Nisura Mataiʼo 10:1-42
10 Ikaoni ndra nifahaʼönia si 12, aefa daʼö ibeʼe khöra waʼabölö ba wamofanö malaʼika si lö sökhi+ hegöi ba wamadöhö ngawalö wökhö awö waʼatebai mboto.
2 Töi ndra sinengenia si 12 andrö+ yaʼia daʼö Simoni nifotöi Fetero,+ ba Andrea+ talifusönia; Yakobo ba Yohane,+ ono Zebedaiʼo;
3 Filifo ba Batolomaiʼo;+ Toma+ ba Mataiʼo+ sanugi pajak; Yakobo ono Galifaiʼo; ba Tadaiʼo;
4 Simoni niha Kananaio;* ba Yuda Kariota, si manga mböli Yesu ba gafuriata.+
5 Ifatenge ndra sinengenia andrö si 12, ba ibeʼe khöra wanuturu lala,+ ”Böi miʼaeʼe ba mbanua böʼö mazui ba mbanua niha Zamaria.+
6 Ba ndraono Gizaraʼeli manö miʼaeʼe si hulö mbiri-biri selungu.+
7 Miʼaeʼe ba mituriaigö, ’No ahatö Wamatörö Lowalangi ba zorugo.’+
8 Mifadöhö zofökhö,+ misusugi zi no mate, mifadöhö zobou auri, mifofanö malaʼika si lö sökhi. Lö nibeʼemi böli me mitema, andrö na mibeʼe göi böi miʼandrö mböli.
9 Böi miʼohe ngawalö gefe ba mböbö talumi,+
10 balazo ba lala, famohanimi,* sandrala, mazui siʼo,+ börö me sinangea labeʼe gö ba zohalöwö.+
11 ”Ba mbanua sebua mazui ba mbanua side-ide si möi ami, alui niha sanemaʼö yaʼami ba miʼiagö nomonia irege mofanö ami.+
12 Na mirugi ero sambua omo, miʼowai ira.
13 Na itemaʼö ami sokhö omo, lasöndra waʼohahau dödö ba wangondrasimi yaʼira.+ Na löʼö, mangawuli khömi waʼohahau dödö andrö.
14 Na so zi lö manemaʼö mazui si lö mamondrondrongo yaʼami, miʼofanö moroi ba daʼö mazui ba mbanua andrö, ba miʼanotogö gawu-gawu gahemi.+
15 Yafaduhu dödömi, abölö-bölö wanguhuku si göna banua andrö moroi ba zi göna banua Zodoma ba Gomora+ na Luo Wanguhuku.
16 ”Hiza! Ufatenge ami hulö mbiri-biri ba gotalua nasu gatua. Andrö, yaʼonekhe ami simane ulö ba yaʼatulö ami simane marafadi.+
17 Miʼangelama, laʼohe dania ami föna zanguhuku,+ ba laleasi ami+ ba nahia waʼowulora.*+
18 Laʼohe ami föna gubernur hegöi föna razo+ börö ndraʼo, ba wamaduhuʼö khöra hegöi ba soi niha böʼö.+
19 Hizaʼi, na alua daʼö, böi miʼabusi tödö hadia zinangea miwaʼö mazui hewisa wangumaʼö yaʼia. Ba ginötö daʼö, iʼanemaiʼö miʼila hadia zinangea miwaʼö,+
20 börö na inötö fahuhuo ami, itolo ami eheha si otarai Nama.+
21 Baero daʼö, ifabunuʼö dalifusönia niha ba ifabunuʼö nononia ama. Lalawa ba lafabunuʼö zatuara iraono.+
22 Laʼuduni dania ami niha börö döigu,+ hizaʼi sanau ölö irugi gamozua, daʼö niʼorifi.+
23 Na lafakao ami ba zi sambua banua, miʼoloi ba mbanua böʼö.+ Yafaduhu dödömi, lö fakhamö midozigö mbanua Gizaraʼeli irege tohare Nono niha andrö.
