Nisura Mataiʼo 22:1-46
22 Sakali tö itutunö khöra gamaedola Yesu,
2 ”Famatörö Lowalangi ba zorugo andrö hulö razo samalua falöwa+ khö nononia.
3 Ifatenge zawuyunia ba wogaoni niha enaʼö laʼondrasi walöwa andrö, hizaʼi lö somasi möi.+
4 Ifatenge zawuyu tanö böʼö ba wangombakha ba niha, ’No uhenaigö gö. No utaba zawi ba urifö satabö, no ufaʼanö fefu. Miʼaeʼe ba walöwa.’
5 Hizaʼi, niha nikaoni andrö lö ibeʼe dödöra ba lalau mofanö, so zi möi ba kabu, so zi möi mogale,+
6 tanö böʼö laraʼu zawuyu andrö, laböbözi ba labunu.
7 ”Mofönu sibai razo ba ifatenge zaradadunia, ibunu zamunu niha andrö ba itunu mbanuara.+
8 Aefa daʼö, mohede ia khö ndra sawuyunia, ’No tefaʼanö walöwa, hizaʼi tenga sinangea möi ndra niha daʼö.+
9 Börö daʼö, miʼaeʼe ba lala si numalö ba mbanua saröu, kaoni haniha manö zi falukha khömi.’+
10 Börö daʼö, möi ndra sawuyu andrö ba wogaoni haniha manö zi falukha khöra ba lala, niha si sökhi hegöi niha si lö sökhi. Afönu dome ba nahia walöwa.
11 ”Me möi razo ba wamaigi tomenia, iʼila samösa ndra matua si lö mamake baru walöwa.
12 Manofu khönia razo, ’Hana wa lö öfake mbaru walöwa?’ Lö hede-hedenia.
13 Aefa daʼö, imane razo khö ndra sawuyunia, ’Böbö danga awö gahenia ba tiboʼö ia baero ba zogömi-gömi. Ba daʼö so wege-ege ba fatangisa mboha.’
14 ”Ato nikaoni, ba lö ato nituyu.”
15 Mofanö ndra Farizaiʼo ba mamagölö ira ba wangalui lala enaʼö fasala Yesu na fahuhuo.+
16 Lafatenge nifahaʼöra fao ira zi faʼawö khö Herode+ ba wamalukhaisi Yesu lamane, ”He Samahaʼö, aboto ba dödöma wa sindruhu manö na mohede ndraʼugö ba öfahaʼö zindruhu sanandrösa khö Lowalangi. Lö ebua zambuana dödöu, ba lö öfaigi mbawa niha.
17 Omasiga maʼila hewisa mbua gera-eramö. Hadia tola tabuʼa pajak khö Kaisaro?”
18 Hizaʼi, aboto ba dödö Yesu wa so khöra gera-era si lö sökhi, imane, ”He niha samini tödö, hana wa mitandraigö ndraʼo?
19 Miforomaʼö khögu gefe loga niʼogunaʼömi ba wamuʼa pajak andrö.” Labeʼe khönia sambua dinar.*
20 Manofu ia, ”Gambara haniha daʼa ba haniha döinia?”
21 Latema linia, ”Kaisaro.” Aefa daʼö imane, ”Mibeʼe khö Kaisaro tana khö Kaisaro, ba khö Lowalangi tana khö Lowalangi.”+
22 Me larongo daʼö, ahöli-höli dödöra. Aefa daʼö, mofanö ira.
23 Me luo daʼö, laʼondrasi ia ira Sadukaiʼo si lö faduhu tödö sanandrösa ba wanusugi+ niha si no mate ba manofu ira,+
24 ”He Samahaʼö, no iwaʼö Moze, ’Na so ndra matua si no mate si lö ono, gaʼania mazui akhinia zangai foʼomonia ira alawe, enaʼö so ngaʼötö moroi ba ndra alawe andrö sanohugö töi woʼomonia si no mate andrö.’+
25 No irai so ba daʼa dafitu zi fatalifusö. Mangowalu ziaʼa ba mate. Börö me lö hadöi ngaʼötönia, akhinia zangai foʼomonia ira alawe.
26 Mate göi nakhinia andrö, lö ngaʼötö. Numero tölu göi simane daʼö, ofeta ba dalifusöra numero fitu.
27 Ba gafuriata, mate göi ndra alawe andrö.
28 Na simanö, haniha dania woʼomo ndra alawe andrö ba ginötö tesusugi zi no mate? Börö me no irai tobali foʼomonia ndra matua si dafitu andrö.”
29 Imane khöra Yesu, ”Fasala sibai ami, börö me lö aboto ba dödömi Mbuku Niʼamoniʼö hegöi faʼabölö Lowalangi.+
30 Ba ginötö wanusugi, lö mangowalu niha ba lö tebeʼe nihalö. Hizaʼi, tobali ira simane malaʼika ba zorugo.+
31 Hadia lö irai mibaso me fahuhuo Lowalangi khö Moze sanandrösa ba wanusugi niha si no mate, me imane,
32 ’Lowalangi Gaberahamo ndraʼo, Lowalangi Gizaʼaki, ba Lowalangi Yakobo.’+ Yaʼia andrö Lowalangi niha sauri, tenga Lowalangi niha si no mate.”+
33 Ahöli-höli dödö zamondrongo wamahaʼönia andrö.+
34 Me larongo ira Farizaiʼo wa tebai saʼae latema li Yesu ira Sadukaiʼo, tohare ira ba wamalukhaisi yaʼia.
35 Samösa ba gotaluara zonekhe ba Goroisa Moze, manofu ia khö Yesu ba wanandraigö yaʼia,
36 ”He Samahaʼö, hezo zabölö ebua ba Goroisa Moze?”+
37 Itema linia, ”’Omasiʼö Yehowa* Lowalangiu moroi siʼaikö ba dödöu, nosou* maʼasambua, ba era-erau maʼafefu.’+
38 Daʼa goroisa si oföna ba sabölö ebua.
39 Oroisa si dua si fakhili-khili ba daʼö, ’Omasiʼö nawöu simane faʼomasiu ndraʼugö.’+
40 Ba goroisa si dombua andre, modane-dane fefu Goroisa Moze awö Nisura Ndra Samaʼeleʼö.”+
41 Gasa-gasa waʼowulo ndra Farizaiʼo ba daʼö, isofu khöra Yesu,+
42 ”Haniha moloʼö yaʼami Keriso andrö? Ha maʼuwu ia?” Latema linia, ”Maʼuwu Dawido.”+
43 Itohugö wanofu, ”Na simanö, hana wa itema wanuturu lala Dawido moroi ba geheha+ ba wamotöi Keriso andrö Soʼaya me imane,
44 ’No iwaʼö Yehowa* khö Zoʼaya yaʼo, ”Dadao ba gambölögu irege ubeʼe tou barö gaheu zi faʼudu khöu”’?+
45 Na Dawido manö ikaoni khönia Soʼaya, hewisa wa tola tobali maʼuwu Dawido Keriso andrö?”+
46 Samösa lö si tola manema linia ba lö si barani manofu khönia saʼae.
Nisura ba gahe zura
^ Faigi Geluaha Ngawua Wehede.
