuku sohalöwö ba ginötö daʼö.+
18 Lahaogö lafareso gamadöniwara andrö ira sanguhuku.+ Na laʼila atö wa si falimo niha sameʼe famaduhuʼö andrö ba no iböbögö zi lö duhu khö dalifusönia,
19 mifatörö khönia hukuma simane si no iʼera-era khö dalifusönia ba wamobörö.+ Miheta zi lö sökhi ba gotaluami.+
20 Larongo dania zalua andre niha tanö böʼö ba ataʼu ira, ba lö lafalua saʼae zi lö sökhi simane daʼö.+
21 Böi mihakhösi tödö ia.+ Noso wangali noso, hörö wangali hörö, ifö wangali nifö, tanga wangali danga, ahe wangali gahe.+
