Nisura Mataiʼo 16:1-28
16 Ba möi ndra Farizaiʼo hegöi ira Sadukaiʼo wangondrasi Yesu ba wanandraigö yaʼia. Laʼandrö khönia enaʼö iʼoromaʼö dandra moroi ba zorugo.+
2 Itema lira Yesu, ”Na tanö owi, na oyo gahe mbanua, ba miʼila wa molökhö,
3 ba na sihulö wongi, na oyo gahe mbanua ba haumö, miʼila wa moteu maʼökhö daʼö. Miʼila sa, hadia moteu mazui löʼö na mifaigi dalu mbanua, hizaʼi lö miʼila geluaha ngawalö zalua iadaʼa.*
4 Niha ba ginötö andre, lö sökhi ba faröi ira.* Lö labato wangandrö tandra sahöli-höli dödö,+ hizaʼi lö laʼila dandra sahöli dödö baero zalua khö Yona.”+ Aefa daʼö, mofanö ia moroi ba daʼö.
5 Me mofanö ira yefo nidanö, olifu ndra nifahaʼö Yesu wolohe roti.+
6 Imane Yesu, ”Miʼangelama ba ragi Warizaiʼo andrö hegöi Sadukaiʼo.”+
7 Faoma lamane khö nawöra, ”Andrö wa iwaʼö daʼö Yesu, te börö me lö niʼoheda roti.”
8 Börö daʼö, imane khöra Yesu, ”No ambö famatimi. Hana wa midunö-dunö nasa roti si lö niʼohemi?
9 Hadia lö aboto ba dödömi geluaha wehedegu? Hadia olifu ami me ubeʼe gö ndra matua si 5.000 niha, ha lima roti, ba oya nasa zi töra me miʼowuloi ba raga-raga?+
10 Mazui me ubeʼe gö ndra matua si 4.000 niha, ha fitu roti, ba oya nasa zi töra me miʼowuloi ba raga-raga sebua?+
11 Hana wa lö aboto ba dödömi wa tenga daʼö nifatunögu sanandrösa ba roti? Ufasugi ba dödömi enaʼö miʼangelama ba ragi Warizaiʼo hegöi Sadukaiʼo.”+
12 Awena laʼila wa tenga daʼö nifasugi Yesu ba dödöra enaʼö mangelama ira ba ragi roti, hizaʼi moʼamakhaita ia ba wamahaʼö ndra Farizaiʼo hegöi Sadukaiʼo.
13 Me irugi Yesu danö Kaisarea Filifi, manofu ia khö ndra nifahaʼönia, ”Fangumaʼö niha sato, haniha Nono niha andrö?”+
14 Lamane, ”So zangumaʼö Yohane Samayagö Idanö,+ so göi zangumaʼö Elia,+ Yeremia, mazui samaʼeleʼö tanö böʼö.”
15 Imane Yesu, ”Moloʼö yaʼami, haniha ndraʼodo andre?”
16 Itema linia Simoni Fetero, ”Keriso ndraʼugö,+ Ono Lowalangi sauri.”+
17 Imane khönia Yesu, ”Yaʼahowu ndraʼugö Simoni ono Yona, börö me tenga moroi ba niha öʼila, hizaʼi moroi khö Namagu ba zorugo.+
18 Ba yaʼodo göi uwaʼö khöu: Fetero ndraʼugö,+ ba dete gara andre+ dania utaruʼö mbanua niha Keriso khögu, ba lö ikalaisi ia faʼamate.*
19 Ubeʼe khöu nono kusi Wamatörö Lowalangi ba zorugo. Gofu hadia ia niböbömö ba gulidanö no teböbö ba zorugo, ba gofu hadia ia niʼefaʼöu ba gulidanö, ba niʼefaʼö göi ba zorugo.”
20 Aefa daʼö, iʼabeʼeʼö wehede khö ndra nifahaʼönia enaʼö lö laʼombakhaʼö ba niha böʼö wa yaʼia andrö Keriso.+
21 Iʼotarai daʼö, ifatunö Yesu khö ndra nifahaʼönia wa hasambalö möi ia ba Yeruzalema ba lafakao ia ira sondröniaʼö Yahudi, kafalo gere hegöi sangila amakhoita, aefa daʼö labunu ia. Na no irugi tölu hari ba tesusugi ia.+
22 Me irongo daʼö Fetero, iʼohe Yesu ba zingania, itegu imane, ”He Soʼaya, hakhösi tödö ndraʼugö. Böi alua khöu zimane daʼö.”+
23 Ibaliʼö ia Yesu imane, ”Ae furigu Satana! Fangalagu ndraʼugö börö me lö öfatou-tou tödöu gera-era Lowalangi, ha fangera-ngera niha.”+
24 Aefa daʼö, imane Yesu khö ndra nifahaʼönia, ”Na so zomasi moloʼö yaʼo, yamuʼositengagö ia* ba yamuluʼi döla geu famakao* andrö, ba yamuʼoʼö ndraʼo.+
25 Haniha zangalui faʼanau nosonia hasambalö mate. Hizaʼi, haniha zi mate börö ndraʼo ba ifuli teʼorifi.+
26 Hadia gunania ba niha na isöndra hare ba gulidanö andre ba teʼala nosonia?+ Mazui, hadia nibeʼe niha si möi höli nosonia?+
27 Tohare dania Nono niha andrö ba lakhömi Namania si fao ira malaʼika, ba ibeʼe zulö ba niha moloʼö amuatara zamösana.+
28 Yafaduhu dödömi, so ösa zi lö mate moroi ba gotaluami irege laʼila waʼatohare Nono niha andrö ba Wamatörönia.”+
Nisura ba gahe zura
^ Sin.: ”tandra ginötö”.
^ Sin.: ”sohorö-horö”.
^ Sin.: ”bawandruhö Hades”. Faigi Geluaha Ngawua Wehede.
^ Mazui ”yaʼilawa gisö-isö dödönia”.
^ Faigi Geluaha Ngawua Wehede.
