5 Moze 7:1-26
7 ”Na no iʼohe ami dania Yehowa Lowalangimi ba danö andrö si möi ami ba si no mirabu,+ ba iheta göi fönami soi sabölö ato ono mbanua.+ So fitu soi sato ono mbanua ba sabölö moroi khömi,+ yaʼia daʼö niha Kheti, niha Girigasi, niha Gamori,+ niha Ganaʼana, niha Weresi, niha Hewi, ba niha Yebusi.+
2 Ibeʼe ira ba dangami Yehowa Lowalangimi, ba mikalaisi ira dania.+ Lö tola löʼö mihori ira,+ ba böi milau fawuʼu li khöra mazui ahakhö dödömi ira.+
3 Böi faoma mihalö umönömi nono nawömi. Böi mifangowalu nonomi alawe khö ndraonora matua, ba böi mifangowalu nonomi matua khö ndraonora alawe.+
4 Börö me ladönisi dania ndraonomi ba wamosumange lowalangi böʼö+ ba lö lafosumange ndraʼo. Daʼö mbörö wa mofönu sibai khömi Yehowa irege ihori ami.+
5 ”Hizaʼi, daʼa nifaluamö khöra: Soʼagö naha wanunu sumange khöra, dudugö gehomo niʼamoniʼö* khöra,+ obö döla-döla niʼamoniʼö* khöra,+ ba tunu nadu nifoe si no lafazökhi.+
6 Börö me soi niʼamoniʼö ami khö Yehowa Lowalangimi. Yaʼami nifili Yehowa Lowalangimi moroi ba gotalua soi ba gulidanö tobali ono mbanuania, yaʼia daʼö okhötania si tohude.*+
7 ”No iforomaʼö waʼomasinia khömi Yehowa ba ifili ami tenga börö me yaʼami wondrege zato ba gotalua soi böʼö,+ yaʼami naʼi wondrege zide-ide.+
8 Ba börö me iʼomasiʼö ami Yehowa ba ifalua hölunia si no iwaʼö khö ndra tuami,+ andrö wa iheta ami Yehowa faoma tangania sabölö ba wangöhöli yaʼami moroi ba nahia* wangosawuyu yaʼami,+ yaʼia daʼö ba danga Waraʼo razo niha Miserai.
9 No aboto ba dödömi wa Lowalangi sindruhu Yehowa Lowalangimi, Lowalangi si lö faröi, samalua buʼusa linia, ba sangoromaʼö faʼomasi si lö faröi ba niha sangomasiʼö yaʼia ba soloʼö oroisania, irugi zi saribu ngaʼötö.+
10 Hizaʼi, ihori niha si fatuwu khönia.+ Iʼanemaiʼö ihuku niha si fatuwu khönia ba isulöni nifaluara.
11 Börö daʼö, miʼoʼö goroisania soroi ba dödö, amakhoita hegöi angetula huku nifaʼemagu khömi maʼökhö andre. Miʼoʼö daʼö fefu.
12 ”Na lö miböhöli wamondrongo angetula huku andre, na miʼoʼö ba mifalua ia, lö tebulö ifalua mbuʼusa linia Yehowa ba iforomaʼö waʼomasi si lö faröi simane si no möi ia ba hölu khö ndra tuami.
13 Iʼomasiʼö ami ba ifahowuʼö irege ato sibai ami. Iʼoyaʼö ngaʼötömi+ ba fahöna khömi mbua danö, bua nowi, agu si bohou, fanikha,+ simanö göi nono zawi ba biri-biri ba danö nifabuʼunia khömi si no möi ia ba hölu khö ndra tuami.+
14 Yaʼami dania wondrege nifahowuʼö moroi ba gotalua soi böʼö,+ ba samösa lö si lö ono, he ira matua hegöi ira alawe awö gurifömi.+
15 Iheta khömi Yehowa fefu ngawalö wökhö. Fökhö sataʼu ami si no miʼila ba danö Miserai,+ ba lö ifalua khömi daʼö, ha ba niha si fatuwu khömi.
16 Mihori fefu soi nibeʼe Yehowa Lowalangimi khömi.+ Böi mihakhösi tödö wamaigi yaʼira+ ba böi mifosumange lowalangira,+ börö me tobali tandrawa khömi daʼö.+
17 ”Te miwaʼö tödömi wa abölö ato soi böʼö moroi khömi ba tebai mifofanö ira.+
18 Böi miʼataʼufi ira.+ Mitörö tödömi nifalua Yehowa Lowalangimi ba zi sagörö tanö Miserai hegöi khö Waraʼo.+
19 Böi olifu ami wanguhuku* sabölö-bölö niʼilami, tandra sahöli-höli dödö+ hegöi tanga sabölö ba taʼionia sebua kuaso* niʼogunaʼö Yehowa Lowalangimi ba wangeheta yaʼami moroi ba daʼö.+ Daʼö göi dania nifalua Yehowa Lowalangimi ba soi sataʼu ami.+
20 Yehowa Lowalangimi dania zametaʼu yaʼira irege ahori niha si toröi+ ba saminiʼö yaʼira.
21 Böi miʼataʼufi ira börö me Yehowa Lowalangimi zi fao khömi,+ Lowalangi sabölö ba sahöli-höli dödö.+
22 ”Hasambalö izara-zara wamofanö soi daʼa fönami Yehowa Lowalangimi. Böi miʼanemaiʼö mihori ira,+ enaʼö lö monönö waʼoya gutu ndruʼu ba mbenua ba tobali famaʼalami.
23 Ibeʼe ira ba dangami Yehowa Lowalangimi ba mikalaisi ira irege aseʼe ba danö.+
24 Ibeʼe ba dangami+ razora andrö ba taya döira mibeʼe ba gulidanö.+ Samösa lö si tola molawa yaʼami+ irege ahori ira mibeʼe.+
25 Mitunu nadu nifoe khöra famaedo lowalangira.+ Böi miʼisö mazui mihalö khömi ganaʼara awö wirö,+ enaʼö lö teʼala ami ba daʼö fefu, börö me niʼogorofi Yehowa Lowalangimi daʼö.+
26 Böi miʼohe ba nomomi fefu zi raʼiö, yaʼia daʼö ngawalö zinangea muhori, enaʼö böi simane daʼö ami. Sökhi na miʼogorofi ba fatuwu ami ba daʼö, börö me sinangea muhori daʼö fefu.
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”yaʼia daʼö ono mbanua niʼomasiʼönia”.
^ Mazui ”ba nomo”.
^ Sin.: ”taʼionia si no ifadölö”.
^ Mazui ”wanandraigö”.
