Nisura Mataiʼo 12:1-50
-
Yesu, ”Soʼaya luo Sabato” (1-8)
-
Tefadöhö ndra matua si mate dambai tanga (9-14)
-
Enoni niʼomasiʼö Lowalangi (15-21)
-
Mufofanö malaʼika si lö sökhi ba waʼabölö geheha niʼamoniʼö (22-30)
-
Horö si tebai muʼefaʼö (31, 32)
-
Oroma geu si sökhi moroi ba mbuania (33-37)
-
Tandra Yona (38-42)
-
Me mangawuli malaʼika si lö sökhi (43-45)
-
Ina Yesu ba talifusönia (46-50)
12 Samuza inötö me luo Sabato, itörö nowi Yesu. Börö me olofo ira, lateteu gandru ira nifahaʼönia ba laʼa.+
2 Me laʼila daʼa ira Farizaiʼo, lamane khönia, ”Hana wa lasawö goroisa ba luo Sabato ira nifahaʼömö?”+
3 Itema lira Yesu, ”Hadia lö nibasomi nifalua Dawido me olofo ia hegöi ono buania?+
4 Möi ia ba nomo Lowalangi ba laʼa roti nibaliʼö sumange,+ sindruhunia tebai laʼa börö me tana khö gere daʼö.+
5 Mazui, hadia lö irai mibaso ba Goroisa Moze wa lö lawaʼö fasala ndra ere me mohalöwö ira ba gosali me luo Sabato?+
6 Hizaʼi, sindruhunia so ba daʼa niha sabölö tohude moroi ba gosali.+
7 Na aboto ba dödömi menaʼö ngawua wehede, ’Faʼahakhö dödö zomasido,+ tenga sumange nitunu’,+ ba lö mihuku niha si lö sala.
8 Börö me Ono niha andrö Soʼaya luo Sabato.”+
9 Mofanö Yesu moroi ba daʼö, ba möi ia ba nahia waʼowulo.
10 So ba daʼö niha, no mate dambai dangania.+ Börö me laʼalu-alui zala Yesu ira Farizaiʼo, lasofu khönia, ”Hadia tola mufadöhö niha na luo Sabato?”+
11 Itema lira Yesu, ”Na so khömi mbiri-biri si no aekhu ba dögi ba ginötö luo Sabato, hadia lö mihalö?+
12 Abölö tohude niha moroi ba mbiri-biri! Andrö, tola tafalua zi sökhi na luo Sabato.”
13 Imane ba niha andrö, ”Oroʼö dangamö.” Iʼoroʼö dangania niha andrö ba döhö simane tangania si tambai.
14 Aefa daʼö, mofanö ndra Farizaiʼo ba laʼalui lala wamunu Yesu.
15 Börö me iʼila zi so ba dödöra, mofanö Yesu moroi ba daʼö. Ato zoloʼö yaʼia,+ ba ifadöhö ira fefu.
16 Hizaʼi, abeʼe wehedenia khöra enaʼö lö lafatunö ia ba niha,+
17 enaʼö itörö niwaʼö Yesaya samaʼeleʼö,
18 ”Hiza genonigu+ andrö nituyugu, niʼomasiʼögu, omuso dödögu khönia!+ Ubeʼe khönia gehehagu+ ba iʼombakhaʼö ba soi böʼö misa hadia zindruhunia waʼatulö andrö.
19 Lö fakara+ mazui muʼao ia, ba lö terongo linia ba lala sebua.
20 Töla zukhu si no afufu lö ifatö, ba fandru si no alö haga lö ibunu+ irege aʼozu ifasindro waʼatulö.
21 Sindruhu sa, ba döinia dania manötöna fefu soi.”+
22 Aefa daʼö, laʼohe khönia samösa ndra matua sauʼa, si lö hede, ba nifakao malaʼika si lö sökhi. Ifadöhö niha andrö irege tola fahuhuo ia ba iʼila niha.
23 Ba fefu niha ahöli-höli dödöra lamane, ”Alai na Maʼuwu Dawido niha daʼa!”
24 Me larongo daʼa, lamane ira Farizaiʼo, ”Tebai ifofanö malaʼika si lö sökhi niha daʼa na tenga faʼabölö moroi khö Mbelesebu,* salawa malaʼika si lö sökhi andrö.”+
25 Börö me iʼila zi so ba dödöra, imane Yesu, ”Dozi famatörö, na fabali dödö hasambalö adudu, ba dozi banua hegöi fongambatö, na fabali gera-era hasambalö adudu.
26 Simanö göi Zatana na ifofanö Zatana, lö fahasara dödö. Na simane daʼö, hewisa wa tola aro wamatörönia?
27 Na ufofanö malaʼika si lö sökhi börö waʼabölö Mbelesebu, hezo moroi waʼabölö khö ndra soloʼö yaʼami andrö ba wamofanö yaʼia? Börö daʼö, yaʼira zangombakha wa fasala ami.
