Nisura Mataiʼo 13:1-58
-
AMAEDOLA SANANDRÖSA BA WAMATÖRÖ LOWALANGI (1-52)
-
Samazaewe tanömö zinanö (1-9)
-
Hadia mbörö wa iʼogunaʼö gamaedola Yesu (10-17)
-
Famotokhi eluaha zamazaewe tanömö zinanö (18-23)
-
Gandru ba oʼo (24-30)
-
Hunö sesawi ba ragi (31-33)
-
Iʼogunaʼö gamaedola Yesu, itörö zi no mufaʼeleʼö (34, 35)
-
Famotokhi eluaha gamaedola gandru ba oʼo (36-43)
-
Girö-girö si tobini ba mutiara si sökhi (44-46)
-
Diala (47-50)
-
Gama-gama si bohou ba si no ara (51, 52)
-
-
Lö latema Yesu ba mbanuania (53-58)
13 Me luo daʼö, mofanö Yesu moroi ba nomo andrö, modadao ia ba zinga nasi.
2 Ato zangondrasi yaʼia irege möi ia ba dundraha, ba daʼö modadao ia. Mosindro niha sato andrö ba gawu.+
3 Aefa daʼö, ifahaʼö ira si fao amaedola.+ Imane, ”Hiza! Samösa zohalöwö ba danö, ifazaewe danömö zinanö.+
4 Ba wamazaewenia, so danömö saekhu ba lala, ba ahori laʼa fofo.+
5 So göi zaekhu ba dete gara, si lö aweʼe-weʼe tambu. Iʼanemaiʼö moliwiö zinanö andrö börö me lö abakha dambunia.+
6 Hizaʼi, aleu ba waʼaukhu zino börö me lö abakha waʼania.
7 So göi zaekhu ba gotalua ndruʼu sodoi. Börö waʼabölö ndruʼu sodoi, ikabi zinanö andrö.+
8 So göi zaekhu ba danö si sökhi, ba ibörögö oya mbua. So zowua 100 winaeta, so zi 60, ba so göi zi 30.+
9 Si so talinga, yamufondrondrongo.”+
10 Ba laʼondrasi ia ira nifahaʼönia, lasofu khönia, ”Hana wa öfahaʼö ira si fao amaedola?”+
11 Itema lira, ”No mubeʼe khömi waʼaboto ba dödö si tobini niʼamoniʼö+ andrö sanandrösa ba Wamatörö Lowalangi ba zorugo, hizaʼi lö nibeʼe khö ndra niha daʼö.
12 Dozi niha si so faʼaboto ba dödö, tebeʼe nasa khönia irege oya waʼaboto ba dödönia. Ba niha si löʼö, ba laheta göi khönia zi so khönia andrö.+
13 Laʼila, ba lö hadöi gunania. Lafondrondrongo, ba lö hadöi gunania, irege lö aboto ba dödöra. Andrö ufahaʼö ira si fao amaedola.+
14 Alua khöra nifaʼeleʼö Yesaya me imane, ’Atulö wa mirongo, hizaʼi lö miʼila hadia geluahania. Atulö wa miʼila, hizaʼi lö aboto ba dödömi.+
15 Noa sa abeʼe dödö niha gulidanö andre. Larongo talingara ba lö ba dödöra, ba laduhö höröra irege lö laʼila. Lö larongo talingara, lö aboto ba dödöra, ba lö lafuli ira khögu. Andrö, lö ufadöhö ira.’+
16 ”Hizaʼi, yaʼahowu ami börö me miʼila ba mifondrondrongo.+
17 Sindruhunia, ato zamaʼeleʼö hegöi niha samati somasi mangila ngawalö niʼilami, hizaʼi lö laʼila.+ Omasi göi larongo ngawalö nirongomi, hizaʼi lö larongo.
