Hagaʼi 1:1-15
1 Me no dua fakhe mamatörö Razo Dario, ba ngaluo si oföna ba mbaŵa si önö, ibeʼe gangilata Yehowa khö Hagaʼi*+ samaʼeleʼö enaʼö ifaʼema khö gubernur Yehuda yaʼia daʼö Serubabeli+ ono Zelatieli ba khö Gere Sebua sotöi Yosua ono Yosadaki. Imane:
2 ”Daʼa niwaʼö Yehowa samatörö saradadu zorugo: ’Lamane niha, ”Tenga inötönia iadaʼa ba wamazökhi omo* Yehowa.”’”+
3 Ifuli zui mohede Yehowa khö Hagaʼi samaʼeleʼö,+
4 ”Hadia inötönia iadaʼa toröi ami ba nomomi nifazökhi moroi ba geu si sökhi me no adudu nomogu?+
5 Daʼa niwaʼö Yehowa samatörö saradadu zorugo: ’Mifaigi-faigi hadia nifaluami.
6 Oya danömö zinanö nitarumi, hizaʼi ha maʼifu mibasi.+ Manga ami ba lö abuso. Mibadu hadia ia ba lö döhö waʼowökhi dödömi. Mifake nukha ba lö aetu mirasoi waʼoʼafu. Mohalöwö ami ba miʼiröʼö gazimi ba kofe-kofe si no atöla.’”
7 ”Daʼa niwaʼö Yehowa samatörö saradadu zorugo: ’Mifaigi-faigi hadia nifaluami.’
8 ”Imane Yehowa, ’Aeʼe ba hili ba halö geu.+ Fazökhi nomogu+ enaʼö omuso dödögu ba tefolakhömi ndraʼo.’”+
9 ”Imane Yehowa samatörö saradadu zorugo, ’Omasi ami na oya mitema mbua nowimi, hizaʼi ha maʼifu mitema. Miʼohe daʼö ba nomo, hizaʼi uwuwusi irege taya.+ Hana wa ufalua daʼö? Börö me hatö adudula nomogu, ba no arörö ami ba wangehaogö omomi.+
10 Andrö wa lö saʼae uʼasogö khömi namo mbanua, ba itaha mbuania tanö.
11 Lö ubato wangaʼasogö khömi baŵa lökhö irege oköli danö awö hili, alö mbua zinanö, agu, fanikha ba sinanö tanö böʼö. Tefakao ami hegöi urifömi, ba zaya-zaya gölö waʼerege dödömi.’”
12 Serubabeli+ ono Zelatieli,+ Ere Sebua sotöi Yosua ono Yosadaki+ awö nono mbanua soi daʼö maʼafefu, laʼoʼö niwaʼö Yehowa Lowalangira hegöi fehede Hagaʼi samaʼeleʼö börö me no ifatenge ira Yehowa Lowalangira. Ibörögö laʼataʼufi Yehowa.
13 Simane niwaʼö Yehowa, ifaʼema goroisa daʼa Hagaʼi ba nono mbanua sato börö me no tobali ia tenge-tenge Yehowa: ”Imane Yehowa, ’Hasambalö faodo khömi.’”+
14 Andrö ifarou Yehowa dödö+ gubernur Yehuda+ sotöi Serubabeli ono Zelatieli hegöi Yosua+ ono Yosadaki ere sebua awö nono mbanua sato. Lafazökhi nomo Lowalangira Yehowa samatörö saradadu zorugo.+
15 Alua daʼa ba ngaluo si 24 ba mbaŵa si önö, me no dua fakhe mamatörö Razo Dario.+
