Ba Niha Heberaiʼo 4:1-16
4 Börö me moguna nasa mbuʼusa li ba wogamö ngaluo wolombasenia, andrö mangelama ita enaʼö samösa lö ba gotaluada si lö aʼozu weʼamöi ba daʼö.+
2 No tatema duria somuso dödö simane yaʼira,+ hizaʼi lö moguna khöra daromali si no larongo andrö, börö me faböʼö wamatira moroi ba wamati niha soloʼö.
3 Yaʼita si no mamati, sindruhu-ndruhu wa tola takhamö ngaluo wolombase andrö. No irai imane Lowalangi, ”Andrö wa mofönu ndraʼo ba möido ba hölu, ’Tebai lakhamö ngaluo wolombasegu,’”+ hewaʼae no awai halöwönia iʼotarai me tumbu ngaʼötö niha ba gulidanö.*+
4 Ba ayati tanö böʼö, no irai iwaʼö daʼa sanandrösa ba ngaluo si fitu: ”Ba ngaluo si fitu, molombase Lowalangi moroi ba halöwönia.”+
5 Sakali tö imane, ”Tebai lakhamö ngaluo wolombasegu.”+
6 Andrö, börö me so niha si tola möi bakha, ba tebai möi niha si oföna mamondrongo turia somuso dödö andrö börö me lö khöra foloʼö,+
7 me no ara numalö ginötö, ifuli ihonogöi samuza tö ngaluo nifotöi ”Maʼökhö andre” ba zura zinunö Dawido, simane nitötöinia yaʼia daʼö, ”Maʼökhö andre, na mifondrondrongo wehedegu, böi miʼabeʼeʼö dödömi.”+
8 Na no iʼohe ira menaʼö Yosua+ ba nahia wolombase andrö, lö ifatunö Lowalangi ngaluo böʼö aefa daʼö.
9 Andrö wa so nasa ngaluo wolombase ba nono mbanua Lowalangi simane ngaluo sabato.+
10 Niha si no mogamö luo wolombase Lowalangi, no göi molombase ia moroi ba halöwönia, simane folombase Lowalangi.+
11 Dataforege wogamö ngaluo wolombase andrö enaʼö böi so zawuwu börö woloʼö duma-duma niha si lö moloʼö.+
12 Sauri sa daromali Lowalangi andrö ba sabölö,+ ba no atarö moroi ba gari si faoma bawa,+ isösö irugi ifabali ira noso* geheha, buʼu ba uto döla, ihuku gera-era dödö ba söndra dödö.
13 Lö hadöi nifazökhi Lowalangi si tobini ba duduma hörönia.+ Fefu lö balu-balu ba no mubokai fönania börö me khönia tabuʼa wanema li.+
14 Andrö, me no so khöda gere sebua salawa si no möi ba zorugo yaʼia daʼö Yesu, Ono Lowalangi,+ böi taböhöli tafaduhuʼö ia föna zato.+
15 Ere sebua andrö khöda, tenga zi lö aboto ba dödönia wa ambö faʼabölöda.+ No mutandraigö ia ba ngawalö hadia ia, ba lö horönia.+
16 Böi alawö ita wangondrasi dadaoma Lowalangi, sangoromaʼö faʼasökhi dödö sebua* ba mangandrö ita khönia+ enaʼö tatema waʼahakhö dödö hegöi faʼasökhi dödönia sebua* andrö, sanolo yaʼita ba ginötö si tefaudu.
Nisura ba gahe zura
^ Eluahania daʼa iraono Gadamo ba Khawa.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