18 ”Iadaʼa, mifondrondrongo geluaha gamaedola sanandrösa khö zohalöwö ba danö no mege.+
19 Tanömö zinanö saekhu ba zinga lala,+ yaʼia daʼö niha samondrondrongo turia Wamatörö Lowalangi, hizaʼi lö laʼila geluahania. Aefa daʼö, tohare Zatana,*+ irabu hadia nitanö bakha ba dödöra.
20 Tanömö zinanö saekhu ba dete gara, yaʼia daʼö niha samondrondrongo turia andrö, itemaʼö si fao faʼomuso dödö.+
21 Hizaʼi, lö mowaʼa ba dödönia ba lö anau gölö. Me itörö ia famakao mazui fangoʼaya börö duria andrö, lö mamati ia saʼae.
22 Tanömö saekhu ba gotalua ndruʼu sodoi, yaʼia daʼö niha samondrondrongo turia andrö, hizaʼi lö mowua+ börö me ikabi ia faʼaombö dödö ba gulidanö ba götö*+ daʼa ba falimosa ganaʼa.
23 Tanömö saekhu ba danö si sökhi, yaʼia daʼö niha samondrondrongo turia andrö, aboto ba dödönia geluaha, ba sindruhu-ndruhu mowua. So zi 100 winaeta buania, so zi 60, so göi zi 30.”+
24 Ifatunö gamaedola tanö böʼö khöra, ”Famatörö Lowalangi ba zorugo andrö amaedola zamazaewe tanömö si sökhi ba nowi.
25 Me no mörö niha, tohare nudu ifazaewe danömö goʼo ba gotalua gandru. Aefa daʼö, mofanö ia.
26 Me ibörögö tumbu liwiö gandru, tumbu göi goʼo.
27 Lafalukhaisi zokhö nowi andrö ira sohalöwö khönia ba lamane, ’He Pa, hadia tenga tanömö si sökhi nifazaewemö? Hana wa so goʼo iadaʼa?’
28 Itema lira, ’Si fatiu tödö khögu zamazaewe daʼö.’+ Lamane khönia, ’Hadia omasiʼö na madöni goʼo?’
29 Imane khöra, ’Böi. Na midöni goʼo ma dania fao gandru.
30 Akha faoma ebua irugi wamasi. Ba luo daʼö, uwaʼö khö ndra samasi: Miʼofönaiʼö wangozaragö oʼo, miböbö fefu ba mitunu. Aefa daʼö, miʼowuloi gandru, miʼohe ba halasa.’”+
31 Ifatunö gamaedola tanö böʼö khöra, ”Famatörö Lowalangi ba zorugo andrö hulö simane hunö sesawi* ba nowi.+
32 Daʼö hunö wondrege zide-ide. Hizaʼi na no alawa, tobali tanömö sayu sebua ba motöla irege mangazuni wofo ba ndrahania.”
33 Itutunö khöra gamaedola böʼö, ”Famatörö Lowalangi ba zorugo andrö hulö ragi nifaruka ndra alawe ba hamo darigu si tölu fanuʼa sebua,* irege kamba maʼafefu.”+
34 Fefu wamahaʼö andrö ifaʼema khöra Yesu si fao amaedola. Atulö, lö fahuhuo ia na tenga amaedola.+
35 Enaʼö itörö niwaʼö zamaʼeleʼö andrö, ”Ubokai mbawagu si fao amaedola. Uʼombakhaʼö ngawalö zi tobini iʼotarai mböröta.”*+
36 Me no aefa ifofanö niha sato, möi ia ba nomo. Laʼondrasi ia ira nifahaʼönia lamane, ”Fatunö khöma geluaha gamaedola goʼo ba nowi.”
37 Itema lira, ”Niha samazaewe tanömö si sökhi yaʼia daʼö Ono niha,
38 nowi yaʼia daʼö niha gulidanö.+ Tanömö si sökhi yaʼia daʼö niha si möi ba Wamatörö Lowalangi ba zorugo. Oʼo yaʼia daʼö ono Zatana.*+
39 Si fatiu tödö yaʼia daʼö Afökha. Inötö wamasi yaʼia daʼö amozua götö* daʼa, ba samasi yaʼia daʼö ira malaʼika.
40 Börö daʼö, simane oʼo niʼowuloi ba nitunu, simane daʼö zalua göi ba gamozua götö*+ daʼa dania.
41 Ifatenge ndra malaʼikania Ono niha ba wangowuloi niha sanawö huku ba samobörö horö ba niha böʼö. Lafofanö fefu ndra niha daʼa moroi ba Wamatörönia.
