Nisura Mataiʼo 23:1-39
23 Aefa daʼö, fahuhuo Yesu ba niha sato hegöi khö ndra nifahaʼönia,
2 ”Ira Farizaiʼo hegöi sangila amakhoita no laʼiagö dadaoma Moze.
3 Börö daʼö, miʼoʼö fefu hadia niwaʼöra, hizaʼi böi miʼoʼö gamuatara, börö me ha asala lawaʼö, ba lö sa lafalua.+
4 Lafazökhi gamakhoita si hulö noro sabua ba labeʼe ba galisi niha,+ ba yaʼira samösa lö sa latuko turura.+
5 Gofu hadia nifaluara ha enaʼö laʼila niha.+ Laʼebuaʼö kota-kota ayati ba högöra labaliʼö hazima+ ba lafake nukha sebua sohuru-huru ahe.+
6 Omasi ira naha si sökhi ba gowasa hegöi kurusi tanö föna* ba nahia waʼowulo.*+
7 Omasi ira nifosumange ba nahia sato niha* ba lakaoni khöra Samahaʼö.*
8 Böi labeʼe töimi Samahaʼö, börö me ha samösa Zamahaʼö yaʼami,+ ba si fatalifusö ami fefu.
9 Böi faʼama ami ba gulidanö, börö me ha samösa Namami+ si so ba zorugo.
10 Böi labeʼe töimi zondröniaʼö, börö me ha samösa Zondröniaʼö yaʼami yaʼia daʼö Keriso.
11 Hizaʼi, somasi ebua ba gotaluami, yatobali ia enonimi.+
12 Haniha zangebuaʼö yaʼia daʼö niʼide-ideʼö,+ ba haniha zangide-ngideʼö yaʼia daʼö niʼebuaʼö.+
13 ”Alai ami sangila amakhoita hegöi Farizaiʼo samini tödö! Miduhö mbawandruhö Wamatörö Lowalangi ba zorugo enaʼö lö möi niha bakha. Lö möi göi ami, ba mitaha-taha niha somasi möi.+
14 * ——
15 ”Alai ami sangila amakhoita hegöi Farizaiʼo samini tödö!+ Mitöröi nasi awö danö, enaʼö fao zi samösa niha ba agamami.* Ba na no fao ia, mendrua waʼalösökhinia mibeʼe irege sinangea tehuku ia ba Gehena.*
16 ”Alai ami niha sauʼa+ solohe tanga niha böʼö. Miwaʼö ba niha, ’Na so zi fahölu ba döi gosali, lö eluaha hölunia andrö, hizaʼi na fahölu ia ba döi ganaʼa si so ba gosali, lö tola löʼö ifalua hölunia andrö.’+
17 Auʼa ami ba bodo! Hezo zabölö moguna, anaʼa mazui osali sangamoniʼö anaʼa andrö?
18 Miwaʼö nasa, ’Na fahölu niha börö naha wanunu sumange, lö eluaha hölunia andrö, hizaʼi na fahölu ia börö zumange nibeʼe, lö tola löʼö ifalua hölunia andrö.’
19 Auʼa ami! Hezo zabölö moguna, sumange mazui naha wanunu sumange sangamoniʼö sumange andrö?
20 Sindruhunia, si fahölu börö naha wanunu sumange, tenga ha börö daʼö wa fahölu ia, hizaʼi börö zumange nibeʼe ba detenia.
