Halöwö Zinenge 3:1-26
3 Samuza maʼökhö me bözi tölu tanö owi,* möi ba gosali Wetero faoma Yohane yaʼia daʼö me inötö wangandrö.
2 So samösa ndra matua sombuyu-mbuyu töla iʼotarai me tumbu, no lafahea. Ero maʼökhö lafedadao ia ahatö ba mbawandruhö gosali yaʼia daʼö Bawa Göli si Sökhi, enaʼö tola iʼandrö dolo-tolo ba niha si möi bakha ba gosali.
3 Me iʼila möi bakha ba gosali Wetero faoma Yohane, iʼandrö khöra dolo-tolo.
4 Hizaʼi, latöngö ia ira Fetero faoma Yohane ba lamane, ”Faigi ndraʼaga.”
5 Itöngö ira si fao fanötöna wa labeʼe khönia dolo-tolo.
6 Imane khönia Fetero, ”Lö khögu anaʼa mazui firö, hizaʼi ubeʼe hadia zi so khögu. Ba döi Yesu Keriso niha Nazareta andrö, owaö-waö!”+
7 Igogohe dangania kambölö Fetero enaʼö mosindro niha daʼö.+ Iʼanemaiʼö abeʼe gahe awö ndroto-ndrotonia.+
8 Mosindro ia ba manaoka-naoka.+ Aefa daʼö, mofanö ia fao ira bakha ba gosali, ba manaoka-naoka ia, ifosumange Lowalangi.
9 Laʼila ia niha me mofanö-fanö ia ba ifosumange Lowalangi.
10 Aboto ba dödöra wa yaʼia andrö niha si dao-dao ba Mbawa Göli si Sökhi ba gosali ba wangandrö tolo-tolo.+ Ahöli-höli dödöra me laʼila zalua khönia.
11 Me iʼolembai nasa Wetero faoma Yohane niha daʼö ba Newali Nifosagö khö Zelomo,+ fagohi fefu niha ba wangondrasi yaʼira börö waʼatokeara.
12 Me iʼila daʼö imane Fetero, ”He yaʼami niha Gizaraʼeli, hana wa ahöli-höli sibai dödömi wamaigi daʼa? Hana wa mitöngö ndraʼaga simane daʼa, hulö na faʼabölöma mazui börö wamosumangema Lowalangi soroi ba dödö wa tola döhö niha andre?
13 Lowalangi Gaberahamo, Izaʼaki, Yakobo,+ Lowalangi ndra tuada, no ifolakhömi Genoninia+ sotöi Yesu,+ nitimbagömi ba nibeʼemi ba danga nudu,+ hewaʼae edöna iʼefasi ia Filato.
14 Mitimbagö niha niʼamoniʼö ba satulö andrö, ba miʼandrö enaʼö samunu niha nibeʼe khömi.+
15 Mibunu Zalawa waʼauri.+ Hizaʼi, ifuli isusugi ia Lowalangi moroi ba gotalua zi mate ba yaʼaga zangila.+
16 Börö döi Yesu ba börö me mamati ndraʼaga ba döinia, andrö wa döhö niha niʼilami andre. Famatima khö Yesu daʼö zamadöhö niha daʼa fönami.
17 Iadaʼa ira talifusö, faduhu dödögu wa mifalua daʼö börö me lö khömi faʼaboto ba dödö me föna,+ simane sondröniaʼö yaʼami.+
18 Börö zimanö, ifalua zi no iwaʼö ba zilalö Lowalangi nifaʼemania khö ndra samaʼeleʼö, yaʼia daʼö wa itörö wamakao Keriso.+
19 ”Andrö mifalalini gera-erami+ ba mifuli ami khö Lowalangi+ enaʼö teʼefaʼö horömi+ ba ohahau dödömi ibeʼe Yehowa,*
20 ba ifatenge Keriso si no ituyu andrö khömi, yaʼia daʼö Yesu.
21 Lö tebulö ia ba zorugo irege ifuli teʼazökhi fefu hadia ia simane niwaʼö Lowalangi khö ndra samaʼeleʼö niʼamoniʼö khönia me götö föna.
22 No irai iwaʼö Moze, ’Ituyu dania Yehowa* Lowalangimi samösa zamaʼeleʼö moroi ba soimi, samaʼeleʼö simane yaʼo.+ Lö tola löʼö mifondrondrongo niwaʼönia khömi.+
23 Haniha zi lö mamondrongo nifaʼema Zamaʼeleʼö andrö tehori ia ba gotalua nono mbanua Lowalangi.’+
24 Fefu ndra samaʼeleʼö iʼotarai Zamueli irugi ndra samaʼeleʼö aefa daʼö, lö labiniʼö wanuriaigö sanandrösa ba götö andre.+
25 Fahuhuo ndra samaʼeleʼö andrö sanandrösa ba mbuʼusa li Lowalangi khö ndra tuami me föna.+ Buʼusa li andrö manandrösa göi khömi, börö me no fawuʼu li Lowalangi khö Gaberahamo, ’Moroi ba maʼuwumö, tefahowuʼö fefu zongambatö ba gulidanö.’+
26 Me no ifataro Genoninia, oföna ifatenge ia khömi+ Lowalangi enaʼö mifalalini gera-erami moroi ba waʼalösökhimi andrö. Daʼa howu-howunia khömi.”
