5 Moze 22:1-30
22 ”Na miʼila no elungu zawi mazui biri-biri dalifusömi, böi mifaigi-faigi manö.+ Mifasao gurifö daʼö khö dalifusömi.
2 Hizaʼi na fandröndröu nomo dalifusömi andrö mazui lö miʼila haʼökhö, miʼohe gurifö daʼö ba nomomi. Akha so manö gurifö daʼö ba nomomi irege tohare zokhö yaʼia wangalui, awena dania mibeʼe khönia.+
3 Daʼö nifaluami na misöndra galide, mazui baru ba gofu hadia ia zi taya khö dalifusömi. Tebai miʼosiwawöi daʼö.
4 ”Na miʼila no alabu ba lala galide mazui sawi dalifusömi, böi mifaigi-faigi manö. Mitolo dalifusömi andrö ba wamazawa urifö daʼö.+
5 ”Tebai ifake mbaru ndra matua ira alawe, simanö göi ndra matua tebai ifake mbaru ndra alawe. Ogoro Yehowa Lowalangimi niha samalua daʼö.
6 ”Na mitörö lala ba tefaudu miʼila gazuni wofo si so ono mazui adulo, he ba hogu geu hegöi ba danö, ba na mamaukhu mazui so nononia ba zingania, böi mihalö ninania fabaya ono.+
7 Mifoloi ninania ba tola mihalö nono, enaʼö ohahau dödömi ba anau nosomi.
8 ”Na molau omo ami, mifazökhi mbaʼa-baʼa ba zi fasui sagö+ faböi so zaekhu si tou irege moʼömö do ami awö nösi nomomi.
9 ”Böi mifodombua balö wananö sinanö ba kabu nagu khömi.+ Na mifalua daʼö, fefu mbua zinanö ba kabu nagu khömi hegöi bua zinanö tanö böʼö tobali okhöta naha niʼamoniʼö.
10 ”Böi miʼendrongagö zawi faoma kalide ba wamaku tanö.+
11 ”Böi fake mbaru nifazökhi moroi ba mbu mbiri-biri si no mufaruka ba nukha si sökhi.+
12 ”Mifazökhi huru-huru ba gahe mbarumi.+
13 ”Na mangowalu ndra matua khö zi samösa ira alawe ba forudu ira, ba lö ara fatuwu ia khö* ndra alawe daʼö,
14 ba ifobahulu wa no ifalua zi lö sökhi si möi fangobousi döinia. Imane, ’No uhalö ndra alawe daʼa, hizaʼi me orudu ndraʼo khönia ba lö hadöi tandra-tandra wa ono alawe ia,’
15 ba möi zatua nono alawe daʼö khö ndra sondröniaʼö ba mbawa göli mbanua ba wangoromaʼö tandra wa sindruhu ono alawe nonora andrö.
16 Imane ama nono alawe daʼö khö ndra satua mbanua, ’No ubeʼe nihalö nonogu alawe khö ndra matua daʼa, hizaʼi fatuwu ia khö* nonogu
17 ba ifobahulu wa no ifalua gamuata si lö sökhi. Iwaʼö wa tenga ono alawe nonogu. Yaʼe dandra wa ono alawe ia.’ Ba labologö nukha si tobali tandra andrö föna ndra satua mbanua.
18 Ba laʼohe ndra matua daʼö ira satua mbanua+ ba wanguhuku yaʼia.+
19 Börö me no iʼobousi samösa nono alawe Gizaraʼeli,+ andrö wa lahuku ia 1,1 kilogram* firö ba labeʼe khö nama nono alawe daʼö. Lö tebulö tobali foʼomonia ndra alawe andrö, ba tebai ifabali moloʼö huku sandrohu faʼaurinia.
20 ”Hizaʼi na sindruhu wamobahulunia ba lö hadöi tandra wa ono alawe nono daʼö,
21 laʼohe ia ba mbawandruhö nomo namania. Ba latebu ia niha sato faoma kara irege mate börö me no iʼasogö wangaila+ ba danö Gizaraʼeli me mohorö ia* ba nomo namania.+ Simane daʼö wangehetami si lö sökhi ba gotaluami.+
22 ”Na so ndra matua sorudu khö ndra alawe si tenga foʼomonia, ba si mate ira maʼadarua, he ira alawe hegöi ira matua.+ Simane daʼö wangehetami si lö sökhi ba Gizaraʼeli.
23 ”Na no famatua zi samösa ono alawe, ba falukha khönia ndra matua ba mbanua sebua ba ihoröni nono alawe daʼö,
24 miʼohe ira ba mbawa göli mbanua ba mitebu faoma kara irege mate. Andrö wa tehuku ndra alawe daʼö börö me lö muʼao ia, ba lahuku göi ndra matua daʼö börö me iʼailasi matua* nawönia.+ Simane daʼö wangehetami si lö sökhi ba gotaluami.
25 ”Hizaʼi, na ba zi lö mudöna-döna falukha ndra matua daʼö khö ndra alawe si no famatua andrö ba mbenua, ba iʼogunaʼö waʼabölönia ira matua daʼö irege ihoröni, hasambalö si mate ndra matua daʼö.
26 Böi mifalua hadia ia khö ndra alawe daʼö börö me lö nifaluania horö si möi börö waʼamate. Simane daʼö göi mifalua na so zamakao ba samunu awönia.+
27 Falukha ira ndra matua daʼö ba mbenua ba zi lö mudöna-döna, ba no muʼao ndra alawe andrö ba wangandrö tolo, hizaʼi lö samondrongo.
28 ”Na falukha zi samösa ira matua khö nono alawe si lö nasa mufamatua, ba ifaso wohoröni, ba no laʼila niha sato,+
29 ibeʼe ira matua daʼö 570 gram* firö khö nama nono alawe andrö, ba hasambalö ihalö saʼae foʼomonia.+ Tebai ifabali sandrohu faʼaurinia börö me no iʼailasi nono alawe daʼö.
30 ”Tebai so zohoröni foʼomo namania enaʼö lö iʼailasi* namania.+
Nisura ba gahe zura
^ Mazui ”itimbagö”.
^ Mazui ”itimbagö”.
^ Mazui ”me tobali ia ira alawe sohorö-horö”.
^ Sin.: ”woʼomo”.
^ Sin.: ”lö isahoi gahe mbaru”.