28 Hizaʼi, na ufofanö malaʼika si lö sökhi börö wanolo moroi ba geheha Lowalangi, eluahania no so ba daʼa Wamatörö Lowalangi hewaʼae lö saboto ba dödömi.+
29 Mazui, hewisa wa tola möi niha ba nomo ndra matua sabölö ba woʼanagöi yaʼia na lö muböbö ia sakali? Aefa daʼö, awena tola ihalö gama-gama niha daʼö.
30 Gofu haniha zi lö faʼawö khögu, eluahania si faʼudu khögu daʼö. Ba haniha zi lö fao khögu ba wangowuloi niha, eluahania samabali.+
31 ”Andrö uwaʼö khömi, fefu hadia ia horö hegöi fangoʼaya, tola teʼefaʼö. Hizaʼi, lö teʼefaʼö niha sanandrawaisi eheha.+
32 Duma-dumania, na so zi fahuhuo ba wanandrawaisi Ono niha, tola teʼefaʼö khönia.+ Hizaʼi, na so zi fahuhuo ba wanandrawaisi eheha niʼamoniʼö, lö teʼefaʼö khönia ba götö* daʼa hegöi ba zi so föna.+
33 ”Na sökhi wondrorogömi sinanö, ba sökhi göi mbuania. Na löʼö, ba lö baga mbuania. Moroi ba mbua, ba daʼö taʼila wa sökhi zinanö andrö ma löʼö.+
34 Yaʼami maʼuwu gulö sobiso,+ hewisa wa tola miwaʼö zi sökhi na lö sökhi ami? Hadia zi no fahöna ba dödö, daʼö zalua ba mbewe.+
35 Niha si sökhi iwaʼö zi sökhi börö me afönu ba dödönia ngawalö zi sökhi. Ba, niha si lö sökhi iwaʼö zi lö sökhi börö me afönu ba dödönia zi lö sökhi.+
36 Ba uwaʼö khömi, tezofu-zofu dania+ na Luo Wanguhuku fefu ngawalö wehede si lö guna nilau niha.
37 Moroi ba wehedemö ba daʼö tetatugöi hadia atulö ndraʼugö mazui löʼö.”
38 Aefa daʼö, so ösa ndra sangila amakhoita hegöi ira Farizaiʼo lamane, ”He Samahaʼö, omasiga maʼila dandra sahöli-höli dödö moroi khöu.”+
39 Itema lira, ”Niha ba ginötö andre, lö sökhi ba faröi ira.* Lö labato wangandrö tandra sahöli-höli dödö, hizaʼi lö laʼila dandra sahöli dödö baero zalua khö Yona samaʼeleʼö.+
40 Simane Yona, tölu ngaluo tölu wongi ia bakha ba dalu giʼa sebua,+ simanö göi Nono niha, tölu ngaluo tölu wongi ia ba narö danö.+
41 Na Luo Wanguhuku, ifuli tesusugi niha Niniwe si fendronga ba niha götö daʼa. Börö me no lafalalini gera-erara niha Niniwe me larongo duria nifaʼema Yona,+ andrö wa lawaʼö fasala niha götö daʼa. Sindruhunia, so ba daʼa zabölö tohude moroi khö Yona.+
42 Na Luo Wanguhuku, maoso dania ratu moroi raya si fendronga ba niha götö daʼa. Iwaʼö wa fasala niha götö daʼa, börö me tohare ia moroi ba wondrege danö ba wamondrondrongo faʼatua-tua Zelomo.+ Hizaʼi, so ba daʼa zabölö tohude moroi khö Zelomo.+
43 ”Me aheta malaʼika si lö sökhi ba mboto zi samösa niha, itörö danö si lö idanö ba wangalui nahia wolombase. Hizaʼi, lö isöndra.+
44 Aefa daʼö imane, ’Ufulido ba nomo niröigu andrö.’ Me no irugi, lö niha ba nomo daʼö. Hizaʼi, no labözini ba laʼehaogö.
45 Ba möi ikaoni dafitu tö malaʼika sabölö amuʼi moroi khönia enaʼö laʼiagö mboto niha andrö. Itugu abölö-bölö zalua ba niha daʼö moroi ba zi oföna.+ Daʼö göi zalua ba niha si lö sökhi ba ginötö andre.”
46 Me fahuo-huo nasa Yesu ba niha sato, tohare ninania awö ndra talifusönia matua,+ no mozizio ira baero. Omasi ira fahuhuo khö Yesu.+
47 So samösa zangombakha khönia, ”Hiza baero mamamö awö dalifusöu, no mozizio ira. Omasi ira fahuhuo khöu.”
48 Itema li, ”Haniha mamagu, ba haniha dalifusögu matua?”
49 Aefa daʼö, ituturu ndra nifahaʼönia ba imane, ”Yaʼira andre mamagu hegöi talifusögu!+
50 Haniha zoloʼö somasi Namagu andrö si so ba zorugo, daʼö mamagu ba talifusögu matua hegöi talifusögu alawe.”+
