5 Moze 31:1-30
31 Aefa daʼö, möi Moze wamaʼema fehede daʼa ba ndraono Gizaraʼeli fefu,
2 ”Maʼökhö andre, 120 fakhe ndröfigu.+ Tebai saʼae udöniaʼö ami, börö me Yehowa zangumaʼö wa tebai dania uʼötö Nungo Nidanö Yoridano andre.+
3 Yehowa Lowalangimi zi so fönami na miʼötö dania. Ihori fefu soi daʼa fönami ba mifofanö ira.+ Yosua zondröniaʼö yaʼami ba wangötö idanö andrö+ simane niwaʼö Yehowa.
4 Ihori ira Yehowa simane nifaluania khö Zihona+ ba Ogi+ yaʼia daʼö razo-razo niha Gamori awö danöra.+
5 Ikalaisi soi daʼa Yehowa salahimi, ba mifalua khöra moloʼö si no ufaʼema khömi.+
6 Yaʼabölö ami ba enaʼö barani.+ Böi miʼataʼufi ira mazui tokea ami+ börö me Yehowa zi fao khömi. Lö iröi ami mazui iʼositengagö ami.”+
7 Aefa daʼö, mohede Moze khö Yosua föna ndraono Gizaraʼeli, ”Yaʼabölö ndraʼugö ba enaʼö barani,+ börö me yaʼugö zolohe soi daʼa ba danö nifabuʼu Yehowa simane si no möi ia ba hölu khö ndra tuara. Öbeʼe khöra danö daʼö tobali ondröita.+
8 Yehowa zi so tanö fönau ba yaʼia zi fao khöu.+ Lö iröi ndraʼugö mazui iʼositengagö. Böi ataʼufi mazui maniziʼö.”+
9 Isura Moze fefu Goroisa daʼa ba ibeʼe khö ndra ere, ba niha Lewi,+ samazawa tawöla amabuʼula li Yehowa ba fefu zondröniaʼö iraono Gizaraʼeli.
10 Ifaʼema khöra goroisa daʼa Moze, ”Ba gangohorita zi fitu fakhe, ba ginötö si no muhonogöi ba ndröfi wangefa,+ ba Gowasa Nose Ndraha Geu,*+
11 na möi ndraono Gizaraʼeli ba wangondrasi Yehowa Lowalangimi+ ba nahia si no itatugöi, mibaso Goroisa daʼa enaʼö larongo fefu iraono Gizaraʼeli.+
12 Owuloi fefu soi daʼa,+ ira matua, ira alawe, iraono* hegöi niha si fatewu ba mbanuami, enaʼö larongo ba lafahaʼö ira, ba laʼataʼufi Yehowa Lowalangimi, ba soroi ba dödöra woloʼö Oroisa daʼa fefu.
13 Iraonora si lö aboto ba dödö sanandrösa ba Goroisa daʼa, lafondrondrongo+ ba lafahaʼö ira dania ba wangataʼufi Yehowa Lowalangimi sandrohu faʼaurimi ba danö nirabumi dania na no miʼötö Nungo Nidanö Yoridano.”+
14 Aefa daʼö imane Yehowa khö Moze, ”Lö ara tö ba mate ndraʼugö.+ Kaoni Yosua ba aeʼe* ba nose waʼowulo* enaʼö tola ufataro ia tobali sondröniaʼö.”+ Börö daʼö mofanö Moze hegöi Yosua möi ira ba nose waʼowulo.
