Nisura Mataiʼo 18:1-35
18 Me luo daʼö, möi khö Yesu ndra nifahaʼönia ba manofu ira, ”Haniha zindruhunia zabölö ebua ba Wamatörö Lowalangi ba zorugo?”+
2 Ikaoni samösa nono side-ide Yesu ba iʼohe fönara.
3 Imane, ”Na lö mifalalini gera-erami ba tobali simane ono side-ide andre ami,+ yafaduhu dödömi, lö tefaʼamöi ami ba Wamatörö Lowalangi ba zorugo.+
4 Hizaʼi, haniha zangide-ngideʼö yaʼia simane ono side-ide andre, daʼö zabölö ebua ba Wamatörö Lowalangi ba zorugo.+
5 Na so zanemaʼö ono side-ide andre börö döigu, eluahania no göi itemaʼö ndraʼo.
6 Ba na so zanaisi niha simane ono side-ide andre enaʼö lö mamati ia khögu, abölö sökhi latawi ba mbaginia gara sebua,* aefa daʼö latiboʼö ia ba nasi.+
7 ”Alai gulidanö andre börö me samobörö fangala! Atulö sa wa lö tola löʼö so wangala, hizaʼi alai zamobörö fangala!
8 Andrö, na iʼalani ndraʼugö tangau ba ma aheu, taba ia ba tiboʼö.+ Abölö sökhi na ha tambai dangau mazui aheu, ba ökhamö waʼauri, moroi na so dua dangau ba aheu, hizaʼi tetiboʼö ndraʼugö ba galitö si lö mate-mate.+
9 Simanö göi na iʼalani ndraʼugö höröu, koe ia ba tiboʼö. Abölö sökhi na ha tambai höröu ba ökhamö waʼauri moroi na so dombua höröu ba tetiboʼö ndraʼugö ba Gehena* si hola-hola.+
10 Böi miʼositengagö niha simane ono side-ide andre. Uwaʼö khömi, malaʼikara andrö lö mamalö-malö laʼila mbawa Namagu si so ba zorugo.+
11 * ——
12 ”Hewisa moloʼö yaʼami? Na so zokhö biri-biri si 100 ngaʼeu ba sageu zelungu,+ hadia lö iröi zi 99 ngaʼeu ba hili ba wangalui si sageu si no elungu andrö?+
13 Ba na no isöndra, abölö omuso dödönia wamaigi si sageu andrö moroi ba mbiri-biri si 99 ngaʼeu si lö elungu.
14 Simanö göi Namagu* si so ba zorugo, lö omasi ia na tekiko fazamösa niha simane ono side-ide andre.+
15 ”Na fasala dalifusöu, mifahuhuo darua ami ba tegu ia.+ Na ifondrondrongo, no ösöndra dalifusöu.+
16 Ba na lö ifondrondrongo, halö awöu zamösa tö mazui darua börö me aro huhuo niwaʼö zi darua ma si datölu samaduhuʼö.+
17 Ba na lö ifondrondrongo, ombakhaʼö ba mbanua niha Keriso. Ba na lö ifondrondrongo niwaʼö mbanua niha Keriso, yahulö simane soi böʼö ia khöu+ mazui sanugi pajak.+
18 ”Yafaduhu dödömi, hadia niböbömi ba gulidanö, ba no teböbö ba zorugo. Ba hadia niʼefaʼömi ba gulidanö, ba no teʼefaʼö ba zorugo.
19 Na so darua ba gotaluami ba gulidanö andre zi hasara tödö ba wangandrö sabölö moguna, yafaduhu dödömi, hasambalö iʼamualagö Amagu si so ba zorugo.+
20 Hezo owulo zi darua ma si datölu niha ba döigu,+ so ndraʼo ba gotaluara.”
21 Aefa daʼö, manofu Wetero, ”He Soʼaya, na so dalifusögu si fasala khögu, hauga kali uʼefaʼö zalania? Hadia irugi fitu kali?”
22 Itema linia Yesu, ”Uwaʼö khöu, tenga ha irugi 7 kali, hizaʼi irugi 77 kali.+
23 ”Daʼö mbörö wa fakhili ira Wamatörö Lowalangi ba zorugo andrö simane samösa razo. Omasi ia na labuʼa woʼömöra khönia ira sawuyunia.
24 Me ibörögö wangerai, laʼohe fönania samösa zawuyu soʼömö 10.000 talenta.*
25 Hizaʼi, me lö khönia famuʼa, iʼandrö khönia razo enaʼö ifamawa fefu gokhötania, foʼomonia, ononia hegöi yaʼia samösa ba wamuʼa foʼömö andrö.+
26 Ituhi danö sawuyu andrö, mangalulu ia khö razo imane, ’Beʼe khögu ginötö, hasambalö ubuʼa woʼömögu.’
27 Börö waʼahakhö dödö razo, iʼefaʼö ba ibeʼe bualania woʼömö andrö.+
28 Me möi baero zawuyu andrö, ifalukhaisi zawuyu tanö böʼö soʼömö khönia 100 dinar,* iraʼu nawönia sawuyu andrö, itögi mbagi imane, ’Buʼa gömöu.’
29 Ituhi danö awönia sawuyu andrö, mangalulu ia imane, ’Beʼe khögu ginötö, hasambalö ubuʼa woʼömögu.’
30 Hizaʼi, lö omasi ia. Ifakuruʼö nawönia andrö, irege ibuʼa fefu woʼömönia.
31 Me laʼila ira sawuyu tanö böʼö zalua andrö, abu sibai dödöra. Andrö möi lafatunö khö razo.
32 Ikaoni zawuyu daʼö razo imane, ’Sawuyu si lö sökhi ndraʼugö! Me mangalulu ndraʼugö khögu, no ubeʼe bualagu khöu woʼömöu.
33 Sindruhunia menaʼö, öhakhösi tödö göi nawömö andrö, simane faʼahakhö dödögu khöu.’+
34 Mofönu sibai khönia razo, ifakuruʼö irege abuʼa fefu woʼömönia.
35 Simanö göi Namagu ba zorugo, ifalua khömi zimane daʼö+ na lö miʼefaʼö zala dalifusömi soroi ba dödömi.”+
Nisura ba gahe zura
^ Mazui ”gara sebua nifuta galide”. Kara daʼa niʼogunaʼö ba wogili gandru.
^ Faigi Geluaha Ngawua Wehede.
^ Mazui te ”Namami”.
