5 Moze 9:1-29
9 ”Yaʼami Izaraʼeli, mifondrondrongo. Maʼökhö andre, miʼötö Nungo Nidanö Yoridano+ ba weʼamöi morabu banua sebua ba sabölö moroi khömi.+ So ba daʼö mbanua si no mufoʼöli sirugi mbanua si yawa,+
2 egebua niha ira ba daʼö ba agalawa, ngaʼötö Genaki.+ No mirongo ba miʼila samösa, wa lö hadöi si tola molawa ngaʼötö Genaki.
3 Börö daʼö, moguna aboto ba dödömi maʼökhö andre wa Yehowa Lowalangimi zi so fönami.+ Yaʼia andrö amaedola galitö si manga hadia ia.+ Ifakiko ba ikalaisi ira ba zanehe ami enaʼö tola mifofanö ba mihori ira, simane nifabuʼu Yehowa khömi.+
4 ”Ba ginötö ifofanö ira fönami Yehowa Lowalangimi, böi mimane tödömi, ’Börö me no ufalua zatulö, andrö wa iʼohe ndraʼo Yehowa ba danö daʼa enaʼö urabu.’+ Wa ifofanö soi daʼa fönami Yehowa börö me si lö sökhi nifaluara.+
5 Wa mirabu danö daʼa tenga börö me no mifalua zatulö mazui börö waʼadölö dödömi. Wa ifofanö ira Yehowa Lowalangimi börö me si lö sökhi nifalua soi daʼa,+ ba ifalua göi Yehowa hölunia si no ifabuʼu khö ndra tuami Aberahamo,+ Izaʼaki+ ba Yakobo.+
6 Börö daʼö, moguna aboto ba dödömi wa ibeʼe khömi danö daʼa Yehowa Lowalangimi, tenga börö me no mifalua zatulö. Yaʼami andrö soi sabeʼe högö.*+
7 ”Mitörö tödömi ba böi olifu ami me so ami ba danö si mate,+ wa no miʼandrö wönu Yehowa Lowalangimi. Iʼotarai me aheta ami ba danö Miserai irege ofeta ami ba nahia daʼa, no milawa Yehowa.+
8 No miʼandrö wönu Yehowa me so ami ba Horebi, irege mofönu sibai Yehowa khömi ba edöna ihori ami.+
9 Me möi ndraʼo ba hili daʼö ba wanema ngaʼörö gara,+ yaʼia daʼö ngaʼörö gara si so buʼusa li Yehowa nibeʼenia khömi,+ ba lö mofanö ndraʼo ba hili andrö 40 ngaluo ba 40 wongi.+ Maʼifu lö si manga ndraʼo ba lö nibadugu idanö.
10 Aefa daʼö, ibeʼe khögu gara si dua ngaʼörö andrö Yehowa si no isura faoma turunia. No tesura ba daʼö fefu daromali Yehowa nifaʼemania ba hili, moroi bakha ba galitö me owulo ami ba daʼö.+
11 Me no irugi 40 ngaluo ba 40 wongi, ibeʼe khögu gara si dua ngaʼörö andrö Yehowa, yaʼia daʼö ngaʼörö gara si so buʼusa li.
12 Ba imane khögu Yehowa, ’Aliokö, angawuli mitou, börö me no lafalua zi lö sökhi+ soi niʼohemö andrö moroi ba danö Miserai. Alio sibai laholeʼö ira moroi ba lala niʼoroisigu khöra enaʼö laʼoʼö. No lafazökhi khöra nadu moroi ba loga.’+
13 Imane nasa Yehowa, ’Uʼila wa sabeʼe högö* soi daʼa.+
14 Böi taha ndraʼo. Uhori dania ira ba taya döira ba gulidanö. Abölö sökhi na ngaʼötöu nibaliʼögu soi sebua ba sabölö moroi khöra.’+
15 ”Ba möido mitou moroi ba hili hewaʼae na lö si mate galitö ba hili daʼö,+ ba so ba dangagu dua ngaʼörö gara fawuʼusa li.+
16 Ba uʼila wa no mifalua horö föna Yehowa Lowalangimi! No mifazökhi khömi nadu* famaedo nono zawi. Alio sibai miholeʼö ami moroi ba lala niʼoroisi Yehowa.+
17 Börö daʼö, utiboʼö tou gara si dua ngaʼörö andrö nigogohegu irege muzawili föna hörömi.+
18 Aefa daʼö, mangalulu ndraʼo föna Yehowa 40 ngaluo ba 40 wongi simane si oföna. Lö manga ndraʼo ba lö ubadu nidanö+ börö horö awö zi lö sökhi nifaluami föna Yehowa irege afökhö dödönia.
19 Sindruhu-ndruhu ataʼu ndraʼo börö me mofönu sibai Yehowa+ irege edöna ihori ami. Hizaʼi, ifuli zui ifondrondrongo wehedegu Yehowa me luo daʼö.+
20 ”Mofönu sibai Yehowa khö Gaʼaroni irege edöna ibunu,+ hizaʼi uʼandrö khönia me luo daʼö enaʼö lö mate göi Gaʼaroni.
21 No mifalua horö börö me no mifazökhi khömi nadu famaedo nono zawi andrö.+ Daʼö mbörö wa uhalö, utunu ba ufakiko irege tobali gawu-gawu. Aefa daʼö, utiboʼö nawunia ba nungo nidanö sangele moroi ba hili.+
22 ”Inönö nasa ba Dabera,+ ba Masa,+ ba Giberoti-hataʼawa,+ mofönu zui Yehowa mibeʼe.
23 Me iʼoʼou ami Yehowa wofanö moroi ba Gadesi-mbarenea+ ba me imane, ’Miʼaeʼe ba mirabu danö nibeʼegu khömi dania!’ ba mifuli zui milawa goroisa Yehowa Lowalangimi ba daʼö.+ Lö mamati ami+ khönia ba lö miʼoʼö niwaʼönia.
24 Iʼotarai me awena uʼila ami, no milawa Yehowa.
25 ”Börö daʼö, lö uböhöli mangalulu khö Yehowa 40 ngaluo ba 40 wongi.+ Wa ufalua daʼö börö me iwaʼö Yehowa edöna ihori ami.
26 Ubörögö wangandrö khö Yehowa, ’He Yehowa Lowalangi Fondrege Zalawa, böi hori nono mbanuamö. Yaʼira andrö okhötau,+ si no öhöli ba waʼabölömö ba no öheta ira moroi ba danö Miserai faoma tangau sabölö.+
27 Törö tödöu genonimö Aberahamo, Izaʼaki ba Yakobo.+ Böi faigi waʼabeʼe högö soi daʼa awö ngawalö horö ba si lö sökhi nifaluara.+
28 Lamane dania niha mbanua niröima andrö me no öheta ndraʼaga: ”Tebai iʼohe ira Yehowa ba danö si no ifabuʼu. Fatuwu ia khöra, daʼö mbörö wa iheta ira ba danö Miserai ba wamunu yaʼira ba danö si mate.”+
29 Yaʼira andrö ono mbanuau ba okhötamö+ si no öʼorifi ba waʼabölöu sebua ba taʼiomö sebua kuaso.’+
Nisura ba gahe zura
^ Sin.: ”sabeʼe börö tuʼi”.
^ Sin.: ”sabeʼe börö tuʼi”.
^ Mazui ”nadu nifazökhi moroi ba loga”.
