Nisura Mataiʼo 19:1-30
19 Me no aefa iwaʼö daʼö fefu, mofanö Yesu moroi ba Galilaia möi ia ba nola mbanua si numalö ba Yudea yefo Nungo Nidanö Yoridano.+
2 Ato niha soloʼö yaʼia, ba ahori ifadöhö ira fefu.
3 Laʼondrasi ia ira Farizaiʼo ba wanandraigö yaʼia. Manofu ira, ”Hadia tola ifabali* woʼomonia niha gofu hadia manö mbörö?”+
4 Itema lira, ”Hadia lö irai mibaso wa Lowalangi zamazökhi niha, he ira matua hegöi ira alawe iʼotarai mböröta?+
5 Imane Lowalangi, ’Andrö iröi dania namania niha awö ninania, ba lö aetu falemba dödönia* khö ngambatönia ba ha sambua boto ira.’+
6 Andrö, tenga saʼae darua ira, hizaʼi ha sambua boto. Börö daʼö, hadia niʼosambuaʼö Lowalangi tebai ifabali niha.”+
7 Lamane ira Farizaiʼo, ”Na simane daʼö, hana wa ifarou niha Moze wameʼe sura wabalisa moloʼö huku, ba wamabali foʼomonia?”+
8 Imane khöra, ”Börö waʼabeʼe högömi, andrö itehe khömi Moze wamabali foʼomomi.+ Hizaʼi, ba wamobörö, tenga simane daʼö zindruhunia.+
9 Börö daʼö, ufatunö khömi na so zamabali foʼomonia, na tenga börö wohorö,* aefa daʼö ifuli mangowalu zui, no sohorö daʼö.”+
10 Lamane khönia ira nifahaʼönia, ”Na simane daʼö hukunia, abölö sökhi lö mangowalu.”
11 Imane khöra, ”Lö fefu niha tola simane daʼö, ha niha si no manema buala zamalua daʼö.*+
12 So zi lö mangowalu* börö me mofökhö iʼotarai dalu ninania. So zi lö mangowalu börö wolau niha böʼö khönia. So zangai angetula lö omasi ia mangowalu enaʼö oya itehegö ginötönia ba wotuhini halöwö Famatörö zorugo. Na tola itaha dödönia si samösa niha lö mangowalu, yaʼifalua daʼö.”+
13 Aefa daʼö, laʼohe khö Yesu ndraono side-ide enaʼö ifahowuʼö ba mangandrö ia ba ndraono andrö. Hizaʼi, mofönu ndra nifahaʼönia khöra.+
14 Imane khöra Yesu, ”Mifaʼamöi khögu ndraono andrö. Böi mitaha ira, börö me simane yaʼira andre zangokhögö Famatörö zorugo andrö.”+
15 Aefa daʼö, ifahowuʼö ndraono andrö ba mofanö ia moroi ba daʼö.
16 So samösa zangondrasi yaʼia imane, ”He Samahaʼö, hadia zi sökhi sinangea ufalua enaʼö usöndra waʼauri si lö aetu?”+
17 Itema linia Yesu, ”Hana wa ösofu khögu zi sökhi? Ha samösa zi sökhi.+ Na omasiʼö ötema waʼauri si lö aetu, böi böhöli woloʼö oroisa Lowalangi.”+
18 Itohugö wanofu, ”Oroisa hadia?” Imane Yesu, ”Böi bunu niha,+ böi ohorö,+ böi anagö,+ böi böbögö zi lö duhu,+
19 fosumange namau awö ninau,+ ba omasiʼö nawöu simane faʼomasiu ndraʼugö.”+
20 Imane khönia ono matua andrö, ”No ufalua daʼö fefu, hadia zambö nasa?”
21 Imane khönia Yesu, ”Na omasiʼö moʼahonoa, famawa fefu haratomö ba kefe daʼö beʼe ba zi numana, ba ösöndra haratomö ba zorugo.+ Aefa daʼö, oʼö ndraʼo.”+
22 Me irongo daʼö ono matua andrö abu dödönia, börö me ebua haratonia.+
23 Imane Yesu khö ndra nifahaʼönia, ”Sindruhu niwaʼögu khömi, afökhö ba zoʼanaʼa wogamö Famatörö zorugo andrö.+
24 Sindruhunia, aoha ba gondra wanörö tögi walölöwa moroi na ikhamö Wamatörö Lowalangi niha soʼanaʼa.”+
25 Me larongo daʼö ira nifahaʼö, tokea dödöra lamane, ”Na simane daʼö, haniha niʼorifi dania?”+
26 Ifaigi ira Yesu imane, ”Si tebai ba niha, ba tola khö Lowalangi.”+
27 Imane Fetero, ”No maröi fefu hadia ia ba maʼoʼö ndraʼugö. Na simanö, hadia dania nitemama?”+
28 Imane khöra Yesu, ”Sindruhu niwaʼögu khömi, na tebohouni fefu dania* ba ginötö modadao Nono niha ba lakhöminia andrö, yaʼami soloʼö yaʼo, modadao ami ba zi 12 dadaoma ba wanguhuku si 12 mado ndraono Gizaraʼeli.+
29 Ba haniha zondröi omonia, talifusönia matua ba talifusönia alawe, amania faoma inania, ononia, mazui tanönia börö ndraʼo, itema dania 100 winaeta ba isöndra waʼauri si lö aetu.+
30 ”Ato dania zi oföna tobali safuria, ba safuria tobali si oföna.+
Nisura ba gahe zura
^ Ba li Yunani, eluahania angetula wamabali si faronga moloʼö huku.
^ Mazui ”ba lö faröi ia”.
^ Ba li Yunani: porneia. Faigi Geluaha Ngawua Wehede.
^ Buala falömangowalu.
^ Mazui ”So sida-sida”.
^ Mazui ”na teʼazökhi mangawuli”.
