5 Moze 20:1-20
20 ”Na fasuwö ami ba wolawa udu ba miʼila wa abölö oya kudora hegöi kureta wasuwöta ba abölö ato zaradadura, böi miʼataʼufi ira börö me Yehowa Lowalangimi zi fao khömi sangeheta yaʼami moroi ba danö Miserai.+
2 Fatua lö möi ami fasuwö, tohare gere ba fahuhuo ia khömi.+
3 Daʼa wehedenia: ’Mifondrondrongo yaʼami iraono Gizaraʼeli. Ba zi lö ara tö, fasuwö ami wolawa udu. Böi taya waʼabaranimi. Böi miʼataʼufi mazui manizi ami. Böi tokea ami börö ira,
4 börö me Yehowa Lowalangimi zi fao khömi. Yaʼia zi fasuwö salahimi ba wolawa udumi ba iʼefaʼö ami.’+
5 ”Ba lamane göi ira sondröniaʼö, ’Hadia so zamazökhi omo si bohou ba lö muʼowasaini? Akha mangawuli ia ba nomonia, na mate dania ia ba wasuwöta ba lua-luania niha böʼö zangowasaini omonia.
6 Hadia so zawena mananö tanömö nagu ba kabunia, hizaʼi lö nasa nitemania bua? Akha mangawuli ia ba nomonia, na mate dania ia ba wasuwöta ba lua-luania niha böʼö zaneteu bua nagunia.
7 Hadia so zi no famatua khö zi samösa ira alawe, hizaʼi lö nasa sangowalu ira? Akha mangawuli ia ba nomonia,+ na mate dania ia ba wasuwöta ba lua-luania niha böʼö zangai matuania andrö.’
8 Ba manofu göi ndra sondröniaʼö, ’Hadia so zataʼu ba ibörögö taya waʼabaraninia?+ Akha mangawuli ia ba nomonia, enaʼö lö idönisi ndra talifusönia irege ataʼu ira göi simane yaʼia.’*+
9 Na no awai fahuhuo ira khömi, lafataro niha si tobali kumandru ndra saradadu.
10 ”Na mifahatö ami ba zi sambua banua ba wanuwö yaʼira, moguna mifatunö khöra hadia lala nitörö enaʼö atulö ira khömi.+
11 Na fatema ba dödö niha mbanua daʼö ba omasi ira mangatulö khömi irege labokai mbawa göli, tobali sawuyumi fefu niha si so ba daʼö ba mangai halöwö ira khömi.+
12 Hizaʼi na lö omasi niha mbanua daʼö atulö ira khömi ba lasuwö göi ami, mifaʼuʼu mbanua daʼö.
13 Hasambalö ibeʼe ira Yehowa Lowalangimi ba dangami, ba mibunu fefu ndra matua ba daʼö faoma föda.
14 Tola mirabu fefu gama-gamara sebua böli, ira alawe, iraono, urifö ba fefu zi so ba mbanua daʼö.+ Miʼa dania zi no mirabu ba nudumi, nibeʼe Yehowa Lowalangimi khömi.+
15 ”Daʼö zinangea mifalua ba mbanua si fandröndröu moroi khömi, si tenga banua sahatö ba daʼa.
16 Hizaʼi, ba mbanua si farahu ba soi daʼa, nibeʼe Yehowa Lowalangimi khömi tobali ondröita tebai mitehegö na so zauri zamösa.*+
17 Mihori fefu, yaʼia daʼö niha Kheti, niha Gamori, niha Ganaʼana, niha Weresi, niha Hewi ba niha Yebusi,+ simane niwaʼö Yehowa Lowalangimi khömi.
18 Na mifalua daʼö, tebai lafahaʼö ami ba wamalua ngawalö zi raʼiö simane nifaluara ba wamosumange lowalangira, irege mifalua horö föna Yehowa Lowalangimi.+
19 ”Na no mifaʼuʼu zi sambua banua ba worabu banua daʼö, ba me no misuwö ira ba zi hauga hari, böi miʼobö döla geu ba daʼö. Tola miʼa mbuania hizaʼi tebai miʼobö.+ Tenga niha döla geu, andrö böi misuwö ia.
20 Eu si tola muʼobö yaʼia daʼö eu si lö mowua. Tola miʼobö ia ba mifazökhi göli-köli ba wamaʼuʼu banua si fasuwö khömi irege no mikalaisi ira.
Nisura ba gahe zura
^ Sin.: ”enaʼö lö ombuyu dödö ndra talifusönia ibeʼe simane tödönia”.
^ Mazui ”na auri gofu hadia zonoso”.
