5 Moze 25:1-19
25 ”Na faʼudu zi darua niha, tola möi ira föna zanguhuku.+ Ira sanguhuku zangatulöʼö yaʼira ba lafaduhuʼö haniha zamalua satulö ba haniha zi fasala.+
2 Sinangea na labözi niha si fasala,+ lawaʼö khönia ira sanguhuku enaʼö ifalögu ia tou ba danö ba laböbözi ia föna ndra sanguhuku. Faʼoya mbözi-bözi nitemania enaʼö fagölö ba waʼalösökhinia,
3 hizaʼi tebai töra 40 kali.+ Na labözi ia töra moroi ba daʼö, ba no teʼailasi fönami dalifusömi.
4 ”Böi böbö mbawa zawi samöbörö gandru.+
5 ”Na so darua zi fatalifusö sorudu ba zi sambua omo, ba fazamösa mate ba gotaluara lö ono, tebai möi nihalö woʼomonia ba niha böʼö na tenga ösi nomo daʼö. Iʼondrasi ia lakhania, ihalö ba ibuʼa woʼömönia börö me lakhania daʼö.+
6 Ono siaʼa si tumbu khönia, daʼö zanohugö töi woʼomonia si no mate andrö+ enaʼö lö taya döi woʼomonia ba ndraono Gizaraʼeli.+
7 ”Hizaʼi na lö omasi ihalö ia lakhania andrö, möi ia föna mbawa göli mbanua, iʼondrasi ndra satua mbanua ba imane, ’Lö omasi lakhagu itohugö döi dalifusönia ba ndraono Gizaraʼeli. Lö ibuʼa woʼömönia hewaʼae na lakhagu ia.’
8 Lakaoni ndra matua daʼö ira satua mbanua ba fahuhuo ira khönia. Hizaʼi, na iwaʼö wa lö omasi ia ihalö ndra alawe daʼö,
9 iʼondrasi ia ira alawe daʼö föna ndra satua mbanua, iheta zandrala ndra matua daʼö,+ idiloi mbawa ba imane, ’Daʼa nifalua ba niha si lö omasi manohugö ngaʼötö dalifusönia.’
10 Aefa daʼö, töi nösi nomo ndra matua daʼö* ba Gizaraʼeli tobali ’Ösi nomo niha niheta sandrala’.
11 ”Na so ndra matua si faʼudu ba möi fazamösa woʼomora ba wamaböli foʼomonia, ba iraʼu wamatua ndra matua daʼö,
12 hasambalö nitaba danga ndra alawe daʼö. Böi mihakhösi tödö ia.
13 ”Tebai so dombua gara fanuʼa+ ba mbola-bola khömi, sebua ba side-ide.
14 Tebai mifodombua dumba fanuʼa*+ ba nomomi, sebua ba side-ide.
15 Enaʼö atulö waliʼera mazui tumba fanuʼa niʼogunaʼömi ba böi miʼambösi, enaʼö anau nosomi ba danö nibeʼe Yehowa Lowalangimi khömi.+
16 Ogoro Yehowa Lowalangimi ba niha si lö manörö sindruhu samalua simane daʼö.+
17 ”Mitörö tödömi nifalua niha Gamaleki me mangawuli ami moroi ba danö Miserai,+
18 me laʼondrasi ami ba lasuwö fefu zi tebai mofanö moroi furimi, me marase ba atage ami. Lö ataʼu ira khö Lowalangi.
19 Na ibeʼe khömi waʼahono dödö Yehowa Lowalangimi ba ginötö itimba fefu zi faʼudu khömi ba danö nibeʼe Yehowa Lowalangi khömi tobali ondröita,+ mihori fefu niha Gamaleki enaʼö lö saʼae itörö tödö niha böʼö ira. Böi olifu ami.+