24 ”Lö töra nifahaʼö moroi khö zamahaʼö yaʼia, ba lö töra zawuyu moroi khö gafalonia.+
25 No tobönö na fagölö nifahaʼö moroi khö zamahaʼö yaʼia, simanö göi zawuyu khö gafalonia.+ Na lafotöi Belesebu*+ zokhö omo, mendrua manö nösi nomonia!
26 Börö daʼö, böi miʼataʼufi ira. Fefu nitötöwui ba tebokai, fefu nibiniʼö ba teforomaʼö.+
27 Hadia niwaʼögu khömi ba zogömi-gömi, mifatunö ba zi haga. Hadia ningöngögögu ba dalingami, mifatunö föna niha sato.+
28 Böi miʼataʼufi zamunu boto si tebai mamakiko nosomi.*+ Hizaʼi, miʼataʼufi zi tola mamakiko noso hegöi boto ba Gehena*+ sagötö faʼara.
29 Hadia tenga ha sambua kefe loga* mböli ziliwi si dombua? Hizaʼi, na so ziliwi satoru ba danö, hasambalö iʼila Amami.+
30 Bu högömi manö iʼila hauga rozi.
31 Andrö, böi miʼataʼufi, abölö tohude ami moroi ba wofo andrö.+
32 ”Dozi haniha zamaduhuʼö yaʼo ba niha,+ ba ufaduhuʼö göi ia khö Namagu ba zorugo.+
33 Ba dozi sangosilöʼögö yaʼo ba niha, ba uʼosilöʼögö göi ia khö Namagu ba zorugo.+
34 Böi miwaʼö tödömi, ba wolohe faʼatulö ba gulidanö wa möi ndraʼo. Tohare ndraʼo ba wolohe föda, tenga ba wolohe faʼatulö.+
35 Wa möi ndraʼo, ba wangaʼasogö faʼudusa: ono matua ilawa namania, ono alawe ilawa ninania, ba umönö ira alawe ilawa ninania matuania.+
36 Si faʼudu ba niha dania zoroi yomonia.
37 Haniha zabölö mangomasiʼö amania mazui inania moroi ba wangomasiʼönia yaʼo, tenga sinangea tobali ia nifahaʼögu. Haniha zabölö mangomasiʼö ononia moroi ba wangomasiʼönia yaʼo, tenga sinangea tobali ia nifahaʼögu.+
38 Ba haniha zi lö manehegö tefakao* ia ba woloʼö yaʼo, tenga sinangea tobali ia nifahaʼögu.+
39 Haniha zangodödögö wolumöʼö faʼaurinia,* daʼö zi mate. Ba haniha zi mate börö ndraʼo, ifuli teʼorifi.+
40 ”Haniha zanemaʼö yaʼami no latemaʼö ndraʼo, ba haniha zanemaʼö yaʼo no itemaʼö göi zamatenge yaʼo.+
41 Haniha zanemaʼö si samösa niha börö me samaʼeleʼö niha andrö, itema luo zamaʼeleʼö.+ Ba haniha zanemaʼö si samösa niha börö me satulö niha andrö, itema luo zatulö.
42 Haniha zamabadugö si sambua mako idanö kafu ba niha börö me nifahaʼögu ia, hasambalö itema luonia.”+
Nisura ba gahe zura
^ Mazui ”niha si terou tödö”.
^ Sin.: ”dua ngaʼörö mbaru”.
^ Sin.: ”zinagoga khöra”.
^ Töi Zatana, samatörö malaʼika si lö sökhi ba dalu mbanua.
^ Mazui ”faʼaurimi”, yaʼia daʼö faʼauri ba zi so miföna.
^ Faigi Geluaha Ngawua Wehede.
^ Faigi Geluaha Ngawua Wehede.
^ Mazui ”noso”. Ba li Yunani: psykhe.
