5 Moze 26:1-19
26 ”Na no mirugi danö nibeʼe Yehowa Lowalangimi khömi tobali ondröita, ba no mirabu irege toröi ami ba daʼö,
2 mihalö ziaʼa mbua nowi nibasimi ba danö nibeʼe Yehowa Lowalangimi khömi. Mibeʼe daʼö ba raga-raga ba miʼaeʼe ba nahia si no itatugöi Yehowa Lowalangimi ba wamolakhömi töinia.+
3 Miʼaeʼe khö gere sangai halöwö ba ginötö daʼö ba mimane, ’Maʼökhö andre möido ufatunö khö Yehowa Lowalangida wa no möido ba danö nifabuʼu Yehowa khöda si no möi ia ba hölu khö ndra tuada.’+
4 ”Ihalö dania ere raga-raga niʼohemi ba ibeʼe föna naha wanunu sumange khö Yehowa Lowalangimi.
5 Daʼa wehedemi föna Yehowa Lowalangimi: ’Niha Garamo duagu,+ sanörö-nöröi tanö.* Mofanö ia ba danö Miserai+ ba toröi ia ba daʼö tobali niha si fatewu fao nösi nomonia si lö atoto.+ Hizaʼi tobali ia soi sebua ba sabölö.+
6 Ba lafakao ndraʼaga ira niha Miserai si lö faʼahakhö dödö, lafaso ndraʼaga tobali sawuyu.+
7 Börö daʼö, maʼandrö khöu wanolo yaʼugö Yehowa Lowalangi ndra tuama ba fondrondrongo wangandröma. Anehe Yehowa gabula dödö, faʼatosasa hegöi famakao nitaögöma.+
8 Ba gafuriata, öheta ndraʼaga Yehowa ba danö Miserai faoma tangamö sabölö+ hegöi taʼiomö sebua kuaso,* öfalua dandra sahöli-höli dödö ba sataʼu niha.+
9 Ba öʼohe ndraʼaga ba daʼa, ba danö si fahöna susu ba wewani.+
10 Möido uʼohe iadaʼa khö Yehowa ziaʼa mbua nowi nibeʼenia khögu.’+
”Mitouʼö föna Yehowa Lowalangimi ba miʼangalulu föna Yehowa Lowalangimi.
11 Miʼomusoiʼö dödömi ba ngawalö zi sökhi nibeʼe Yehowa Lowalangimi khömi hegöi ba nösi nomomi, simanö göi niha Lewi awö niha si fatewu si so ba gotaluami.+
12 ”Na no awai miʼozaragö zi sambua niʼofulu+ mbua nowimi ba ndröfi si medölu, yaʼia daʼö döfi ba wameʼe si sambua niʼofulu, mibeʼe daʼö ba niha Lewi, ba niha si fatewu, si lö ama* hegöi lakha mbanua. Ba laʼa dania nibeʼemi andrö irege abuso ira ba mbanuami.*+
13 Daʼa wehedemi föna Yehowa Lowalangimi: ’No ufawuʼa ngawalö niʼamoniʼö andrö moroi ba nomogu ba ubeʼe ba niha Lewi, niha si fatewu, si lö ama hegöi lakha mbanua,+ simane niwaʼöu. Lö nisawögu mazui uʼosiwawöi goroisamö.
14 Lö uʼa daʼö ba ginötö waʼabu dödö, lö ufawuʼa ia na raʼiö ndraʼo mazui ubeʼe ba niha si no mate. No uʼoʼö niwaʼö Yehowa Lowalangigu ba ufalua fefu goroisania.
15 Moroi ba zorugo ba nahiamö niʼamoniʼö, faigi si tou ba fahowuʼö nono mbanuamö Izaraʼeli hegöi tanö si fahöna susu ba wewani andre,+ tanö nibeʼemö khöma,+ simane si no möiʼö ba hölu khö ndra tuama.’+
16 ”Maʼökhö andre, iwaʼö khömi Yehowa Lowalangimi enaʼö mifalua gamakhoita ba angetula huku andre. Miʼoʼö ba mifalua daʼö fefu soroi ba dödömi+ awö nosomi* maʼasambua.
17 Maʼökhö andre, no mitema dandra* moroi khö Yehowa wa tobali ia Lowalangimi sagötö wanörömi lalania ba miʼoʼö gamakhoitania,+ oroisania,+ ba angetula huku khönia,+ ba mifondrondrongo wehedenia.
18 Maʼökhö andre, noa göi itema Yehowa dandra moroi khömi wa tobali ami ono mbanuania, yaʼia daʼö okhötania si tohude*+ simane nifabuʼunia, ba miʼoʼö fefu goroisania.
19 Na miforomaʼö wa ono mbanua niʼamoniʼö ami khö Yehowa Lowalangimi,+ iʼalawaʼö ami moroi ba soi böʼö fefu,+ tesuno ami, tefosumange ba tefolakhömi ami simane nifabuʼunia.”
Nisura ba gahe zura
^ Mazui te ”sarakhagö ahori ba danö”.
^ Sin.: ”taʼiomö si no öfadölö”.
^ Sin.: ”bakha ba mbawa göli khömi”.
^ Mazui ”si lö ama si lö ina”.
^ Faigi Geluaha Ngawua Wehede.
^ Mazui ”wamaduhuʼö”.
^ Mazui ”yaʼia daʼö ono mbanua niʼomasiʼönia”.
