Nisura Mataiʼo 14:1-36
14 Me luo daʼö, irongo Herode, samatörö banua Galilaia sanandrösa khö Yesu.+
2 Imane khö ndra enoninia, ”Yohane Samayagö Idanö daʼö. No tesusugi ia moroi ba gotalua zi mate, andrö wa tola ifalua ngawalö dandra safönu faʼabölö.”+
3 Ba zilalö, no ifaraʼuʼö Yohane Herode,* iböbö ba ifabeʼeʼö ba gurunga börö Herodia, foʼomo dalifusönia Filifo.+
4 No hauga kali iwaʼö khönia Yohane, ”Tebai öhalö ia tobali foʼomou.”+
5 Sindruhunia, omasi Herode wamunu Yohane, hizaʼi ataʼu ia niha sato börö me lawaʼö Yohane andrö samaʼeleʼö.+
6 Me iʼowasaini mbaŵa waʼatumbunia Herode,+ manari nono Herodia ono alawe föna niha sato irege omuso sibai dödö Herode.+
7 Börö daʼö, möi ia ba hölu wa hasambalö ibeʼe hadia niʼandrö nono alawe andrö.
8 Börö me no ifoʼaka ia inania, imane ono alawe andrö, ”Beʼe khögu ba tala högö Yohane Samayagö Idanö.”+
9 Hewaʼae abua khö Razo Herode wamalua daʼö, ibeʼe fareta enaʼö lafalua börö me no fahölu ia föna domenia si fao ira wemanga.
10 Ifatenge niha ba wanaba bagi Yohane ba gurunga.
11 Labeʼe ba tala högö Yohane ba lafasao khö nono alawe andrö. Aefa daʼö, möi ia ibeʼe khö ninania.
12 Ba gafuriata, möi ndra nifahaʼö Yohane, lahalö mbotonia ba lakoʼo. Aefa daʼö, laʼombakhaʼö khö Yesu.
13 Me irongo duria andrö Yesu, mofanö ia moroi ba daʼö itörö dundraha, möi ia ba zi lö niha-niha ha yaʼia. Me laʼila daʼö niha sato, laʼoʼö ia, latörö ahe iʼotarai mbanuara.+
14 Me no irugi zinga nasi Yesu, iʼila niha sato si so ba daʼö. Ahakhö dödönia ira+ ba ifadöhö zofökhö.+
15 Me no aekhu luo, tohare ndra nifahaʼönia ba lamane khönia, ”Aröu sibai nahia daʼa, ba no arakhagö bongi saʼae. Fatenge ndra niha daʼö wowöli göra ba mbanua sahatö.”+
16 Imane khöra Yesu, ”Böi mofanö ira, yaʼami manö zameʼe göra.”
17 Latema linia, ”Ha lima ngawua roti si so khöma ba dua rozi giʼa.”
18 Imane khöra, ”Miʼohe ba daʼa.”
19 Aefa daʼö, iwaʼö ba niha sato enaʼö modadao ira ba ndruʼu. Ihalö roti si lima ngawua awö giʼa si dua rozi, ifaöga ia, ilau mangandrö.*+ Iboboto roti andrö, ibeʼe khö ndra nifahaʼönia. Aefa daʼö, ladozigö niha sato ira nifahaʼönia.
20 Manga ira fefu irege abuso. Ba laʼozaragö zi töra, so 12 raga-raga sagafönu.+
21 Sindruhunia, so mato 5.000 ndra matua si manga, baero ndra alawe hegöi iraono.+
22 Lö ara aefa daʼö, iwaʼö khö ndra nifahaʼönia Yesu enaʼö ladari-dari yefo, latörö dundraha. Gasa-gasa daʼö iwaʼö ba niha sato enaʼö mangawuli ira.+
23 Me no mofanö niha sato, möi ia ba hili, ilau mangandrö.+ Ba me no bongi, ha yaʼia ba daʼö.
24 Me no fandröndröu ira moroi ba danö, iʼoloiʼö dundrahara bade börö me fazuzu nangi.
25 Me arakhagö moluo,* iʼondrasi ndra nifahaʼönia, mowaö-waö ia ba dete nasi.
26 Me laʼila ia ira nifahaʼönia mowaö-waö ba dete nasi, tokea ira lamane, ”Hiza lumö-lumö!” Ba moʼira ira ba waʼataʼu.
27 Iʼanemaiʼö ifahede ira Yesu imane, ”Böi miʼataʼufi! Yaʼodo daʼa.”+
28 Imane Fetero, ”He Soʼaya, na sindruhu yaʼugö daʼö, waʼö khögu enaʼö möido khöu ba dete nidanö.”
29 Imane khönia Yesu, ”Aine!” Ba möi tou Wetero moroi ba dundraha, mowaö-waö ia ba dete nidanö iʼondrasi Yesu.
30 Hizaʼi, ataʼu ia me iʼila mbade, ibörögö ahöndrö ia. Ilau muʼao, ”He Soʼaya, tolodo!”
31 Iʼanemaiʼö iʼoroʼö dangania Yesu, igogohe danga Wetero imane, ”He sambö famati, hana wa aombö dödöu?”+
32 Me no möi ira yawa ba dundraha, tebato mbade.
33 Lamane khönia ira nifahaʼönia yawa ba dundraha si fao fangalulu, ”Duhu wa Ono Lowalangi ndraʼugö.”
34 Me no larugi yefo, lasawa danö Genesare.+
35 Me laʼila ia niha, laʼombakhaʼö duriania ba zi fasui banua andrö, ba laʼohe khönia fefu niha sofökhö.
36 Laʼandrö khönia, na tola he ha lagogohe gahe mbarunia,+ ba fefu niha sololohe ahe mbarunia ahori döhö.
Nisura ba gahe zura
^ Yaʼia daʼö Herode Atifasi. Faigi Geluaha Ngawua Wehede.
^ Sin.: ”ifahowuʼö”.
^ Mato bözi 3 irugi bözi 6 arakhagö moluo.