42 Aefa daʼö, latiboʼö ndra niha daʼö ba mbaho galitö.+ Ba daʼö so wege-ege ba fatangisa mboha.
43 Ba luo daʼö, niha satulö humaga ira simane haga luo+ ba Wamatörö Namara. Si so talinga, yamufondrondrongo.
44 ”Famatörö Lowalangi ba zorugo andrö hulö girö-girö si tobini ba mbenua. So niha sanöndra ba ifuli ikoʼo zui. Omuso sibai dödönia ba ifamawa fefu gokhötania ba wowöli benua andrö.+
45 ”Famatörö Lowalangi ba zorugo andrö hulö sogale soʼanöröi tanö misa, sangalu-ngalui mutiara si sökhi.
46 Me no isöndra sambua mutiara sebua böli, ifamawa fefu gokhötania ba wowöli mutiara andrö.+
47 ”Famatörö Lowalangi ba zorugo andrö hulö ndriala nifazaumba ba nasi ba wamaʼuʼu ngawalö giʼa.
48 Na no afönu, lasöbi ndrialara ba gawu si fagai ba nasi. Aefa daʼö, modadao ira ba wangowuloi iʼa si sökhi,+ labeʼe ba karawa, ba si lö sökhi latiboʼö.+
49 Simanö göi dania ba gamozua götö* daʼa. Tohare ndra malaʼika ba wamöföʼö niha si lö sökhi moroi ba gotalua niha satulö,
50 ba latiboʼö ira ba mbaho galitö. Ba daʼö so wege-ege ba fatangisa mboha.
51 ”Hadia ahori aboto ba dödömi daʼa fefu?” Latema li, ”Aboto ba dödöma.”
52 Aefa daʼö imane khöra, ”Na simane daʼö, fefu zamahaʼö si no mufahaʼö sanandrösa ba Wamatörö Lowalangi ba zorugo andrö, hulö simane sokhö omo sanaoʼö baero gama-gama si bohou ba si no ara moroi ba nahia wangiröʼö.”
53 Me no aefa idunö-dunö gamaedola andrö Yesu, mofanö ia moroi ba daʼö.
54 Me no irugi mbanuania,+ ibörögö mamahaʼö ba nahia waʼowulo. Ahöli-höli dödö niha ba daʼö lamane, ”Hezo moroi waʼatua-tuania andrö, ba hana wa tola ifalua dandra safönu faʼabölö?+
55 Hadia tenga ono tuka geu ia andrö?+ Hadia tenga ono Maria ia, ba talifusönia Yakobo, Yosefo, Simoni hegöi Yuda?+
56 So göi ba daʼa ndra talifusönia alawe. Hewisa wa tola simane daʼö ia?”+
57 Börö daʼö, lö faduhu dödöra khönia.+ Imane khöra Yesu, ”Gofu hezo so, lafosumange zamaʼeleʼö. Hizaʼi, lö latema ia ba mbanuania hegöi ba nomonia samösa.”+
58 Lö oya ifalua dandra safönu faʼabölö ba daʼö, börö me lö mamati ira.
Nisura ba gahe zura
^ Sin.: ”si lö sökhi”.
^ Faigi Geluaha Ngawua Wehede.
^ Hunö fondrege zide-ide si tesöndra ba Palestina. Faʼalawania ikhamö 4 meter ba modaha.
^ Mato 10 kg waʼoya.
^ Eluahania daʼa iʼotarai me tumbu nono Gadamo ba Khawa.
^ Sin.: ”si lö sökhi”.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
