Nisura Mataiʼo 17:1-27
17 Önö hari aefa daʼö, möi Yesu ba hili salawa, iʼohe awönia Wetero, Yakobo ba Yohane talifusönia. Ha yaʼira zi möi.+
2 Ba daʼö, iʼanemaiʼö faböʼö zikhala Yesu fönara, mohaga mbawania hulö haga luo, ba takile waʼafusi nukhania.+
3 Aefa daʼö, izumaigö laʼila Moze hegöi Elia, fahuo-huo ira khö Yesu.
4 Ba imane Fetero khö Yesu, ”He Soʼaya, sökhi sibai khöda nahia daʼa. Na omasiʼö, ufasindro tölu ngawua nose ba daʼa. Sambua khöu, sambua khö Moze, ba sambua khö Gelia.”
5 Me fahuhuo nasa Wetero, iʼanemaiʼö so lawuo si haga solumöʼö yaʼira. Ba terongo li moroi ba lawuo andrö imane, ”Onogu daʼa, niʼomasiʼögu, omuso dödögu khönia.+ Mifondrondrongo niwaʼönia.”+
6 Me larongo li andrö ira nifahaʼö, agataʼu ira ba latuhi danö.
7 Aefa daʼö, iʼondrasi ira Yesu, itufa ira tangania imane, ”Miʼozizio, böi miʼataʼufi.”
8 Me lafakhölö ira, ha Yesu niʼilara.
9 Me möi ira tou moroi ba hili, ifangelama ira Yesu, ”Böi miʼombakhaʼö ba niha zalua andre, irugi tesusugi dania Nono niha moroi ba ngai zi mate.”+
10 Hizaʼi, manofu ndra nifahaʼönia, ”Na simanö, hana wa lawaʼö ira sangila amakhoita wa oföna tohare Gelia moroi khö Keriso?”+
11 Imane khöra, ”Atulö wa tohare dania Gelia ba ifuli iʼazökhi fefu hadia ia.+
12 Sindruhunia, no tohare Gelia. Hizaʼi, lö niha sangila yaʼia ba lafalua khönia zomasi dödöra.+ Simanö göi zalua ba Nono niha, lafakao ia dania.”+
13 Aboto ba dödö ndra nifahaʼö wa fehede Yesu andrö manandrösa khö Yohane Samayagö Idanö.
14 Me laʼondrasi niha sato,+ so samösa ndra matua si möi khö Yesu ba mangalulu ia imane,
15 ”He Soʼaya, hakhösi tödö nonogu. Abölö-bölö wökhönia, maniri. Asese aekhu ia ba galitö hegöi ba nidanö.+
16 No uʼohe ia khö ndra nifahaʼömö, ba tebai lafadöhö.”
17 Imane Yesu, ”He yaʼami niha* sebua horö ba si lö famati,+ hawaʼara nasa toröi ndraʼo khömi? Hawaʼara nasa ubologö dödögu khömi? Ohe nono andrö ba daʼa.”
18 Aefa daʼö, ifofanö malaʼika si lö sökhi si so ba mboto nono daʼö, ba me kalua ia, iʼanemaiʼö döhö nono andrö.+
19 Ba tohare ndra nifahaʼönia, ba manofu ira khönia ba zi lö niha-niha, ”Hana wa tebai mafofanö malaʼika si lö sökhi andrö?”
20 Imane khöra, ”Börö me ambö famatimi. Sindruhunia, na so khömi wamati simane faʼebua hunö sesawi, tola miwaʼö ba hili andre, ’Fawuʼaʼö moroi ba daʼa,’ ba hasambalö tewuʼa ia. Lö hadöi si tebai mifalua.”+
21 * ——
22 Me owulo ira ba Galilaia, imane Yesu, ”So dania zi manga mböli Nono niha, labeʼe ia ba danga zi faʼudu khönia,+
23 ba labunu ia. Hizaʼi, ifuli tesusugi ia ba ngaluo si tölu.”+ Ba abu sibai dödöra.
24 Me no larugi Gafanauma, laʼondrasi Wetero ira sangai pajak gosali.* Manofu ira, ”Hadia ibuʼa pajak gosali gurumö mazui löʼö?”+
25 Itema lira, ”Ibuʼa.” Hizaʼi, me möi Wetero ba nomo, oföna isofu khönia Yesu, ”He Simoni, hewisa moloʼö yaʼugö? Haniha zamuʼa beʼelö mazui pajak khö ndra razo ba gulidanö andre? Hadia iraonora mazui niha böʼö?”
26 Imane Fetero, ”Niha böʼö.” Iwaʼö khönia Yesu, ”Na simanö, lö moguna labuʼa pajak iraononia.
27 Hizaʼi, lö omasi ita na tobali fangala khöra.+ Börö daʼö, ae fagai ba nasi, ba halö giʼa si oföna ögaini. Ba mbawania, ösöndra sambua loga firö.* Halö ba buʼa gömöda darua ita.”
Nisura ba gahe zura
^ Mazui ”ngaʼötö”.
