Halöwö Zinenge 24:1-27
24 Lima hari aefa daʼö, tohare gere sebua sotöi Anania,+ fao ira zondröniaʼö niha Yahudi ba samösa zi fahuhuo föna zato* sotöi Teretulo. Aefa daʼö, lafatunö khö Gubernur hadia manö niböbögöra khö Waulo.+
2 Me no lakaoni ia, ibörögö Teretulo wamobahulu Faulo imane,
”No öbeʼe khöma waʼohahau dödö sebua Pa, ba oya sibai zi sökhi nifaluamö ba soi daʼa börö waʼasökhi gera-eramö.
3 Lö tebulö mafaduhuʼö daʼa gofu hezo so ndraʼaga. Maʼandrö sibai saohagölö khöu, Yaʼugö Nifosumangema Felisi.
4 Enaʼö lö oya ahori ginötöu, uʼandrö khöu fondrondrongo niwaʼöma sabata manö.
5 Maʼila niha daʼa wa tuka zamobörö fangala.+ Ifaweʼe fefu niha+ Yahudi ba zi sagörö ulidanö ba yaʼia zangagö föna ba agama niha Nazareta.+
6 Itandraigö göi itaʼunöisi gosali, andrö wa maraʼu ia.+
7 * ——
8 Na ösekhegö ia dania, ba daʼö öʼila wa atulö fefu niwaʼöma andre.”
9 Me larongo daʼö ira niha Yahudi, hasara dödöra fefu ba wamaduhuʼö niböbögöra andrö khönia.
10 Me ifahökö ia gubernur enaʼö fahuhuo Waulo, imane Faulo iadaʼa,
”Börö me uʼila wa no hauga fakhe tobali ndraʼugö sanguhuku ba soi daʼa, omasido ubuʼa ba hulugu.+
11 Simane si no öʼila, lö irugi 12 hari ba zilalö, möido ufosumange Lowalangi ba Yeruzalema,+
12 ba lö irai laʼila fabuʼa-buʼa ndraʼo ba gosali mazui ufobörö wangala, he ba nahia waʼowulo* simanö göi ba nahia tanö böʼö.
13 Lö hadöi si tobali dane-dane wa atulö niwaʼöra me lafobahulu ndraʼo.
14 Hizaʼi, ufaduhuʼö khöu wa ufalua halöwö niʼamoniʼö khö Lowalangi ndra tuagu,+ tefaudu ba lala waʼauri nifotöira ’agama’, börö me faduhu dödögu fefu zi so ba Goroisa Moze hegöi Nisura Ndra Samaʼeleʼö.+
15 So göi wanötönagu khö Lowalangi, simane niʼokhögö ndra niha daʼa wa so wanusugi niha si no mate,+ he satulö he si lö atulö.+
16 Börö daʼö, uforege enaʼö lö itegu ndraʼo tödögu side-ide föna Lowalangi ba föna niha.+
17 Hauga fakhe aefa daʼö, möi ndraʼo wolohe tolo-tolo+ ba soigu hegöi ba wameʼe sumange khö Lowalangi.
18 Me ufalua daʼö fefu, laʼila ndraʼo me ufalua gowasa fangamoniʼö boto ba gosali,+ hizaʼi lö hadöi niha sato ba lö kaliru. So ba daʼö ösa niha Yahudi moroi ba Provinsi Asia,
19 sindruhunia so ira fönau iadaʼa menaʼö ba wamobahulu yaʼo na sindruhu so zalagu khöra.+
20 Mazui, beʼe ginötö khö ndra niha daʼa ba wangombakha hadia zalagu me luo daʼö, me laʼohe ndraʼo föna Zangetuʼö Huku.
21 Ha sambua zi tola lafobahulu yaʼo, yaʼia daʼö me mozizio ndraʼo fönara ba umane, ’Laʼetuʼö hukumagu maʼökhö andre börö wanötöna fanusugi niha si no mate!’”+
22 Hizaʼi, me no aboto ba dödö Welisi Lala Zoʼaya,+ ifawuʼa ginötö wanguhuku ba imane, ”Na no tohare gumandru Lisia, ba daʼö uhalö gangetula ba warakaromi andre.”
23 Aefa daʼö, ibeʼe fareta khö ndra saradadu enaʼö lataha Waulo, hizaʼi latehegö khönia maʼifu na so nifaluania ba tola göi lafasao zoguna khönia ira awönia.
24 Hauga hari aefa daʼö, tohare Welisi fao ira woʼomonia Derusila niha Yahudi. Aefa daʼö ikaoni ba ifondrondrongo niwaʼö Waulo sanandrösa ba waʼafaduhu dödönia khö Keriso Yesu.+
25 Hizaʼi me itutunö Faulo sanandrösa ba gamuata satulö, fanaha tödö, fanguhuku ba zi so miföna,+ ifuli ataʼu Welisi ba imane, ”Ofanö ua sabata. Ufuli ukaoni ndraʼugö na so ginötö.”
26 Ba ginötö daʼö göi, itötöna wa ibeʼe khönia gefe Faulo. Andrö wa asese ikaoni ia ba omasi ia fahuo-huo.
27 Me no irugi dua fakhe, so wogati Felisi yaʼia daʼö Forokio Feso. Börö me omasi Welisi na laʼomasiʼö ia ira niha Yahudi,+ andrö wa itehegö lataha manö Waulo.
