Ba Niha Heberaiʼo 3:1-19
3 Börö daʼö yaʼami ira talifusö niʼamoniʼö, nikaoni ba zorugo,+ mifaigi zinenge hegöi ere sebua si no tafaduhuʼö yaʼia daʼö Yesu.+
2 Lö faröi ia khö Lowalangi samataro yaʼia,+ simane Moze me ihalö halöwö ba nomo Lowalangi.+
3 Andrö wa sinangea ebua itema* lakhömi+ moroi ba lakhömi nitema Moze, börö me abölö lafosumange zamazökhi omo moroi ba nomo andrö.
4 Fefu nomo ba so zamazökhi yaʼia, ba samazökhi fefu hadia ia ba yaʼia Lowalangi.
5 Lö faröi Moze me ifalua fefu halöwö ba nomo Lowalangi, ba tobali duma-duma* daʼö ba ngawalö zalua dania niforomaʼö ba gafuriata,
6 ba lö faröi Keriso si tobali Ono+ sondröniaʼö omo Lowalangi.+ Omo Lowalangi ita na lö alawö ita wahuhuosa ba na lö taböhöli wololohe fanötöna nisuno-sunoda.
7 Itörö niwaʼö geheha niʼamoniʼö yaʼia daʼö,+ ”Maʼökhö andre, na mifondrondrongo wehedegu,
8 böi miʼabeʼeʼö dödömi simane me abölö-bölö wönugu me tetandraigö ndraʼo ba danö si mate,+
9 me latandraigö ba lalawa ndraʼo ira tuami hewaʼae no laʼila fefu nifaluagu sagötö zi 40 fakhe.+
10 Daʼö mbörö wa uʼogorofi ira ba umane, ’Lö mamalö-malö waʼelungu dödöra ba lö aboto ba dödöra lalagu andrö.’
11 Andrö wa mofönu ndraʼo ba möido ba hölu, ’Tebai lakhamö ngaluo wolombasegu.’”+
12 Yaʼami ira talifusö, miʼangelama enaʼö böi so ba gotaluami zangokhögö tödö si lö sökhi ba sambö famati börö wangerogö Lowalangi sauri.+
13 Tobali, faoma mifarou dödö nawömi ero maʼökhö sagötö lö sawai nasa götö niwaʼö ”Maʼökhö andre”,+ enaʼö lö ba gotaluami zangabeʼeʼö tödönia börö walimosa horö andrö.
14 Tola tasöndra hadia nisöndra Keriso andrö, asala lö faröi ita irugi gamozua ba zi no tafaduhusi tödö iʼotarai wamobörö.+
15 Simane si no tesura, ”Maʼökhö andre, na mifondrondrongo wehedegu, böi miʼabeʼeʼö dödömi simane me abölö-bölö wönugu.”+
16 Haniha zamondrongo ba sangandrö fönunia sabölö-bölö? Hadia tenga saheta moroi ba danö Miserai andrö nidöniaʼö Moze?+
17 Baero daʼö, haʼökhö ogoro Lowalangi sagötö zi 40 fakhe?+ Hadia tenga khöra yaʼira samazökhi horö, sozawili amatela ba danö si mate?+
18 Ba haʼökhö manandrösa wönu Lowalangi me iwaʼö wa tebai lakhamö ngaluo wolombasenia? Hadia tenga khöra yaʼira si lö moloʼö?
19 Tobali, taʼila wa tebai lakhamö ngaluo wolombase andrö börö me lö famatira.+
