5 Moze 8:1-20
8 ”Böi zi lö mifalua fefu goroisa nifaʼemagu khömi maʼökhö enaʼö auri ami+ ba monönö waʼatomi. Möi dania ami ba mirabu danö nifabuʼu Yehowa si no möi ia ba hölu khö ndra tuami.+
2 Mitörö tödömi me mofanö ami sagötö zi 40 fakhe ba danö si mate,+ me iʼohe ami Yehowa Lowalangimi. Wa ifalua daʼö enaʼö so khömi wangide-ngideʼö hegöi ba wamareso tödömi,* hadia miʼoʼö goroisania mazui löʼö.+
3 Andrö wa ifahaʼö ami enaʼö so khömi wangide-ngideʼö, itehegö olofo ami+ ba ibeʼe ömi mana,+ ö si lö irai miʼila, simanö göi ndra tuami, enaʼö aboto ba dödömi wa tenga ha ba gönia* auri niha, hizaʼi ba ngawalö li si otarai mbawa Yehowa.+
4 Lö tekiko mbaru nifakemi, ba lö abao gahemi sagötö zi 40 fakhe.+
5 Aboto ba dödömi me ibeʼe khömi wotu Yehowa Lowalangimi khömi, hulö na mofönu nama ba ndraononia.+
6 ”Miʼoʼö goroisa Yehowa Lowalangimi, mitörö lalania ba miʼataʼufi ia.
7 Börö me iʼohe ami Yehowa Lowalangimi ba danö si sökhi,+ tanö soya ungo nidanö, umbu nidanö, ba lulu nidanö si numalö ba ndraso hegöi ba mbanua si so ba hili.
8 Ba danö daʼö oya sibai gandru, barli, agu, bua ara, bua dalimo,+ fanikha zaitu ba wewani.+
9 Lö göna ami lofo ba daʼö ba lö ambö ami hadia ia. Mosiʼöli fefu gara ba daʼö ba misöndra tembaga na mikhao hili.
10 ”Me no abuso ami wemanga ba misuno Yehowa Lowalangimi börö danö si sökhi andrö nibeʼenia khömi.+
11 Böi olifu ami Yehowa Lowalangimi, ba böi zi lö mifalua goroisania, angetula hukunia, ba amakhoitania nifaʼemagu khömi maʼökhö andre.
12 Me no abuso ami wemanga ba mifazökhi khömi nomo si sökhi ba toröi ami ba daʼö,+
13 ba monönö waʼoya gurifömi, firö hegöi anaʼami, ba fahöna gokhötami,
14 böi fayawa ami+ ba böi miʼolifugö Yehowa Lowalangimi si no mangeheta yaʼami ba danö Miserai, nahia* wangosawuyu yaʼami.+
15 No ituturu lalami me mitörö danö si mate sebolo ba sataʼu ami,+ soya ulö sobiso awö dongo, tanö soköli ba si lö idanö. Iʼasogö nidanö moroi ba gara sabeʼe,+
16 ba ibeʼe ömi mana+ ba danö si mate, ö si lö irai laʼila ira tuami, enaʼö so khömi wangide-ngideʼö+ hegöi ba wamareso tödömi,* irege misöndra waʼauri ba zi so miföna.+
17 Na mimane tödömi, ’Usöndra waʼakayo daʼa börö waʼapade ba faʼabölögu samösa,’+
18 böi olifu ami wa Yehowa Lowalangimi zameʼe khömi faʼabölö enaʼö misöndra waʼakayo.+ Wa ifalua daʼö enaʼö alua zi no ifabuʼu khö ndra tuami si no möi ia ba hölu, ba ifalua daʼö irugi maʼökhö.+
19 ”Na olifu ami Yehowa Lowalangimi ba miʼoʼö lowalangi tanö böʼö irege mangalulu ami ba mituhi danö fönara, ufangelama ami maʼökhö, hasambalö mate ami.+
20 Ihori ami Yehowa, simane fangohorinia soi tanö böʼö fönami börö me lö mifondrondrongo wehede Yehowa Lowalangimi.+
Nisura ba gahe zura
^ Mazui ”ba wanandraigö yaʼami enaʼö iʼila nösi dödömi”.
^ Mazui ”roti”.
^ Mazui ”omo”.
^ Mazui ”ba wanandraigö yaʼami enaʼö iʼila nösi dödömi”.
