5 Moze 27:1-26
27 Aefa daʼö, mosindro Moze hegöi ira satua mbanua föna ndraono Gizaraʼeli. Imane Moze, ”Miʼoʼö fefu goroisa nifaʼemagu khömi maʼökhö.
2 Na miʼötö Nungo Nidanö Yoridano weʼamöi ba danö nibeʼe Yehowa Lowalangimi khömi, mitaruʼö gara segebua ba mi-plester.+
3 Na no miʼötö dania nungo nidanö andrö, misura fefu Goroisa andre ba gara daʼö enaʼö tola möi ami ba danö nibeʼe Yehowa Lowalangimi khömi, tanö si no fahöna susu ba wewani, simane nifabuʼu Yehowa khömi, Lowalangi ndra tuami.+
4 Na no miʼötö Nungo Nidanö Yoridano, mitaruʼö gara ba Hili Gebala+ ba mi-plester, simane niwaʼögu khömi maʼökhö.
5 Mifazökhi ba daʼö naha wanunu sumange khö Yehowa Lowalangimi moroi ba gara. Böi miʼogunaʼö wakake moroi ba ziʼöli ba wanoto yaʼia.+
6 Mifazökhi naha wanunu sumange khö Yehowa Lowalangimi moroi ba gara si lö mutoto, ba mibeʼe yawa ba detenia zumange nitunu khö Yehowa Lowalangimi.
7 Mibeʼe zumange fangatulö+ ba miʼa ba daʼö.+ Miʼomusoiʼö dödömi föna Yehowa Lowalangimi.+
8 Fefu Goroisa daʼa, mihaogö wanura ba gara andrö.”+
9 Aefa daʼö, fahuhuo Moze hegöi ira ere Lewi ba ndraono Gizaraʼeli, ”Yaʼami iraono Gizaraʼeli, mihonogö ami ba mifondrondrongo. Maʼökhö andre no tobali ami ono mbanua Yehowa Lowalangimi.+
10 Mifondrondrongo wehede Yehowa Lowalangimi, ba miʼoʼö fefu goroisa+ awö gamakhoitania nifaʼemagu khömi maʼökhö.”
11 Me luo daʼö, ibeʼe goroisa daʼa Moze ba ndraono Gizaraʼeli,
12 ”Na no aefa dania miʼötö Nungo Nidanö Yoridano, ba mosindro fefu mado Zimeoni, Lewi, Yehuda, Isasari, Yosefo hegöi Beniami ba Hili Garisi+ ba wamahowuʼö fefu soi daʼa.
13 Ba mosindro göi mado Rubeno, Gado, Aseri, Sebuloni, Dano hegöi Nafetali ba Hili Gebala+ ba wanötöi fangelifi.
14 Ebua li niha Lewi wanötöi fehede daʼa ba ndraono Gizaraʼeli:+
15 ”’Niʼelifi niha samazökhi ba saminiʼö adu nitoto+ mazui adu moroi ba loga*+ nifazökhi duka.* No niʼogorofi Yehowa daʼö.’+ (Ba fefu niha sato lamane, ’Yaduhu!’*)
16 ”’Niʼelifi niha sangailasi amania mazui inania.’+ (Ba fefu niha sato lamane, ’Yaduhu!’)
17 ”’Niʼelifi niha samawuʼa ola danö nawönia.’+ (Ba fefu niha sato lamane, ’Yaduhu!’)
18 ”’Niʼelifi niha samaelungu niha sauʼa ba lala.’+ (Ba fefu niha sato lamane, ’Yaduhu!’)
19 ”’Niʼelifi niha sangetuʼö huku si lö atulö+ ba niha si fatewu, si lö ama* mazui lakha mbanua.’+ (Ba fefu niha sato lamane, ’Yaduhu!’)
20 ”’Niʼelifi niha sohoröni foʼomo namania, börö me no iʼailasi namania.’+ (Ba fefu niha sato lamane, ’Yaduhu!’)
21 ”’Niʼelifi niha sohoröni urifö.’+ (Ba fefu niha sato lamane, ’Yaduhu!’)
22 ”’Niʼelifi niha sohoröni talifusönia alawe, yaʼia daʼö ono moroi khö namania mazui moroi khö ninania.’+ (Ba fefu niha sato lamane, ’Yaduhu!’)
23 ”’Niʼelifi niha sohoröni inania matuania.’+ (Ba fefu niha sato lamane, ’Yaduhu!’)
24 ”’Niʼelifi niha sanarogö ba samunu awönia.’+ (Ba fefu niha sato lamane, ’Yaduhu!’)
25 ”’Niʼelifi niha sanema kefe ba wamunu* niha si lö sala.’+ (Ba fefu niha sato lamane, ’Yaduhu!’)
26 ”’Niʼelifi niha si lö moloʼö Oroisa daʼa ba si lö mamalua yaʼia.’+ (Ba fefu niha sato lamane, ’Yaduhu!’)
Nisura ba gahe zura
^ Mazui ”Yasimanö zalua!”
^ Mazui ”duka geu hegöi loga”.
^ Mazui ”nadu nifahele”.
^ Mazui ”si lö ama si lö ina”.
^ Mazui ”wanuwagö do”.
