5 Moze 3:1-29
3 ”Aefa daʼö, mangawuli ita furi ba tatörö Lala Mbazana. Lö ara, tohare Ogi razo Mbazana ba fefu ndra saradadunia, möi ira lasuwö ita ba Gederai.+
2 Imane khögu Yehowa, ’Böi ataʼufi ia, ubeʼe ia ba dangau ba simanö göi ndra saradadunia hegöi tanönia. Öfalua khönia simane nifaluamö khö Zihona, razo niha Gamori si toröi ba Hesibona.’
3 Andrö ilulu ba dangada Ogi razo Mbazana andrö Yehowa Lowalangida ba fefu ndra saradadunia. Takalaisi ira irege samösa lö sauri.
4 Aefa daʼö, tarabu fefu mbanuania. Lö hadöi si toröi. So 60 mbanua ba zi sagörö tanö Garigobi, nifatörö Ogi razo Mbazana.+
5 Agalawa göli mbanua daʼa, mobawa göli, no mufobaʼa-baʼa, ba oya sibai mbanua si gide-ide.
6 Hewaʼae simanö, no ahori tadudugö fefu,+ simane nifaluada khö Zihona razo Hesibona. Tahori fefu mbanua daʼö, simanö göi ndra matua, ira alawe hegöi iraono.+
7 Tahalö guriföra ba tarabu fefu gama-gama ba mbanua daʼö.
8 ”Me luo daʼö, tarabu mbanua andrö moroi ba danga razo niha Gamori si darua+ si so ba mbanua Nungo Nidanö Yoridano, iʼotarai Ndraso Garono ofeta ba Hili Heremono+
9 (niha Zidona lafotöi Heremono andrö Siriono, ba ira niha Gamori lafotöi Seniri),
10 fefu mbanua ba danö sohili, banua Gileadi, simanö göi Mbazana irugi Zalekha ba Ederai,+ yaʼia daʼö banua nifatörö Ogi ba Mbazana.
11 Ogi razo Mbazana yaʼia daʼö niha Refaʼi safuria auri. Moroi ba ziʼöli tefazökhi mbea-beania* si so ba Raba banua niha Gamoni. Faʼanaunia 4 meter,* ba faʼebolonia 1,8 meter.*
12 Me luo daʼö, tarabu soi daʼa: moroi ba Naroeri,+ si so ba zinga Ndraso Garono, ba matonga moroi ba mbanua si so ba hili Gileadi. Ubeʼe mbanua daʼö ba mado Rubeno hegöi ba mado Gado.+
13 Si töra moroi ba mbanua Gileadi ba fefu Mbazana nifatörö Ogi, ubeʼe ba zi matonga mado Manase.+ Fefu mbanua Garigobi si so ba Mbazana mböröta lafotöi ia tanö niha Refaʼi.
14 ”Ihalö fefu mbanua Garigobi+ andrö Yaʼiri+ ono Manase ofeta ba nola mbanua niha Gesuri faoma niha Maʼakhati.+ Ibeʼe töi mbanua si so ba Mbazana andrö simane töinia samösa, yaʼia daʼö Hawoti-yaʼiri*+ irugi maʼökhö.
15 Ubeʼe mbanua Gileadi khö Makhiri.+
16 Ba mado Rubeno hegöi mado Gado,+ ubeʼe khöra mbanua iʼotarai Gileadi ofeta Ndraso Garono, ba dalu ndraso daʼö so nolania ofeta ba Yaboko, daso si tobali ola niha Gamoni.
17 Ubeʼe göi khöra Garaba, Ungo Nidanö Yoridano awö nolania iʼotarai Gineroti numalö ba Nasi Garaba, yaʼia daʼö Asi Sasi-asi* ba gahe hili Wisiga tanö ba gatumbukha.+
18 ”Aefa daʼö, ubeʼe khöra goroisa andre, ’No ibeʼe khömi Yehowa Lowalangimi danö daʼa enaʼö mirabu. Fefu ndra matua sabölö khömi ba si lö ataʼu, enaʼö lafaʼanö ira ba wasuwöta ba laʼötö nungo nidanö föna ndra talifusömi iraono Gizaraʼeli tanö böʼö.+
19 Foʼomomi, iraonomi, ba fefu gurifömi toröi dania ba mbanua nibeʼegu khömi. (Aboto ba dödögu wa oya sibai gurifömi.)
20 Lö tebulö daʼö irege no ahono dödö ndra talifusömi ibeʼe Yehowa simane yaʼami, ba irege no larabu danö nibeʼe Yehowa Lowalangimi khöra ba zi tambai Nungo Nidanö Yoridano. Awena tola mangawuli ami ba danömi zamösana, tanö si no ubeʼe khömi.’+
21 ”Me luo daʼö, ubeʼe goroisa daʼa khö Yosua,+ ’No anehe ndraʼugö fefu nifalua Yehowa Lowalangimi khö razo si darua andre. Daʼö göi dania nifalua Yehowa khö ndra razo niʼondrasimi maʼafefu.+
22 Böi miʼataʼufi ira, börö me Yehowa Lowalangimi zi fasuwö salahimi.’+
23 ”Me luo daʼö, uʼandrö khö Yehowa,
24 ’He Yehowa Lowalangi Fondrege Zalawa, no ibörögö öforomaʼö khö genonimö andre lakhömi hegöi faʼabölömö sahöli-höli dödö.*+ Lö hadöi lowalangi ba mbanua si yawa mazui ba gulidanö samalua ngawalö zahöli-höli dödö simane nifaluamö.+
25 Tehegö khögu wangötö hegöi ba wamaigi tanö si sökhi ba zi tambai Nungo Nidanö Yoridano, yaʼia daʼö Libano awö mbanua si sökhi si so ba hili.’+
26 Hizaʼi, mofönu nasa khögu Yehowa börö ami.+ Lö ifondrondrongo niwaʼögu Yehowa ba imane khögu, ’Noa daʼö! Böi törö-törö tödöu daʼö saʼae.
27 Aeʼe miyawa ba zuzu hili Wisiga+ ba fakhölöʼö tanö ba gaekhula, miyöu, miraya, ba tanö ba gatumbukha. Haogö wamaigi tanö daʼö, börö me tenga yaʼugö zangötö Ungo Nidanö Yoridano andrö.+
28 Fataro Yosua tobali sondröniaʼö,+ farou dödönia, ba abeʼeʼö ia, börö me yaʼia zangagö föna dania na laʼötö nungo nidanö andrö+ niha sato, ba yaʼia zondröniaʼö yaʼira ba wangokhögö tanö ondröita nifaigimö.’
29 Alua fefu daʼö me toröi ita ba ndraso föna Mbeti-weoro.+
Nisura ba gahe zura
^ Mazui ”wetinia; sarkofagusnia”.
^ Eluahania ”Banua Nose Yaʼiri”.
^ Eluahania Asi si Mate.
^ Sin.: ”taʼiomö sabölö”.
