5 Moze 28:1-68
28 ”Na sindruhu-ndruhu mifondrondrongo wehede Yehowa Lowalangimi, ba miʼoʼö fefu goroisania soroi ba dödö nifaʼemagu khömi maʼökhö, hasambalö iʼalawaʼö ami Yehowa Lowalangimi moroi ba soi böʼö si so ba gulidanö.+
2 Khömi möi fefu howu-howu daʼa ba tebai miʼohe mbalazi waʼoya+ börö me mifondrondrongo wehede Yehowa Lowalangimi:
3 ”Nifahowuʼö ami, yaʼami si so ba mbanua hegöi ba mbenua.+
4 ”Nifahowuʼö ndraonomi,*+ bua zinanömi, ono gurifömi, ono zawi ba ono mbiri-biri khömi.+
5 ”Nifahowuʼö raga-raga+ hegöi naha wamaruka roti khömi.+
6 ”Nifahowuʼö ami gofu hezo möi ami ba gofu hadia nifaluami.
7 ”Kala dania zi faʼudu khömi ba zanehe ami+ ibeʼe Yehowa. Ha sara lalara ba wanuwö yaʼami, hizaʼi fitu rozi dania lalara na moloi ira fönami.+
8 Ifahowuʼö Yehowa naha wangiröʼö khömi+ ba fefu halöwö nifaluami, ba hasambalö ifahowuʼö ami Yehowa Lowalangimi ba danö nibeʼenia khömi.
9 Na lö miböhöli woloʼö oroisa Yehowa Lowalangimi ba mitörö lalania, tobali ami ono mbanua niʼamoniʼö+ khö Yehowa simane si no möi ia ba hölu khömi.+
10 Laʼila dania fefu soi niha ba gulidanö wa ono mbanua Yehowa ami sangotöigö töinia+ ba ataʼu ira khömi.+
11 ”Iʼoyaʼö dania nonomi Yehowa hegöi urifömi awö mbua zinanömi ba danö nifabuʼu Yehowa khömi+ si no möi ia ba hölu khö ndra tuami.+
12 Ibokai dania Yehowa naha wangiröʼö khönia, yaʼia daʼö talu mbanua ba wanorugö teu ba danömi ba ginötönia+ hegöi ba wamahowuʼö fefu ngawalö nifaluami. Oya mifafizaʼö ba soi misa hizaʼi lö mamiza ami.+
13 Ifataro ami Yehowa tobali högö, tenga iʼo; tanö yawa so ami,+ tenga tou, asala lö miböhöli wamondrongo oroisa Yehowa Lowalangimi nifaʼemagu khömi maʼökhö enaʼö miʼoʼö ba mifalua.
14 Böi miholeʼö ami moroi ba goroisa nifaʼemagu khömi maʼökhö, he ba gambölö hegöi ba gabera,+ ba wamosumange lowalangi böʼö ba mangalulu ami khöra.+
15 ”Hizaʼi, na lö mifondrondrongo wehede Yehowa Lowalangimi, ba na miʼosiwawöi fefu goroisa awö gamakhoitania nifaʼemagu khömi maʼökhö, göna khömi fefu wangelifi daʼa ba tebai mitimba:+
16 ”Niʼelifi ami, yaʼami si so ba mbanua hegöi ba mbenua.+
17 ”Niʼelifi raga-raga+ hegöi naha wamaruka roti khömi.+
18 ”Niʼelifi ndraonomi,*+ bua zinanömi, ono gurifömi, ono zawi ba ono mbiri-biri khömi.+
19 ”Niʼelifi ami gofu hezo möi ami ba gofu hadia nifaluami.
20 ”Ifatörö khömi Yehowa wangelifi, faʼafawuka hegöi fanguhuku ba ngawalö nifaluami irege tehori ba taya ami ba zi lö arara, börö me mifalua zi lö sökhi ba miʼerogö ia.*+
21 Iʼolembai ami dania fökhö ibeʼe Yehowa irege aseʼe ami ba danö nirabumi.+
22 Ifatörö khömi Yehowa wökhö TBC, fogikhi,+ faosa, faʼaukhu si lö harumani, föda,+ angi saukhu, ba fökhö zinanö.+ Igohi ami daʼö fefu irege ahori ami ba danö.
23 Tobali dania tembaga* dalu mbanua khömi ba hulö ziʼöli* danömi.+
24 Itorugö gawu-gawu ba danömi Yehowa, ba alua deu hulö gawu, irege ahori ami.
25 Itehegö kala ami Yehowa ba danga zi faʼudu khömi.+ Ha sara lalami ba wanuwö yaʼira, hizaʼi fitu rozi lala mitörö na moloi ami fönara. Fefu ndra samatörö ba gulidanö, oi muhokha mbura ba wamaigi salua khömi.+
26 Tobali balazo wofo ba dalu mbanua gamatelami ba ö gurifö ba danö, ba lö sanaboi yaʼira.+
27 ”Igönaisi khömi Yehowa waosa niha Miserai, faʼaböla hogo, böni hegöi fökhö guli si lö dalu-dalu.
