Ba Niha Heberaiʼo 6:1-20
6 Iadaʼa, me no aefa tafahaʼö ita ba wamahaʼö si oföna+ sanandrösa khö Keriso, dataʼodödögö enaʼö moʼahonoa waʼaboto ba dödöda.+ Böi saʼae tafuli ita furi ba wamahaʼö si oföna andrö, yaʼia daʼö famahaʼö sanandrösa ba wamalalini era-era moroi ba gamuata si möi zaya-zaya gölö ba famati khö Lowalangi,
2 sanandrösa ba wamayagö idanö ba fanufa tanga,+ mazui fanusugi niha si no mate,+ ba fanguhuku si lö aetu.
3 Daʼö dania nifaluada na itehe khöda Lowalangi.
4 Niha si no muhagaini me föna,+ no larasoi mbuala moroi ba zorugo ba no fao ira ba wanema eheha niʼamoniʼö,
5 no larasoi hewisa waʼasökhi daromali Lowalangi hegöi faʼabölö andrö soʼamakhaita ba götö* si so miföna,
6 hizaʼi no laʼerogö lala wamati iadaʼa,+ ba tebai saʼae teʼazökhi ira enaʼö lafalalini gera-erara börö me lafuli laʼosö Nono Lowalangi ba döla geu famakao, ba laʼailasi ia föna niha sato.+
7 Tefahowuʼö danö ibeʼe Lowalangi börö me asese aekhu deu ba tumbu zinanö soguna ba niha.
8 Hizaʼi, na duʼu sodoi zi tumbu, lö moguna danö daʼö saʼae. Laʼelifi aefa daʼö latunu.
9 Yaʼami ira talifusö niʼomasiʼö, hewaʼae simane daʼa huhuoma khömi, faduhu dödöma wa abölö sökhi ami moroi khöra, ba lö miböhöli wamalua ngawalö zoʼamakhaita ba wangorifi.
10 Tenga sa si lö atulö Lowalangi irege olifu ia halöwömi hegöi faʼomasimi börö döinia,+ me no mangai halöwö ami ba niha niʼamoniʼö ba lö miböhöli wamalua yaʼia.
11 Hewaʼae simanö, omasi ndraʼaga enaʼö lö tebulö waʼowölö-ölömi simane si no mifalua barö daʼa, enaʼö faduhu dödömi wanötöna andrö+ irugi gamozua,+
12 irege lö areu ami,+ hizaʼi tobali soloʼö niha sanema amabuʼula andrö börö wamati ba faʼebolo dödö.
13 Me fawuʼu li Lowalangi khö Gaberahamo, fahölu Lowalangi ba khönia samösa, börö me lö hadöi salawa moroi khönia si tola ibeʼe ba hölu.+
14 Imane, ”Sindruhu-ndruhu wa ufahowuʼö ndraʼugö. Hasambalö ato ngaʼötöu ubeʼe.”+
15 Börö me no ibaloi Aberahamo, andrö wa itema zi no mufabuʼu andrö.
16 Na fahölu niha, ba fahölu ia ba döi niha böʼö sabölö ebua moroi khönia, ba hölura andrö zangasiwai amadöniwa, börö me daʼö zi tobali weʼe-weʼe dödöra.+
17 Simanö göi me ihalö gangetula Lowalangi enaʼö faduhu dödö niha sanema ondröita amabuʼula li+ andrö wa lö tebulö gohitö dödönia, daʼö mbörö wa möi ia ba hölu si tobali weʼe-weʼe dödö,
18 enaʼö ba zi dombua ngawalö si tebai mufawuʼa andrö, ba zi tebai falimo Lowalangi,+ sindruhu-ndruhu teʼaroʼö ita yaʼita si no telumöʼö khönia, irege lö tebulö ita ba wanötöna andrö ba zi so miföna.
19 Fanötöna andre+ no amaedola zao ba waʼaurida,* sabölö ba si tola taʼodaligö, solohe yaʼita bakha barö nukha mbaʼa-baʼa andrö,+
20 ba nahia si no möi salahida ba wanötö lala, yaʼia daʼö Yesu+ si no tobali ere sebua simane Melekhisede sagötö faʼara.+
