Hagaʼi 2:1-23
2 Ba mbaŵa si 7, ba ngaluo si 21 ba mbaŵa daʼö, imane Yehowa khö Hagaʼi samaʼeleʼö,+
2 ”Sofu khö gubernur Yehuda+ sotöi Serubabeli+ ono Zelatieli awö gere sebua sotöi Yosua+ ono Yosadaki+ hegöi ba soi daʼö maʼafefu:
3 ’Haniha ba gotaluami zi no irai mangila hewisa waʼasökhi nomogu* me föna?+ Hewisa wamaigimi iadaʼa? Na mifaehusi, hadia tenga abölö sökhi nomogu me föna?’+
4 ”’Aroʼö dödöu yaʼugö Serubabeli,’ iwaʼö Yehowa, ’ba aroʼö dödöu yaʼugö ere sebua sotöi Yosua ono Yosadaki.’
”Imane Yehowa, ’He yaʼami ono mbanua soi daʼa,+ miʼaroʼö dödömi ba miʼohalöwö.’
”’Börö me fao ndraʼo khömi,’+ iwaʼö Yehowa samatörö saradadu zorugo.
5 ’Mitörö tödömi mbuʼusa ligu me aheta ami ba danö Miserai,+ ba lö aetu ubeʼe khömi geheha niʼamoniʼö ba wanuturu lalami.+ Böi miʼataʼufi.’”+
6 ”Daʼa niwaʼö Yehowa samatörö saradadu zorugo: ’Ba zi lö ara tö, ufuli ufaheu sakali tö mbanua si yawa, ulidanö, asi awö danö.’+
7 ”Imane Yehowa samatörö saradadu zorugo, ’Ufaheu dania ngawalö soi, ba möi bakha ba nomo andre fefu gama-gama sebua böli moroi ba ngawalö soi.+ Ufönui nomo daʼa lakhömigu.’+
8 ”’Okhötagu wirö ba okhötagu ganaʼa,’ iwaʼö Yehowa samatörö saradadu zorugo.
9 ”’Abölö ebua dania lakhömi nomo daʼa moroi ba zilalö,’+ iwaʼö Yehowa samatörö saradadu zorugo.
”’Uʼasogö waʼohahau dödö ba nahia daʼa,’+ iwaʼö Yehowa samatörö saradadu zorugo.”
10 Ba ngaluo si 24 ba mbaŵa si 9 me no dua fakhe mamatörö Dario, mohede Yehowa khö Hagaʼi samaʼeleʼö,+
11 ”Daʼa niwaʼö Yehowa samatörö saradadu zorugo: ’Sofu khö ndra ere sanandrösa ba goroisa daʼa:+
12 ”Duma-dumania, so samösa niha solohe nagole niʼamoniʼö ba fatö-fatö mbarunia. Na göna mbarunia andrö ba roti, ba sup, ba nagu, ba wanikha mazui ba ngawalö gö tanö böʼö, hadia tobali niʼamoniʼö gö daʼö?”’”
Lamane ira ere, ”Löʼö!”
13 Aefa daʼö manofu Hagaʼi, ”Na so samösa niha si raʼiö si no mombambaya boto zi mate, hadia raʼiö gö daʼö na ibabaya?”+
Lamane ira ere, ”Tatu raʼiö.”
14 Andrö imane Hagaʼi, ”Daʼa niwaʼö Yehowa, ’Ba wamaigigu, simane daʼö zalua ba nono mbanua daʼa hegöi ba soinia. Simane daʼö göi halöwö dangara. Gofu hadia zumange nibeʼera, hasambalö raʼiö.’
15 ”’Hizaʼi, iʼotarai maʼökhö, mihaogö minehegö: Fatua lö mubörögö wamazökhi osali Yehowa mangawuli,+
16 hadia zalua khönia? Na so niha somasi mangai gandru si 20 fanuʼa, ha 10 fanuʼa zi so. Ba na so niha si möi ba naha wamera agu ba wangai si 50 fanuʼa, ha 20 fanuʼa zi so.+
17 Ubözi fefu halöwö dangami faoma faʼaukhu zino sabölö-bölö, fökhö zinanö+ hegöi teu esi. Hizaʼi, samösa lö sangawuli khögu,’ iwaʼö Yehowa.
18 ”’Mihaogö minehegö iʼotarai maʼökhö, yaʼia daʼö iʼotarai ba ngaluo si 24 ba mbaŵa si 9, me mifazökhi wondrasi gosali Yehowa.+ Minehegö daʼa:
19 Hadia so nasa danömö ba nahia wangiröʼö khömi?+ Hadia tenga lö sowua nasa mbua nagu, ara, dalimo hegöi zaitu? Iʼotarai maʼökhö, ubeʼe khömi howu-howu.’”+
20 Aefa daʼö, imane Yehowa khö Hagaʼi ba zi mendrua kali ba ngaluo si 24 ba mbaŵa daʼö,+
21 ”Fatunö khö gubernur Yehuda sotöi Serubabeli, ’Ufaheu dania mbanua si yawa awö danö.+
22 Ududugö dadaoma waʼarazo ba uhori waʼabölö gamatöröwa ba ngawalö soi.+ Ufalaula gureta wasuwöta awö zi dadao ba daʼö. Alabu kudo awö niha si fakudo ba faoma labunu nawöra ba mbawa wöda.’”+
23 ”Imane Yehowa samatörö saradadu zorugo, ’He yaʼugö enonigu Serubabeli+ ono Zelatieli,+ ba ngaluo daʼö dania uʼogunaʼö ndraʼugö.’ Imane Yehowa, ’Ubaliʼö ndraʼugö simane laeduru famotandro, börö me yaʼugö zi no ufili,’ iwaʼö Yehowa samatörö saradadu zorugo.”
Nisura ba gahe zura
^ Mazui ”gosaligu”.