28 Ifowöhö ami Yehowa, auʼa,+ ba fawuka gera-erami.
29 Mibayaisi dalu mbanua na mofanö ami ba zi maʼökhö hulö niha sauʼa sofanö ba zi bongi.+ Fefu nifaluami ba lö mofozu. Lalimo-limo manö ami ba larabu, ba samösa lö sanolo yaʼami.+
30 Famatua ami dania khö zi samösa ira alawe, hizaʼi ira matua böʼö zohoröni yaʼia. Mifazökhi nomo ba tenga ba daʼö toröi ami.+ Mifazökhi kabu nagu ba lö mitema mbua.+
31 Latatawi dania zawimi fönami ba lö labeʼe ömi nagolenia. Latagö galidemi fönami ba lö saʼae misöndra mangawuli. Lahalö mbiri-birimi si faʼudu khömi ba lö hadöi sanolo yaʼami.
32 Lahalö ndraonomi fönami ba labeʼe ba niha böʼö,+ awakhö-wakhö dödömi khöra ba lö hadöi si tola mifalua.
33 Niha böʼö si lö faʼila khömi zi manga bua zinanömi ba fefu nisöndrami.+ Lalimo-limo manö ami ba lafakao.
34 Owöhö ami ba wamaigi-maigi niʼila hörömi.
35 ”Ibözi ami Yehowa faoma faosa sabölö-bölö ba gahe awö mbalöduhi ba tebai tefadöhö, iʼotarai duturu kahe irugi galizuzu.
36 Iheta ami Yehowa hegöi razo nifataromi ba danö si lö irai miʼila ba simanö göi ndra tuami.+ Ba daʼö mifosumange lowalangi tanö böʼö nifazökhimi moroi ba geu ba kara.+
37 Humokha mbu niha wamaigi salua khömi, ba tobali ami tandrösa wangoʼaya ba fangobousi* ba gotalua soi nifofanö Yehowa yaʼami.+
38 ”Oya sibai danömö zinanö niʼohemi ba nowi, hizaʼi lö oya-oya mitema mbua+ börö me ahori iʼa tamo.
39 Mitanö ba mirorogö kabu nagu khömi, hizaʼi lö mibasi mbua ba maʼifu lö mibadu nagu+ börö me ahori iʼa kuö-kuö.
40 Fasui ami döla geu zaitu, hizaʼi maʼifu lö mifagule khömi wanikhania börö me ahori adudu mbua.
41 So nonomi ono matua hegöi ono alawe, hizaʼi lö sandrohu faʼaurimi wefao khöra börö me teʼoloiʼö ira.+
42 Ngawawa damo zamakiko töla geu khömi awö mbua zinanö.
43 Itugu monönö waʼabölö niha si fatewu ba gotaluami, ba yaʼami itugu tebai.
44 Labeʼe khömi nifiza hizaʼi lö hadöi si tola mifafizaʼö khöra.+ Tobali ira dania högö ba yaʼami zi tobali iʼo.+
45 ”Alua khömi fefu ngawalö wangelifi andre+ ba igohi ami, ba tebai mitimbagö irege ahori ami,+ börö me lö mifondrondrongo wehede Yehowa Lowalangimi ba lö mifalua goroisa awö gamakhoita nibeʼenia.+
46 Alua khömi daʼö fefu hegöi ba ngaʼötömi, ba tobali tandra hegöi famangelama sagötö faʼara,+
47 börö me inötö fahöna howu-howu nitemami, lö mifosumange Yehowa Lowalangimi si fao faʼomuso dödö ba faʼowua-wua dödö.+
48 Lasuwö ami si faʼudu khömi ibeʼe Yehowa. Mangai halöwö ami khöra+ si fao faʼolofo,+ faʼowökhi dödö, lö nukha, ba lö hadöi niʼokhögömi. Ibeʼe noro siʼöli ba galisimi irege tehori ami.
