Halöwö Zinenge 26:1-32
26 Imane Agerifa+ khö Waulo, ”Tebeʼe khöu ginötö fahuhuo.” Aefa daʼö ifazawa dangania Faulo ibörögö ibuʼa ba hulunia imane,
2 ”He Razo Agerifa, omuso dödögu me tanö fönau ubuʼa ba hulugu zi no laböbögö khögu ira niha Yahudi,+
3 mendrua manö me yaʼugö zabölö mangila si toʼölö lafalua ira niha Yahudi. Börö daʼö, uʼandrö khöu waʼebolo dödö ba wamondrongo fehedegu.
4 ”Sindruhunia, lala waʼaurigu iʼotarai me awuyu-wuyu ndraʼo ba soigu hegöi ba Yeruzalema, no anehe fefu ndra niha Yahudi+
5 si no ara mangila yaʼo. Na omasi ira, tola lafaduhuʼö wa Farizaiʼo ndraʼo mböröta+ moloʼö huku sabeʼe ba agama si so yaʼaga.+
6 Iadaʼa, lafezizio ndraʼo föna zanguhuku börö me utötöna mbuʼusa li Lowalangi nibeʼenia khö ndra tuama.+
7 Buʼusa li daʼa fagölö simane nidöna-döna zi 12 mado ba soima irege lafalua halöwö niʼamoniʼö khö Lowalangi bongi maʼökhö. Börö wanötöna daʼa wa lafobahulu ndraʼo ira niha Yahudi.+
8 ”Hana wa miwaʼö tebai isusugi Lowalangi niha si no mate?
9 Me mböröta, faduhu sibai dödögu wa lö tola löʼö uforege wolawa töi Yesu, niha Nazareta andrö.
10 Daʼö nifaluagu ba Yeruzalema. Ubeʼe ba gurunga niha niʼamoniʼö+ me no latehegö khögu ira kafalo gere,+ ba fao dödögu ba gangetula enaʼö labunu ira.
11 Asese ufakao ira ba nahia waʼowulo,* ufaso enaʼö laröi wamatira. Börö me fatuwudo sibai ira, andrö ufakao ba ugohi ira misa ba mbanua tanö böʼö.
12 ”Samuza maʼökhö, möido ba Ndramaseko börö me no labeʼe khögu zura hegöi kuaso ira kafalo gere.
13 Ba dalu lala me laluo, uʼila zi haga moroi ba mbanua si yawa, sabölö takile moroi ba haga luo, ihagaini ndraʼo hegöi si fao khögu.+
14 Alabu ndraʼaga fefu tou ba danö, ba urongo li si hede khögu ba li Heberaiʼo imane, ’He Saulo, he Saulo, hana wa öfakao ndraʼo? Na lö öbato wolawa yaʼo* ba marase ndraʼugö.’
15 Hizaʼi umane, ’Haniha ndraʼugö?’ Itema ligu, ’Yaʼodo Yesu, nifakaomö.
16 Ozizio, ufalukhaisi ndraʼugö börö me yaʼugö nifiligu tobali enoni ba samaduhuʼö, sanuriaigö sanandrösa khögu, he si no öʼila hegöi niforomaʼögu khöu dania.+
17 Uʼefaʼö ndraʼugö moroi ba soi daʼa hegöi ba soi böʼö, börö me yaʼo zamatenge yaʼugö khöra+
18 ba wamokai höröra,+ ba wangeheta yaʼira ba zogömi-gömi+ numalö ba haga,+ moroi ba waʼabölö Zatana+ numalö khö Lowalangi. Na mamati ira khögu, teʼefaʼö horöra+ ba latema gondröita si fao ira niha niʼamoniʼö.’
19 ”Andrö yaʼugö Razo Agerifa, uʼoʼö gangilata andrö moroi ba zorugo.
20 Oföna möido ba Ndramaseko,+ aefa daʼö ba Yeruzalema,+ ba zi sagörö Yudea, simanö göi ba soi böʼö, uturiaigö khöra enaʼö lafalalini gera-erara, ba lafuli ira khö Lowalangi wamalua bua-bua si sökhi tandra wamalalini era-era.+
21 Daʼö mbörö wa laraʼu ndraʼo ira niha Yahudi ba gosali ba edöna labunu ndraʼo.+
22 Börö me no urasoi wanolo moroi khö Lowalangi, irugi maʼökhö lö ubato wamaduhuʼö ba niha si toʼölö hegöi ba niha si tehöngö. Niʼombakhaʼögu ha si no alua moloʼö Nisura Ndra Samaʼeleʼö hegöi Nisura Moze+
23 wa itörö wamakao Keriso+ ba yaʼia zi oföna tesusugi moroi ba gotalua zi mate+ ba ituriaigö haga ba soi daʼa hegöi ba soi böʼö.”+
24 Lö nasa si tebato ibuʼa ba hulunia Faulo, muʼao Weso, ”Owöhö ndraʼugö Faulo! Talafo oya öfahaʼö ndraʼugö, daʼö mbörö wa owöhöʼö!”
25 Hizaʼi imane Faulo, ”He yaʼugö Feso nifosumange, lö owöhö ndraʼodo. Sindruhu wehedegu andre ba moloʼö fangera-ngera si sökhi.
26 Lö taha-tahagu wahuhuosa khö Razo, börö me aboto ba dödönia fefu daʼa. Faduhu dödögu wa ahori iʼila zalua andre börö me tenga ba nahia si tobini mufalua daʼa.+
27 He Razo Agerifa, hadia faduhu dödöu Nisura Ndra Samaʼeleʼö? Uʼila wa faduhu dödöu.”
28 Imane Agerifa khö Waulo, ”Lö ara tö, öbaliʼö ndraʼo niha Keriso.”
29 Imane Faulo, ”Manötöna ndraʼo khö Lowalangi ba waʼalio mazui ba waʼara, tenga ha yaʼugö Razo, hizaʼi fefu zamondrongo maʼökhö enaʼö tobali ira simane yaʼo, tenga nirate simane daʼa.”
30 Aefa daʼö mozizio Razo, simanö göi Gubernur, Berenike hegöi niha si dadao ba daʼö.
31 Mofanö ira ba faoma lamane, ”Lö hadöi sala nifalua niha daʼa si möi börö wamununia mazui ba wameʼe yaʼia ba gurunga.”+
32 Imane Agerifa khö Weso, ”Sindruhunia menaʼö, tola muʼefasi niha daʼa na lö iʼohe farakaronia khö Kaisaro.”+
