5 Moze 21:1-23
21 ”Na miʼila ba danö nibeʼe Yehowa Lowalangimi khömi so samösa zi no mate ba lö miʼila haniha zamunu yaʼia,
2 möi ndra satua mbanua awö zanguhuku+ ba wanuʼa hawaʼaröu gotalua naha mboto niha si no mate andrö ba mbanua si so ba zi fasuinia.
3 Ira satua mbanua sabölö ahatö gamaudu mboto zi mate andrö lahalö sageu zawi sawuyu-wuyu si lö irai lafohalöwö ba si lö irai lafonoro.*
4 Aefa daʼö, laʼohe zawi sawuyu-wuyu andrö ira satua mbanua ba ndraso si so idanö si lö irai muhalö mazui mutanö sinanö. Ba daʼö lafatö mbagi zawi andrö.+
5 ”Lafahatö ira ba daʼö ere Lewi börö me yaʼira nifili Yehowa Lowalangimi ba wangai halöwönia,+ ba wamahowuʼö ba döi Yehowa.+ Laʼombakhaʼö hewisa lala ba wangatulöʼö na so waʼudusa.+
6 Ba fefu zatua mbanua sabölö ahatö gamaudu lasöndra mboto zi mate andrö, lasasai dangara+ yawa zawi nifatö bagi ba ndraso daʼö.
7 Ba daʼa wehedera: ’Tenga tangama zamunu* niha daʼa, ba lö niʼilama me labunu ia.
8 He Yehowa, böi beʼe ba hulu nono mbanuau Izaraʼeli si no öhöli zalua andre.+ Böi tehegö latahigö nono mbanuau ba ndro niha si lö sala andre.’+ Tenga khöra tesugi ndro niha daʼö.
9 Na miʼoʼö daʼö, lö tebeʼe ba hulumi ndro niha si lö sala andrö börö me no mifalua zatulö föna Yehowa.
10 ”Na fasuwö ami ba wolawa udu, ba kala ira ibeʼe Yehowa Lowalangimi ba miʼoloiʼö ira,+
11 ba miʼila samösa nono alawe si baga-baga ba gotalua niha niʼoloiʼömi andrö, ba adöni dödömi irege omasi ami na tobali ia foʼomomi,
12 tola miʼohe ia ba nomomi. Itöwö högönia ira alawe daʼö, ihaogö zaʼania,
13 iheta mbaru nifakenia me teʼoloiʼö ia ba toröi ia ba nomomi. Iʼeʼesi namania awö ninania sara waŵa waʼara.+ Aefa daʼö, tola orudu ami khönia. Tobali ami foʼomonia ba tobali ia göi foʼomomi.
14 Hizaʼi, na lö saʼae omasi ami khönia, mitehegö khönia wofanö+ gofu hezo ilau ia. Tebai mifamawa ia mazui mifalua khönia zi lö sökhi, börö me no miʼailasi ia.
15 ”Na so samösa ndra matua si dombua donga, ba abölö iʼomasiʼö zi samösa moroi ba danö böʼö,* ba faoma moʼono ira darua manö ono matua, ba siaʼa nononia tumbu moroi khö ndra alawe si lö iʼomasiʼö,+
16 ba na ibagi dania gondröita khö ndraononia matua, tebai ibaliʼö ononia siaʼa nono si tumbu moroi khö ndra alawe niʼomasiʼönia, irege ide-ide dana khö nono siaʼa si tumbu moroi khö ndra alawe si lö iʼomasiʼö andrö.
17 Moguna ifaduhuʼö wa ononia siaʼa nono si tumbu andrö moroi khö ndra alawe si lö iʼomasiʼö ba ibeʼe dua winaeta moroi ba gokhötania khö nono daʼö, börö me daʼö nononia siaʼa.* Khönia tebeʼe zinema nono siaʼa.+
18 ”Na so niha si so ono matua sabeʼe högö, somasi mamadaö, ba lö irongo li namania awö ninania,+ ba no laforege wanegu yaʼia hizaʼi lö irongo,+
19 laʼohe nono daʼö ira satuania ba mbawa göli khö ndra satua mbanua,
20 ba lamane khö ndra satua mbanua andrö, ’Abeʼe sibai högö nonoma andre, omasi ia mamadaö, ba lö irongo wehedema. Oluʼa-luʼa sibai ia+ ba mabu-mabu.’+
21 Ba fefu niha ba mbanua daʼö latebu ia faoma kara irege mate. Simane daʼö lala nitörö enaʼö aheta zi lö sökhi ba gotaluami irege larongo fefu iraono Gizaraʼeli ba ataʼu ira.+
22 ”Na so zamalua horö irege göna khönia hukuma faʼamate, ba no labunu ia,+ aefa daʼö latawi ba döla geu,+
23 böi mifowongi ba döla geu mboto zi mate andrö.+ Hizaʼi, mihonogöi wa lakoʼo ia ba zi maʼökhö daʼö börö me si göna fangelifi Lowalangi niha nitawigö ba döla geu.+ Tebai mitaʼunöisi danö nibeʼe Yehowa Lowalangimi khömi si tobali ondröita.+
Nisura ba gahe zura
^ Mazui ”si lö irai mufasa kalo mbagi”.
^ Sin.: ”zanuwagö do”.
^ Sin.: ”iʼomasiʼö zi samösa ba fatuwu ia khö zi samösa”.
^ Mazui ”daʼö mböröta waʼabölönia”.
