Halöwö Zinenge 23:1-35
23 Ifaigi ndra Sangetuʼö Huku, ba imane Faulo, ”Yaʼami ira talifusö, lö hadöi sinegu dödögu side-ide+ föna Lowalangi irugi maʼökhö.”
2 Me irongo daʼö ere sebua sotöi Anania, ifarou niha si zizio ba zinga Waulo enaʼö latafari mbawania.
3 Imane khönia Faulo, ”Hulö dowa ni-cat safusi ndraʼugö. Yaʼitafariʼö Lowalangi. Hadia modadao ndraʼugö ba wanguhuku yaʼo moloʼö Oroisa Moze ba ösawö göi goroisa daʼö me öfaböziʼö ndraʼo?”
4 Lamane niha si zizio ba zingania, ”Hadia öʼoʼaya gere sebua khö Lowalangi?”
5 Imane Faulo, ”Yaʼami ira talifusö, lö uʼila wa ere sebua ia. So ba zura, ’Böi miʼoʼaya zondröniaʼö ba soimi.’”+
6 Aboto ba dödö Waulo wa niha Sadukaiʼo ösa ndra Sangetuʼö Huku andrö ba tanö böʼönia Farizaiʼo. Börö daʼö imane, ”He ira talifusö, yaʼodo andre Farizaiʼo,+ ngaʼötö niha Warizaiʼo. Daʼö wa laʼetuʼö hukumagu maʼökhö börö wanötöna fanusugi niha si no mate.”
7 Börö wehedenia andrö ibörögö faʼudu ndra Farizaiʼo khö ndra niha Sadukaiʼo, irege fabali dödö zato.
8 Lamane ira Sadukaiʼo wa lö hadöi fanusugi niha si no mate, lö hadöi malaʼika mazui boto eheha, hizaʼi faduhu dödö ndra Farizaiʼo* wa so daʼö fefu.+
9 Alua waʼakaliru sabölö-bölö, ba mosindro ösa zangila amakhoita moroi ba agama Warizaiʼo, abeʼe wehedera lamane, ”Lö hadöi nisöndrama sala ba niha daʼa. Te so malaʼika mazui boto eheha zi fahuhuo khönia.”+
10 Börö me itugu abölö-bölö waʼakaliru, ataʼu gumandru andrö ma lakhökhö Waulo, andrö ifatenge zaradadunia ba wangeheta yaʼia moroi ba gotaluara ba iʼohe ba naha zaradadu.
11 Hizaʼi, bongi aefa daʼö, tohare Zoʼaya imane khö Waulo, ”Böi ataʼufi!+ Böi böhöli wamaduhuʼö ba Roma, simane famaduhuʼöu yaʼo ba Yeruzalema.”+
12 Sihulö wonginia, mamagölö ndra niha Yahudi ba fahölu ira* wa lö manga ba mamadu ira irege labunu Waulo.
13 Töra 40 niha ira zi no mamagölö weʼamöi ba hölu simane daʼö.
14 Möi ira khö ndra kafalo gere hegöi khö ndra sondröniaʼö lamane, ”No soroi ba dödöma weʼamöi ba hölu wa lö manga ndraʼaga irege mabunu Waulo.
15 Iadaʼa, yaʼami hegöi ira Sangetuʼö Huku, moguna miʼandrö khö gumandru andrö enaʼö iʼohe ia khömi ba daʼa, hulö na mihaogö wosekhegö salania. Hizaʼi, fatua lö irugi dania, no mahenaigö ndraʼaga wamunu yaʼia.”
16 So nono mbeneʼö Waulo ono matua si no mamondrongo niʼera-erara andrö. Möi ia bakha ba naha zaradadu ifatunö khö Waulo.
17 Aefa daʼö ikaoni samösa zaradadu Faulo imane, ”Ohe nono daʼa khö gumandru, so zomasi ifatunö.”
18 Iʼohe nono matua andrö khö gumandru ba imane, ”He Pa, no ikaoni ndraʼo Faulo, niha nitaha andrö ba wamasao ono daʼa, so zomasi ifatunö.”
19 Igogohe danga nono matua andrö kumandru isofu ba zi ha yaʼira, ”Hadia zomasi öfatunö?”
20 Imane, ”He Pa, no hasara dödö niha Yahudi ba wangandrö khöu enaʼö öʼohe Waulo mahemolu föna ndra Sangetuʼö Huku, hulö omasi ira nasa laʼila hadia zalania.+
21 Hizaʼi böi oʼö niwaʼöra, börö me töra 40 niha zi no mombaloi ba wamunu yaʼia ba no möi ira ba hölu wa lö manga ba lö mamadu ira irege labunu Waulo.+ Iadaʼa no lafaʼanö ira ba labaloi wehedemö.”
22 Aefa daʼö, iwaʼö khönia kumandru enaʼö mangawuli ia ba ifangelama, ”Böi ombakhaʼö wa no öfatunö khögu daʼa.”
23 Ikaoni darua ndra saradadu imane khöra, ”Mihenaigö 200 zaradadu si möi ba Kaisarea, ba 70 zaradadu si fakudo, ba 200 zaradadu solohe toho, bözi siwa* bongi daʼa.
24 Henaigö göi kudo khö Waulo, ba wamasao yaʼia khö Gubernur Felisi enaʼö lö teʼala ia ba lala.”
25 Aefa daʼö isura zurania kumandru andrö imane,
26 ”Moroi khö Kalaudio Lisia, khö nifosumange, Gubernur Felisi: Yaʼahowu!
27 No laraʼu niha daʼa ira niha Yahudi ba arakhagö labunu, hizaʼi iʼanemaiʼö tohare ndraʼo fao ndra saradadugu ba wanolo yaʼia+ börö me urongo wa niha Romawi ia.+
28 Börö me omasido uʼila hadia sibai mbörö wa lagohi ia, uʼohe ia föna Zangetuʼö Huku.+
29 Na ufaigi niböbögöra khönia andre, moʼamakhaita ba Goroisa Moze khöra,+ ba lö hadöi sala nifaluania si tobali famununia mazui enaʼö labeʼe ia ba gurunga.
30 Hizaʼi, börö me so zamatunö khögu si lö sökhi niʼera-era ndra niha daʼa,+ andrö wa ufatenge ia khöu, ba no uwaʼö göi ba niha samobahulu yaʼia enaʼö khöu lafatunö.”
31 Börö daʼö lahalö Waulo ira saradadu,+ simane si no mufaretakö ba laʼohe ia khö Gandrifati bongi daʼö.
32 Mahemolunia, latehegö fao khö Waulo ndra saradadu si fakudo ba wanohugö fofanö, ba tanö böʼönia mangawuli ira ba nahiara.
33 Larugi Kaisarea ira saradadu si fakudo ba labeʼe zura daʼö khö Gubernur. Laʼohe göi Waulo fönania.
34 Ibaso ba manofu ia moroi ba provinsi hezo iʼotarai. Awena iʼila wa moroi ba Gilikia iʼotarai Faulo.+
35 Imane khönia gubernur, ”Ufareso dania farakaromö andre, na no tohare zoʼangadugö yaʼugö.”+ Aefa daʼö, iʼandrö enaʼö lataha Waulo ba gödo Herode.
Nisura ba gahe zura
^ Mazui ”ladunö-dunö misa ba niha”.
^ Sin.: ”laʼelifi samösa ira”.
^ Sin.: ”ba ginötö si medölu”.