21 Niha si fahölu ba gosali tenga ha ba daʼö fahölu ia, hizaʼi ba döi zi onahia ba daʼö.+
22 Si fahölu börö zorugo, tenga ha börö dadaoma Lowalangi wa fahölu ia, hizaʼi börö zi dadao ba daʼö.
23 ”Alai ami sangila amakhoita hegöi Farizaiʼo samini tödö! Mibeʼe zi sambua niʼofulu moroi ba danömö ruku-ruku, adasi hegöi jiro.*+ Hizaʼi, lö ba dödömi zabölö ebua ba Goroisa Moze yaʼia daʼö faʼatulö,+ faʼahakhö dödö,+ ba falöfaröi. Moguna göi wameʼe si sambua niʼofulu, hizaʼi tanö böʼö tebai muʼosiwawöi.+
24 Yaʼami niha sauʼa,+ solohe tanga niha böʼö! Mitafiʼö ndri+ ba gömi idanö hizaʼi mitölö gondra!+
25 ”Alai ami sangila amakhoita hegöi Farizaiʼo samini tödö! Mihaogö tanö baero mako hegöi figa gömi,+ hizaʼi tödömi afönu faʼoluʼa-luʼa+ ba fangisö si lö harumani.+
26 Yaʼami Farizaiʼo sauʼa, mihaogö ua tanö bakha mako hegöi figa andrö enaʼö sökhi göi tanö baeronia.
27 ”Alai ami sangila amakhoita hegöi Farizaiʼo samini tödö!+ Yaʼami andrö hulö lewatö si bohou la-cat.*+ Sökhi wamaigi moroi baero, hizaʼi no fahöna bakha döla zi mate awö waʼaraʼiö.
28 Simane daʼö ami andrö, no miʼosatulö föna niha, hizaʼi tödömi bakha fahöna waʼalösökhi ba famini tödö.+
29 ”Alai ami sangila amakhoita hegöi Farizaiʼo samini tödö!+ Mifazökhi lewatö si sökhi khö ndra samaʼeleʼö, ba mifobunga-bunga lewatö niha satulö,+
30 ba mimane wangumaʼö, ’Na ba götö ndra tuama auri ndraʼaga me föna, lö faoga ba wamunu ira samaʼeleʼö.’
31 Börö daʼö, no mifaduhuʼö wa yaʼami ngaʼötö zamunu samaʼeleʼö.+
32 Iadaʼa, mitohugö irege awai nifobörö ndra tuami andrö.
33 ”Yaʼami ngaʼötö gulö sobiso,+ hewisa wa tola aefa ami ba wanguhuku Gehena* andrö?+
34 Börö daʼö, ufatenge khömi ndra samaʼeleʼö,+ niha satua-tua ba samahaʼö.+ So dania nibunumi,+ miʼosö ba döla geu, miböbözi+ ba nahia waʼowulo,* ba mifakao+ iʼotarai mbanua si sambua numalö ba zi sambua,
35 enaʼö khömi tesugi ndro niha satulö niduwagö ba danö, iʼotarai ndro Habeli+ irugi Zakharia ono Mbarakhia, nibunumi ba gotalua naha niʼamoniʼö faoma naha wanunu sumange.+
36 Yafaduhu dödömi, ba niha götö daʼa dania tefaluʼigö huku si göna börö horö andrö.
37 ”He Yeruzalema, he Yeruzalema, samunu ira samaʼeleʼö ba sanebu kara niha nifatengegu khömi.+ No hauga kali uʼodödögö wangowuloi onomi, simane na iʼowuloi nononia sifagelo barö gafinia! Hizaʼi lö omasi ami.+
38 Hiza! Iröi gosalimi* Lowalangi.+
39 Iʼotarai iadaʼa, lö saʼae miʼila ndraʼo irege miwaʼö dania, ’Yaʼahowu zi tohare ba döi Yehowa!’”*+
Nisura ba gahe zura
^ Mazui ”fondrege zi sökhi”.
^ Sin.: ”zinagoga”.
^ Mazui ”fasa”.
^ Sin.: ”Rabi”.
^ Mazui ”enaʼö tobali proselit zi samösa niha”.
^ Faigi Geluaha Ngawua Wehede.
^ Ruku-ruku, adasi hegöi jiro, daʼa sinanö si gide-ide si tumbu ba mbenua, laʼogunaʼö ia tobali famasa.
^ Mazui ”la-cat faoma betua”.
^ Faigi Geluaha Ngawua Wehede.
^ Sin.: ”zinagoga”.
^ Sin.: ”nomomi”.
