5 Moze 23:1-25
23 ”Tebai tobali ono mbanua Yehowa ndra matua na no lafufu mazui lataba wamatuania.+
2 ”Tebai tobali ono mbanua Yehowa nono horö.+ Tebai tobali ono mbanua Yehowa ngaʼötönia fazamösa.
3 ”Tebai tobali ono mbanua Yehowa niha Gamoni mazui niha Moabi.+ Tebai tobali ono mbanua Yehowa ngaʼötönia fazamösa,
4 börö me lö labeʼe mbalazomi hegöi idanö me so ami ba lala me mangawuli ami moroi ba danö Miserai.+ Lagazi nasa Mbileamo ono Mbeori moroi ba Wetori ba Mezofotamia ba wangelifi yaʼami.+
5 Hizaʼi, lö ifondrondrongo Yehowa Lowalangimi niwaʼö Mbileamo.+ Ibaliʼö howu-howu khömi wangelifi Mbileamo Yehowa Lowalangimi,+ börö me iʼomasiʼö ami Yehowa Lowalangimi.+
6 Böi mitolo ira ba wanöndra faʼohahau dödö sandrohu faʼaurimi.+
7 ”Böi fatuwu ami ba niha Gedomo börö me talifusömi ira.+
”Böi fatuwu ami ba niha Miserai börö me no irai fatewu ami ba soira.+
8 Tola tobali ono mbanua Yehowa ngaʼötöra si medölu.
9 ”Na fasuwö ami wolawa udu, mifaigi faböi raʼiö ami.+
10 Na so ndra matua si raʼiö börö me kalua nidanö mani khönia ba zi bongi,+ möi ia baero nose ba tebai ifuli ia bakha.
11 Na no arakhagö bongi ba mondri ia. Awena tola möi ia bakha ba nose na no aekhu luo.+
12 Mifazökhi naha waniboʼö idanö sebua baero nose. Ba daʼö miʼaeʼe na mitiboʼö zi taʼunömi.
13 Mihenaigö khömi dambila side-ide. Na möi ami ba waniboʼö idanö sebua, mikhao danö faoma tambila andrö, awena mibalugö zi taʼunömi.
14 Fao khömi Yehowa Lowalangimi ba wangorifi yaʼami+ ba ibeʼe ba dangami zi faʼudu khömi. Börö daʼö, miʼamoniʼö nosemi+ faböi iʼila zi raʼiö ba gotaluami ba lua-luania iʼerogö ami.
15 ”Na so zawuyu soloi moroi khö zokhö yaʼia ba iʼondrasi ami, böi mifuli ia khö zokhö yaʼia.
16 Tola toröi ia ba mbanuami gofu hezo zomasi ia ifili. Böi mifakao ia.+
17 ”Tebai tobali sohorö-horö nono alawe Gizaraʼeli ba gosali.+ Simanö göi ndraono matua Gizaraʼeli, tebai tobali sohorö-horö ba gosali.+
18 Böi miʼohe ba nomo Yehowa Lowalangimi gefe böli gölö* ndra matua* mazui ira alawe sohorö-horö ba wamuʼa buʼusa li, börö me niʼogorofi Yehowa Lowalangimi zi dombua balö andrö.
19 ”Na mifafizaʼö khö dalifusömi gefe,+ simanö göi niʼa mazui hadia manö zi tola mufobunga, böi miʼandrö khönia wamuʼa ono.
20 Tola miʼandrö nono gefemi ba niha baero,+ hizaʼi böi miʼandrö khö dalifusömi,+ enaʼö ifahowuʼö fefu nifaluami Yehowa Lowalangimi ba danö niʼokhögömi.+
21 ”Na fawuʼu li ami khö Yehowa Lowalangimi,+ böi mitaha-taha wamalua+ börö me hasambalö isugi khömi dania Yehowa Lowalangimi. Na löʼö, eluahania no mifalua horö.+
22 Ba na lö si fawuʼu li ami, eluahania lö nifaluami horö.+
23 Böi mifawuʼa zi no miwaʼö.+ Mifalua mbuʼusa limi tobali sumange si no aoha gölö khö Yehowa Lowalangimi.+
24 ”Na möi ami ba kabu nagu nawömi, tola miʼa mbuania irege abuso ami, hizaʼi böi mibeʼe bakha ba mbola-bola.+
25 ”Na möi ami ba nowi nawömi si lö mubasi bua nasa, tola mihalö mbua sasoso, hizaʼi böi mitaba ndrahania.+
