Nisura Mataiʼo 2:1-23
2 Tumbu Yesu ba Mbetilekhema+ si so ba Yudea, me götö Razo Herode.*+ Aefa daʼö, tohare zanahö döfi moroi ba Gatumbukha numalö ba Yeruzalema.
2 Ba lamane, ”Hezo nono sawena tumbu si tobali razo niha Yahudi?+ No maʼila ndröfinia me so ndraʼaga ba Gatumbukha, andrö wa toharega möiga mangalulu khönia.”
3 Me irongo daʼö Razo Herode hegöi fefu niha ba Yeruzalema, lö sökhi-sökhi dödöra.
4 Iʼowuloi fefu gafalo gere hegöi sangila amakhoita ba soi daʼö, ba manofu ia hezo dania tumbu Keriso.*
5 Latema linia, ”Ba Mbetilekhema+ si so ba Yudea, börö me so zamaʼeleʼö sanura,
6 ’Ba yaʼugö, Betilekhema ba danö Yehuda, tebai labaliʼö ndraʼugö banua fondrege zide-ide ira samatörö ba Yehuda, börö me khöu iʼotarai dania samösa samatörö, sokubaloi ono mbanuagu Izaraʼeli.’”+
7 Aefa daʼö, ibiniʼö Herode wogaoni sanahö döfi andrö ba manofu ia khöra hamega oroma ndröfi daʼö.
8 Me ifatenge ira ba Mbetilekhema, imane khöra, ”Alui irege misöndra nono side-ide andrö. Na no misöndra ia, fatunö khögu enaʼö möido göi mangalulu khönia.”
9 Me no larongo niwaʼö Razo, mofanö ira. Aefa daʼö, mowaö-waö ndröfi niʼilara me so ira ba Gatumbukha+ ba oföna irugi, tebato gamaudu zi so ono daʼö.
10 Omuso sibai dödöra me laʼila ndröfi andrö.
11 Ba me no larugi nomo andrö, ba laʼila nono side-ide awö Maria inania, mangalulu ira fönania. Ba mamuala ira, labeʼe khönia ganaʼa, kumöyö, ba emuri.
12 Hizaʼi, ifangelama ira Lowalangi ba wangifi+ enaʼö böi lafuli ira khö Herode, ba mangawuli ira ba mbanuara latörö lala böʼö.
13 Me no mofanö ira, fahuhuo malaʼika Yehowa* khö Yosefo ba wangifi.+ Imane, ”Faoso, ohe nono andrö hegöi inania. Miʼoloi ba danö Miserai, iagö ba daʼö irege ukaoni ndraʼugö mangawuli, börö me iʼalui nono andrö Herode ba wamunu yaʼia.”
14 Ba maoso Yosefo bongi daʼö, iʼohe nono andrö awö ninania numalö ira ba danö Miserai.
15 Ba daʼö toröi ira irege mate Herode. Börö daʼö, itörö niwaʼö Yehowa khö zamaʼeleʼö khönia me imane, ”Moroi ba danö Miserai ukaoni nonogu.”+
16 Ba me iʼila Herode no lalimo ia ira sanahö döfi andrö, mofönu sibai ia. Ifaretakö enaʼö labunu fefu nono matua ba Mbetilekhema hegöi ba mbanua si fasui, sambö dua fakhe faʼebua. Ifalua daʼö börö me no isofu khö ndra sanahö döfi hamega oroma ndröfi daʼö.+
17 Börö daʼö, itörö niwaʼö Yeremia samaʼeleʼö,
18 ”Ba Rama terongo wege-ege ba fangeʼesi sabölö-bölö moroi khö Rakhela.+ Iʼeʼesi ndraononia ba lö omasi ia nirara tödö börö me lö yaʼira saʼae.”+
19 Me no aefa mate Herode, tohare malaʼika Yehowa iʼondrasi Yosefo ba wangifi+ ba danö Miserai,
20 imane, ”Faoso, ohe nono awö ninania ba danö Gizaraʼeli börö me no mate niha sedöna mamunu ono andrö.”
21 Ba maoso ia, iʼohe nono andrö awö ninania ba danö Gizaraʼeli.
22 Hizaʼi, no irongo Yosefo wa Arikhelao zi tobali fangali namania Herode tobali razo ba Yudea, ba ataʼu ia wangawuli ba daʼö. Börö me no ifangelama ia Lowalangi ba wangifi,+ andrö wa möi ia ba Galilaia.+
23 Ba irugi mbanua Nazareta,+ toröi ira ba daʼö, enaʼö itörö niwaʼö ndra samaʼeleʼö, ”Lafotöi ia dania niha Nazareta.”*+
Nisura ba gahe zura
^ Faigi Geluaha Ngawua Wehede.
^ Mazui ”Mesia; Nibayoini”.
^ Te moroi ba li Heberaiʼo, eluahania ”liwiö”.
