5 Moze 29:1-29
29 Baero mbuʼusa linia ba ndraono Gizaraʼeli ba Horebi,+ iʼandrö Yehowa khö Moze enaʼö lafazökhi khöra mbuʼusa li tanö böʼö ba Moabi, daʼa wehedenia.
2 Ikaoni fefu ndraono Gizaraʼeli andrö Moze ba imane, ”No miʼila fefu nifalua Yehowa ba danö Miserai khö Waraʼo, fefu zawuyunia ba fefu soinia.+
3 No miʼila samösa wanguhuku* sabölö-bölö, yaʼia daʼö tandra sahöli-höli dödö.+
4 Irugi iadaʼa, lö nasa nibeʼe Yehowa khömi dödö satua-tua, hörö si tola mangila, ba talinga si tola mamondrongo.+
5 ’Yaʼo zanuturu lalami sagötö zi 40 fakhe ba danö si mate,+ ba lö irai tekiko mbaru hegöi sandrala nifakemi.+
6 Lö hadöi roti ba lö hadöi agu mazui ngawalö duo tanö böʼö enaʼö aboto ba dödömi wa yaʼo Yehowa Lowalangimi.’
7 Lua-luania ofeta ami ba daʼa. Lö ara tohare Zihona razo Hesibona+ hegöi Ogi razo Mbazana+ ba wanuwö yaʼita. Hizaʼi, takalaisi ira.+
8 Aefa daʼö, tahalö danöra ba tabeʼe tobali ondröita ba mado Rubeno, mado Gado, ba matonga mado Manase.+
9 Börö daʼö, miʼoʼö ba mifalua mbuʼusa li daʼa enaʼö mofozu fefu nifaluami.+
10 ”Maʼökhö andre mosindro ami föna Yehowa Lowalangimi, fefu zondröniaʼö ba madomi, satua mbanua, niha niʼataʼufi, ira matua Gizaraʼeli,
11 iraono, foʼomo ira alawe+ hegöi niha si fatewu+ si so ba gotaluami, sangowuloi eu ba sanaʼu idanö khömi.
12 Wa so ami ba daʼa enaʼö fao dödömi ba mbuʼusa li Yehowa si no möi ia ba hölu, yaʼia daʼö buʼusa li Yehowa Lowalangimi nibeʼenia khömi maʼökhö.+
13 Daʼö mbörö wa tola tobali ia Lowalangimi+ ba ituyu ami maʼökhö andre tobali ono mbanuania,+ simane si no ifabuʼu khömi ba simane hölunia khö ndra tuami Aberahamo,+ Izaʼaki+ ba Yakobo.+
14 ”Tenga ha khömi mubeʼe mbuʼusa li daʼö si no möi ia ba hölu,
15 hizaʼi fawuʼu li ia göi khö ndra niha si fao khöda wezizio maʼökhö daʼa föna Yehowa Lowalangida, simanö göi ba niha si lö fao khöda maʼökhö.
16 (Miʼila samösa hewisa waʼaurida ba danö Miserai mböröta, simanö göi me tatörö danö soi böʼö.+
17 No miʼila fefu gama-gama si raʼiö awö nadu niʼogorofi* khöra,+ nifazökhi moroi ba geu, kara, firö ba anaʼa.)
18 Böi so ndra matua, ira alawe, ösi nomo, mazui mado sangerogö Yehowa Lowalangida, ba wamosumange lowalangi soi böʼö.+ Niha simane daʼö hulö waʼa si tumbu ba tobali tanömö zinanö safeto si faruka langu.+
19 ”Tola manö so zamondrongo hölu daʼö ba imane tödönia si fao fayawasa, ’Lö hadöi si göna yaʼo hewaʼae na ufalua zomasi dödögu.’ Na ifalua daʼö, ifakiko waʼaurinia hegöi niha böʼö.*
20 Lö iʼefaʼö zalania Yehowa,+ ba monönö wönu Yehowa khönia. Göna khönia fefu wangelifi+ si no tesura ba mbuku daʼa, ba taya döinia ba gulidanö* ibeʼe Yehowa.
21 Yehowa dania zamasambua yaʼia moroi ba mado ndraono Gizaraʼeli ba göna ia faʼatosasa simane fangelifi nitötöi ba mbuʼusa li si no tesura ba mbuku Goroisa andre.
22 ”Ngaʼötö ndraonomi dania hegöi niha si fatewu ba soi saröu zangila famakao nifalua Yehowa ba soi daʼa.
23 Iʼasogö dania mbalera, asio ba alitö, irege tebai mufazaewe danömö zinanö mazui moliwiö, ba lö hadöi sinanö sauri ba daʼö simane salua ba Zodoma ba Gomora,+ Adama ba Seboʼi,+ nidudugö Yehowa börö wönunia sabölö-bölö.
24 Manofu dania ira ba simanö göi fefu soi, ’Hana wa ifalua daʼö Yehowa ba soi daʼa?+ Hana wa mofönu ia?’
25 Ba lamane niha sato, ’Börö me no lasawö mbuʼusa lira khö Yehowa,+ Lowalangi ndra tuara, buʼusa linia me iheta ira ba danö Miserai.+
26 Ba no mangalulu ira ba latuhi danö föna lowalangi böʼö si lö irai laʼila ba si no itegu faböi lafosumange.*+
27 Daʼö mbörö wa mofönu sibai Yehowa ba soi daʼö, ba iʼasogö fefu wangelifi si no tesura ba mbuku andrö.+
28 Andrö wa mofönu sibai Yehowa,+ iheta ira ba danöra ba itiboʼö ira ba soi böʼö, si toröi yaʼira iadaʼa.’+
29 ”Iʼila fefu Yehowa Lowalangida zi no tobini,+ hizaʼi fefu zi no iʼombakhaʼö ifaduhusi tödö khöda hegöi ba ngaʼötöda sagötö faʼara, enaʼö taʼoʼö fefu Goroisa daʼa.+
Nisura ba gahe zura
^ Mazui ”wanandraigö”.
^ Ba li Heberaiʼo te moʼamakhaita ia ba ”zi taʼunö” ba wangoromaʼö faʼogoro.
^ Sin.: ”ifakiko fefu zoya idanö awö zi no oköli ba lala nitörönia”.
^ Sin.: ”ba narö mbanua”.
^ Sin.: ”si lö irai ibeʼe khöra”.
