5 Moze 5:1-33
5 Aefa daʼö, ikaoni fefu ndraono Gizaraʼeli andrö Moze imane, ”He yaʼami iraono Gizaraʼeli, mifondrondrongo gamakhoita ba angetula huku nifaʼemagu khömi maʼökhö. Lö tola löʼö mifahaʼö ami ba mifalua ia soroi ba dödö.
2 No fawuʼu li khöda Yehowa Lowalangida ba Horebi.+
3 Tenga khö ndra tuada fawuʼu li Yehowa, hizaʼi khöda yaʼita sauri ofeta maʼökhö.
4 Faʼila bawa ami khö Yehowa me fahuhuo ia moroi ba galitö, ba hili daʼö.+
5 Me fahuhuo Yehowa khömi me luo daʼö,+ yaʼo zi so ba gotaluami ba wamaʼema fehede Yehowa khömi, börö me ataʼu ami galitö daʼö ba lö möi ami ba hili.+ Imane,
6 ”’Yaʼo Yehowa Lowalangimi, si no mangeheta yaʼami ba danö Miserai, ba nahia* wangosawuyu yaʼami.+
7 Ha yaʼo zinangea mifosumange. Böi mifosumange* lowalangi tanö böʼö.+
8 ”’Böi mifazökhi khömi nadu nitoto+ mazui adu si fakhili-khili si so ba dalu mbanua, ba gulidanö mazui bakha ba nidanö.
9 Böi miʼangalulu ba böi mifosumange ia,+ börö me yaʼo Lowalangimi Yehowa zangumaʼö khömi enaʼö ha khögu mangalulu ami.+ Na so niha si fatuwu khögu, utehegö nononia, maʼuwunia hegöi mahonia ba wanaögö lua-lua zala nifaluania.+
10 Hizaʼi, uforomaʼö waʼomasigu si lö faröi ba niha sangomasiʼö yaʼo ba soloʼö oroisagu irugi saribu ngaʼötö.
11 ”’Böi mitötöi döi Lowalangimi Yehowa ba waya.+ Hasambalö ihuku Yehowa gofu haniha zangogunaʼö töinia ba waya.+
12 ”’Mifalua ngaluo Sabato enaʼö lö tebulö teʼamoniʼö luo andrö, simane niwaʼö Yehowa Lowalangimi.+
13 Önö ngaluo tola mohalöwö ami.+
14 Hizaʼi ba ngaluo si fitu, daʼö ngaluo sabato khö Yehowa Lowalangimi.+ Tebai mohalöwö ami+ simanö göi ndraonomi maʼafefu, sawuyumi, sawimi, kalidemi hegöi urifömi awö niha si fatewu si so ba mbanuami,*+ enaʼö tola molombase fefu zawuyumi simane yaʼami.+
15 Mitörö tödömi wa no teʼosawuyu ami mböröta ba danö Miserai, ba Yehowa Lowalangimi zangeheta yaʼami ba daʼö faoma tangania sabölö hegöi taʼionia sebua kuaso.*+ Daʼö mbörö wa iʼoroisi khömi Yehowa Lowalangimi wamalua Sabato.
16 ”’Fosumange namau awö ninau,+ simane niʼoroisi Yehowa Lowalangimi khömi, enaʼö anau nosomi ba mofozu waʼaurimi* ba danö nibeʼe Yehowa Lowalangimi khömi.+
17 ”’Böi bunu niha.+
18 ”’Böi ohorö.+
19 ”’Böi anagö.+
20 ”’Böi böbögö khö nawöu zi lö duhu.+
21 ”’Böi isö woʼomo nawöu.+ Böi fatiu dödöu khönia ba böi isö nomonia, nowinia, sawuyunia, sawinia, kalidenia mazui okhötania.’+
22 ”Ba hili daʼö, ifaʼema fefu goroisania* Yehowa ba ndraono Gizaraʼeli. Ebua linia wahuhuosa khöra moroi bakha ba galitö hegöi lawuo saitö saweʼe-weʼe,+ ba lö hadöi ninönönia. Aefa daʼö, isura fefu goroisa andrö ba gara si dua ngaʼörö ba ibeʼe khögu.+
23 ”Hizaʼi, me no mirongo li si hede moroi ba lawuo saitö andrö, me mohola-hola hili daʼö,+ laʼondrasi ndraʼo ira satua mbanua awö zondröniaʼö mado khömi.
24 Ba mimane khögu, ”No iforomaʼö khöda lakhöminia Yehowa ba faʼabölönia, ba no tarongo linia moroi ba galitö andrö.+ Maʼökhö andre taʼila wa lö hadöi si mate niha hewaʼae fahuhuo khönia Lowalangi.+
25 Hizaʼi lö omasiga mate. Tola ikhozi ndraʼaga hola-hola galitö sebua andrö. Na mafondrondrongo manö li Yehowa Lowalangida, hasambalö mate ndraʼaga.
26 Lö hadöi niha simane yaʼita, hewaʼae no tarongo li Lowalangi moroi bakha ba galitö, lö si mate ita.
27 Yaʼugö manö zi möi ba daʼö ba wamondrondrongo nifaʼema Yehowa Lowalangida. Yaʼugö dania zangombakha khöma fefu niwaʼö Yehowa Lowalangida. Mafondrondrongo ba mafalua niwaʼönia.’+
28 ”No irongo fefu niwaʼömi andrö Yehowa, ba imane khögu Yehowa, ’No urongo fefu niwaʼöra khöu. Sökhi niwaʼöra andrö.+
29 Na so khöra wangataʼufi bakha ba dödö ba laʼoʼö+ fefu goroisagu,+ lö tebulö ohahau dödöra ofeta ba ngaʼötöra!+
30 Waʼö khöra enaʼö mangawuli ira ba nosera zamösana.
31 Hizaʼi, böi ofanö ba daʼa. Ufatunö khöu fefu goroisa, amakhoita, ba angetula huku nifahaʼöu yaʼira dania. Lö tola löʼö lafalua fefu daʼö ba danö nibeʼegu khöra.’
32 Börö daʼö, böi zi lö mifalua fefu daʼö, simane niʼoroisi Yehowa Lowalangimi khömi.+ Böi miholeʼö ami ba gambölö mazui ba gabera.+
33 Mitörö lala niwaʼö Yehowa Lowalangida,+ enaʼö lö mate ami, mofozu waʼaurimi, ba anau nosomi ba danö nirabumi dania.+
Nisura ba gahe zura
^ Sin.: ”ba nomo”.
^ Mazui ”Böi milawa ndraʼo ba wamosumange”.
^ Mazui ”bakha ba mbawa göli khömi”.
^ Sin.: ”taʼionia si no ifadölö”.
^ Mazui ”ba ohahau dödömi”.
^ Sin.: ”daromalinia”.