15 Ba tohare Yehowa ba döla lawuo, ba so döla lawuo andrö ba mbawandruhö nose waʼowulo.+
16 Imane Yehowa khö Moze, ”Lö ara tö ba mate ndraʼugö,* ba labörögö soi daʼa wamosumange* lowalangi böʼö ba soi nirugira.+ Laʼerogö ndraʼo+ ba lasawö mbuʼusa ligu nibeʼegu khöra.+
17 Na alua daʼö ba mofönu sibai ndraʼo khöra.+ Uröi ira+ ba ubiniʼö mbawagu khöra+ irege tehori ira. Ba na no oya göna ira famakao ba fangabu dödö,+ awena lamane, ’Wa göna ita famakao daʼa börö me lö fao khöda saʼae Lowalangi.’+
18 Hizaʼi, lö uböhöli waminiʼö bawagu khöra na luo daʼö börö waʼalösökhira, me no laʼoʼö lowalangi tanö böʼö.+
19 ”Iadaʼa, sura zinunö andre+ ba fahaʼö ba ndraono Gizaraʼeli.+ Andrö khöra enaʼö lafahaʼö ira ba zinunö daʼa* irege tobali samaduhuʼö daʼö khögu ba wolawa iraono Gizaraʼeli.+
20 Ba ginötö uʼohe ira ba danö si no ufabuʼu khö ndra tuara,+ tanö si fahöna susu ba wewani,+ abuso ira wemanga ba ohahau dödöra,*+ laʼoʼö ba lafosumange lowalangi tanö böʼö. Lö lafosumange ndraʼo ba lasawö mbuʼusa ligu.+
21 Ba ginötö oya wamakao ba abula dödö si göna ira,+ sinunö andre zi tobali samaduhuʼö ba wolawa yaʼira (börö me tefasugi-sugi ba dödö ngaʼötöra), börö me no uʼila zomasi dödöra.+ No tohöna uʼila daʼö fatua lö niʼohegu yaʼira ba danö nifabuʼugu khöra si no möido ba hölu.”
22 Me luo daʼö, isura zinunö daʼa Moze ba ifahaʼö ndraono Gizaraʼeli.
23 Ifataro* Yosua+ ono Nuni ba imane, ”Yaʼabölö ndraʼugö ba enaʼö barani,+ börö me yaʼugö zolohe iraono Gizaraʼeli weʼamöi ba danö nifabuʼugu khöra si no möido ba hölu.+ Lö faröi ndraʼo khöu.”
24 Lö ara me no awai isura fefu Goroisa daʼa Moze ba zi sambua buku,+
25 mohede ia ba niha Lewi samazawa tawöla amabuʼula li Yehowa:
26 ”Halö mbuku Goroisa daʼa+ ba beʼe ba zinga dawöla+ amabuʼula li Yehowa Lowalangimi. Buku daʼa zi tobali samaduhuʼö ba wolawa yaʼami.
27 Börö me uʼila wa soi sabeʼe högö*+ ami ba somasi molawa.+ Me auri nasa ndraʼo ba no simane daʼö wolawami Yehowa, mendrua manö saʼae na no mate ndraʼo dania!
28 Owuloi fefu zondröniaʼö ba mado hegöi satua mbanua enaʼö larongo wehede nifaʼemagu. Banua si yawa awö danö zi tobali samaduhuʼö ba wolawa yaʼira.+
29 Uʼila ba aboto ba dödögu, na no mate ndraʼo dania ba hasambalö mifalua zi lö sökhi+ ba miholeʼö ami moroi ba lala si no uʼoroisi. Hasambalö göna ami abula dödö ba zi so miföna+ börö me mifalua zi lö sökhi föna Yehowa ba miʼafökhöiʼö dödönia ba gamuatami.”
30 Itötöi ngawua zinunö daʼa Moze iʼotarai ba wamobörö irugi awai föna ndraono Gizaraʼeli maʼafefu:+
Nisura ba gahe zura
^ Mazui ”Nahia Waʼatoröi Sabata”.
^ Sin.: ”iraono si gide-ide”.
^ Mazui ”miʼozizio”.
^ Töi böʼö sanandrösa ba nose Lowalangi.
^ Mazui ”wamalua fohorö ba wamati khö”.
^ Mazui ”lafadölö ndraʼugö ba ngai ndra tuau”.
^ Sin.: ”Beʼe zinunö daʼö ba mbawara”.
^ Sin.: ”irege esolo ira”.
^ Te Lowalangi.
^ Sin.: ”sabeʼe börö tuʼi”.