49 ”Iʼasogö soi saröu+ Yehowa moroi ba wondrege danö ba wanuwö yaʼami. Lasuwö ami simane na iraʼu gönia moyo.+ Daʼö soi si lö miʼila li.+
50 Afaito sibai ndra niha daʼö ba lö faʼahakhö dödöra niha satua hegöi si bohou ebua.+
51 Yaʼira zi manga urifömi hegöi bua zinanömi irege ahori ami. Lö laröi ömi mbua nowi, agu si bohou, fanikha, ono zawi mazui ono mbiri-birimi irege no lahori ami fefu.+
52 Lafaʼuʼu ba lakuru ami ba mbanua* si so ba soimi irege adudu göli kara sagalawa ba saro sabeʼe dödömi. Lafaʼuʼu ami ba mbanua nibeʼe Yehowa Lowalangimi khömi.+
53 Börö waʼabölö-bölö wamaʼuʼu ba famakao si göna ami, lua-luania miʼa ömi nonomi,* nagole ndraonomi,+ iraono nibeʼe Yehowa Lowalangimi khömi.
54 ”Ira matua sahakhö tödö ba khömi ba si no toʼölö ohahau tödö ba waʼaurinia, lö ahakhö dödönia dalifusönia, mazui foʼomonia ira alawe niʼomasiʼönia mazui ononia si toröi.
55 Lö ibeʼe ösa ba niha nagole nononia si tobali önia, me lö hadöi soguna khönia börö waʼabölö-bölö wamaʼuʼu ba famakao si göna ba mbanuami.+
56 Ira alawe sahakhö tödö ba si no toʼölö ohahau tödö ba waʼaurinia, si lö omasi manguhundragö tanö börö waʼasökhinia,+ lö ahakhö dödönia ndraononia mazui foʼomonia ira matua niʼomasiʼönia,
57 iʼa gaʼa nononia sanörö otalua wahania hegöi ono niʼadonogönia. Ibiniʼö ia wemanga börö waʼabölö-bölö wamaʼuʼu ba famakao si göna ba mbanuami.
58 ”Na tenga soroi ba dödömi wamalua fefu Oroisa si no tesura ba mbuku daʼa+ ba lö miʼataʼufi döi Lowalangimi Yehowa,+ solakhömi ba sahöli-höli dödö andre,+
59 ibözi ami Yehowa faoma fökhö waba* sabölö-bölö, simanö göi ngaʼötömi, yaʼia daʼö fökhö waba si lö harumani ba si lö aetu-aetu,+ ba fökhö sabeʼe si lö iʼila döhö.
60 Iʼasogö khömi fefu wökhö salua ba danö Miserai sataʼu ami, ba falemba khömi wökhö daʼö.
61 Iʼasogö khömi Yehowa ngawalö wökhö mazui waba si lö irai tesura ba Goroisa irege tehori ami.
62 Hewaʼae ato ami simane faʼoya ndröfi ba dalu mbanua,+ hizaʼi hatö fazamösa ami dania zi toröi+ börö me lö mifondrondrongo wehede Yehowa Lowalangimi.
63 ”Simane faʼomuso dödö Yehowa me iʼoyaʼö ami ba ibeʼe khömi waʼohahau dödö, simanö göi waʼomuso dödö Yehowa dania ba wamakiko hegöi ba wangohori yaʼami. Lafofanö ami ba danö sarakhagö miʼokhögö andrö.
64 ”Ifazawili ami Yehowa ba soi misa, iʼotarai mbalö danö faföfö.+ Ba daʼö dania mifosumange lowalangi nifazökhi moroi ba geu faoma kara si lö irai miʼila ba si lö irai laʼila ira tuami.+
65 Lö misöndra waʼohahau dödö ba gotalua soi daʼö+ mazui nahia wolombase gahemi. Ifangiwa dödömi+ Yehowa, atage hörömi, ba aetu wanötönami.+
66 Igohi-gohi ami lumö waʼamate. Ataʼu ami bongi maʼökhö ba lö si tatu ba dödömi na teʼorifi ami.
67 Na sihulö wongi mimane, ’Enaʼö sibai si bongi daʼa!’ ba na bongi mimane, ’Enaʼö sibai sihulö wongi daʼa!’ Börö waʼataʼu andrö wa simane daʼö ami, ba börö niʼila hörömi.
68 Ifuli iʼohe ami Yehowa ba danö Miserai faoma köfa, hewaʼae no irai uwaʼö wa lö saʼae ifuli möi ami ba daʼö. Mifamawa ami ba daʼö tobali sawuyu nudumi, hizaʼi lö hadöi sowöli.”
Nisura ba gahe zura
^ Sin.: ”dabinami”.
^ Sin.: ”dabinami”.
^ Sin.: ”ndraʼo”.
^ Eluahania oköli danö börö me lö moteu.
^ Eluahania lö aekhu deu moroi ba mbanua.
^ Sin.: ”amaedola”.
^ Sin.: ”bakha ba mbawa göli”.
^ Sin.: ”dabinami”.
^ Mazui ”famakao”.
