Famaʼeleʼö Nitema Yohane 21:1-27
21 Aefa daʼö, uʼila mbanua si bohou ba tanö si bohou.+ Noa sa numalö mbanua hegöi ulidanö siföföna,+ ba lö hadöi asi+ saʼae.
2 Uʼila göi Yeruzalema si Bohou, banua niʼamoniʼö si otarai zorugo, yaʼia daʼö moroi khö Lowalangi.+ No muhaogö mbanua andre hulö niʼowalu si no mufonukha ba wanemaʼö marafule si tobali foʼomonia.+
3 Urongo li siʼao moroi ba dadaoma andrö imane, ”So nose Lowalangi ba gotalua niha. Ba mowanua ia khöra ba tobali banuania ira. Ba fao khöra Lowalangi.+
4 Iʼosi dawa hörö fefu ba höröra.+ Lö hadöi saʼae faʼamate,+ faʼabu dödö, fege-ege, mazui fökhö,+ me no numalö ziföföna andrö.”
5 Imane si dadao ba dadaoma+ andrö, ”Hiza! Ubohouni fefu hadia ia.”+ Imane nasa, ”Sura daʼa börö me atulö ba tola mufaduhusi tödö wehede andre.”
6 Aefa daʼö imane khögu, ”No numalö fefu daʼö! Alafa ndraʼo ba Omega,* böröta ba amozua.+ Ba zowökhi tödö ubeʼe nidanö moroi ba gumbu fangorifi, lö muʼandrö mböli.+
7 Haniha zi möna daʼö zanema ondröita andrö. Ba tobali Lowalangira ndraʼo ba onogu göi ira.
8 Hizaʼi, niha sadaʼu-daʼu, si lö mamati,+ si raʼiö ba sanuzu dödö niha, samunu niha,+ sohorö-horö,*+ si fakelemu, sanömba adu, ba fefu niha si falimo,+ tetiboʼö ira ba mbaho alitö si hola-hola safönu balera.+ Eluahania daʼa faʼamate si mendrua.”+
9 Aefa daʼö, tohare samösa moroi ba gotalua ndra malaʼika si dafitu, no iʼohe mako si fitu ngawua andrö safönu fitu ngawalö wamakao safuria.+ Imane khögu, ”Aine, daʼuforomaʼö khöu niʼowalu si tobali foʼomo Nono Mbiri-biri.”+
10 Si fao eheha niʼamoniʼö, iʼohe ndraʼo ba hili sebua ba salawa. Iforomaʼö khögu Yeruzalema, banua niʼamoniʼö si otarai zorugo, yaʼia daʼö moroi khö Lowalangi.+
11 Lakhömi mbanua daʼö hulö lakhömi Lowalangi.+ Takile hulö gara sebua böli, simane kara yasibi sohaga hulö zörömi si takile.+
12 Alawa sibai göli mbanua andrö. So 12 mbawa gölinia, ba 12 göi ndra malaʼika zanaro. No tesura döi ndraono Gizaraʼeli si 12 mado ba mbawa gölinia andrö.
13 So tölu mbawa göli tanö ba gatumbukha, tölu mbawa göli tanö yöu, tölu mbawa göli tanö raya, ba tölu mbawa göli tanö ba gaekhula.+
14 So 12 gara wondrasi ba göli mbanua andrö ba no tesura döi zi 12 sinenge+ Nono Mbiri-biri yawa ba detenia.
15 Malaʼika si fahuhuo khögu no igogohe döla zukhu fanuʼa moroi ba ganaʼa ba wanuʼa banua andrö, bawa göli, ba ölinia.+
16 Banua andrö niʼoʼöfa sagi, fagölö waʼanau ba faʼebolonia. Aefa daʼö, isuʼa mbanua andrö faoma töla zukhu fanuʼa. Fagölö waʼanau, faʼebolo, ba faʼalawania, yaʼia daʼö mato 2.220 kilometer.*
17 Isuʼa göli andrö ba tesöndra mato 64 meter.* Fanuʼa niʼogunaʼö malaʼika andrö fagölö ira wanuʼa niʼogunaʼö niha.
18 Tefazökhi gölinia moroi ba gara yasibi,+ ba tefazökhi mbanua andrö moroi ba ganaʼa si sökhi, hulö zörömi si takile.
19 Fondrasi göli mbanua andrö tefazökhi moroi ba ngawalö feremata: si oföna moroi ba gara yasibi, si dua safiro, si tölu kalisedo, si öfa zamurudi,
20 si lima una, si önö saradi, si fitu kirisoli, si walu beri, si siwa tofa, si fulu khirisofarasi, si felezara lazuadi, ba si felendrua kazubu.
21 Bawa göli si 12 andrö yaʼia daʼö 12 mutiara. Ero sambua bawa göli sambua mutiara. Lala sebua ba mbanua andrö moroi ba ganaʼa si sökhi si hulö zörömi si takile.
22 Lö niʼilagu wa so gosali ba mbanua andrö, börö me osalinia yaʼia daʼö Lowalangi Yehowa* Fondrege Zabölö,+ hegöi Ono Mbiri-biri.
23 Lö moguna ihagaini mbanua andrö sino mazui baŵa. Lakhömi Lowalangi daʼö zi tobali haga,+ ba Ono Mbiri-biri zi tobali fandrunia.+
24 Haga mbanua andrö isului lala nitörö ngawalö soi.+ Ba laʼasogö lakhömi ba mbanua andrö ira razo ba gulidanö.
25 Lö mukusi mbawa gölinia ba zi maʼökhö, börö me lö hadöi si bongi.+
26 Teʼohe ba mbanua andrö lakhömi awö zumange moroi ba ngawalö soi.+
27 Tebai tefaʼamöi ba daʼö ngawalö zi raʼiö ba gofu haniha zi falimo ba samalua ngawalö zogoro niha.+ Ha si no tesura töi ba gölu-gölu zura wangorifi niʼokhögö Nono Mbiri-biri zi tola möi ba daʼö.+
Nisura ba gahe zura
^ Mazui ”A ba Z”. Alafa ba Omega yaʼia daʼö hurufo siföföna ba safuria ba abjad Yunani.
^ Faigi duho ”Fohorö” ba Geluaha Ngawua Wehede.
