Nisura Mataiʼo 20:1-34
20 ”Famatörö Lowalangi ba zorugo andrö amaedola zokhö kabu nagu, mofanö ia sihulö wongi ba wangalui sohalöwö ba kabu nagu khönia.+
2 Me no fao dödö zohalöwö andrö ba gazi si sambua dinar* maʼökhö, ifatenge ira ba kabu nagu khönia.
3 Mato bözi 9 sihulö wongi,* mofanö ia zui, iʼila so niha si lö halö-halöwö ba fasa.
4 Imane khöra, ’Yaʼami göi, miʼaeʼe ba kabu nagu khögu, ba ubeʼe zinangea gazimi.’
5 Ba möi ira. Mato bözi 12 ba zi laluo* hegöi bözi 3 tanö owi,* ifuli mofanö zokhö kabu, ifalua zimane daʼö zui.
6 Ba gafuriata, mato bözi 5 tanö owi,* mofanö ia ba iʼila niha böʼö sozizio. Imane khöra, ’Hana wa no mozio-zio manö ami ba daʼa maʼö-maʼökhö lö halö-halöwö?’
7 Lamane khönia, ’Lö hadöi sameʼe halöwö khöma.’ Imane khöra, ’Yaʼami göi, miʼaeʼe ba kabu nagu khögu.’
8 Me no bongi saʼae, ikaoni mandrunia sokhö kabu. Imane, ’Kaoni ndra sohalöwö ba beʼe gazira.+ Börögö ba zafuria tohare, numalö ba zi oföna.’
9 Yaʼira samörögö fohalöwö bözi 5 tanö owi, latema sambua dinar* ero samösa.
10 Yaʼira sohalöwö siföföna tohare, lawalinga abölö ebua latema. Hizaʼi, ha sambua dinar* göi labeʼe khöra.
11 Börö daʼö, mukökö-kökö ira khö zokhö kabu nagu.
12 Lamane, ’Ha sambua za mohalöwö niha safuria tohare mege. Ba maʼö-maʼökhö ndraʼaga ba zino siriri-riri, hana wa fagölö gazima öbeʼe?’
13 Itema lira imane, ’He kawa, lö fasala ndraʼo khöu. Hadia lö si fao dödöu ba wanema gazi si sambua dinar* mege?+
14 Halö dana khöu ba ofanö. Ufagölösi wameʼe gazimi ba niha safuria tohare mege.
15 Hadia tebai ufalua zomasi dödögu ba gefegu? Mazui, afökhö dödöu* börö me sökhi gamuatagu* khöra?’+
16 Na simane daʼö, niha safuria tobali si oföna, ba niha si oföna tobali safuria.”+
17 Me möi ia ba Yeruzalema, iwaʼö khö ndra nifahaʼönia si 12 enaʼö lafabali ira wofanö moroi ba niha sato. Imane khöra,+
18 ”Möi ita ba Yeruzalema, ba tebeʼe Nono niha ba danga gafalo gere hegöi sangila amakhoita. Ba laʼetuʼö huku famunu khönia.+
19 Aefa daʼö, labeʼe ia ba danga soi böʼö ba wangoʼaya yaʼia, laleasi, ba labunu ba döla geu.+ Ba tesusugi ia ba ngaluo si tölu.”+
20 Aefa daʼö, tohare woʼomo Zebedaiʼo+ awö ndraononia si darua, laʼondrasi Yesu ba mangalulu ira khönia. So niʼandrönia khö Yesu.+
21 Imane khönia Yesu, ”Hadia niwaʼömö?” Itema li, ”Uʼandrö khöu enaʼö dumadao ndraonogu si darua andre ba zingamö ba Wamatörömö ba zorugo, samösa ba gambölöu ba samösa ba gaberau.”+
22 Imane khöra Yesu, ”Lö miʼila hadia niʼandrömi. Hadia tola mibadu nösi mako andrö nibadugu dania?”+ Lamane khönia, ”Tola.”
23 Imane khöra, ”Mibadu sa dania nösi mako andrö khögu.+ Hizaʼi, tenga yaʼo zotatugöi haniha zi dadao ba gambölö hegöi ba gaberagu, börö me no ihenaigö daʼö Amagu ba niha si no itatugöi.”+
24 Me larongo daʼö ira nifahaʼö si dafulu, mofönu ira khö zi darua si fatalifusö andrö.+
25 Ikaoni ira Yesu, imane khöra, ”No miʼila wa mamatörö razo ba nono mbanuara ba gulidanö andre. Simanö göi ndra samatörö, laʼogunaʼö kuasora ba wamatörö ono mbanuara.+
26 Hizaʼi, tebai simane daʼö ami.+ Haniha zomasi ebua, yatobali ia enoni niha böʼö,+
27 ba haniha zomasi tobali siföföna, yatobali ia sawuyumi.+
28 Simane Ono niha, tenga si möi mangoni, no si möi enoni,+ sameʼe nosonia höli zato.”+
29 Me laröi mbanua Yerikho, ato zoloʼö yaʼia.
30 So darua ndra matua sauʼa si dadao ba zinga lala. Me larongo itörö Yesu, muʼao ira lamane, ”He Soʼaya, Maʼuwu Dawido, hakhösi tödö ndraʼaga!”+
31 Mofönu khöra niha sato ba lawaʼö enaʼö lahonogö ira. Hizaʼi, itugu ebua lira weʼao, ”He Soʼaya, Maʼuwu Dawido, hakhösi tödö ndraʼaga!”
32 Ibatogö ia Yesu, ikaoni ira imane, ”Hadia zomasi ami ufalua?”
33 Lamane, ”He Soʼaya, omasiga maʼila niha.”
34 Börö waʼahakhö dödönia, ibabaya höröra+ Yesu ba iʼanemaiʼö laʼila niha. Aefa daʼö, laʼoʼö Yesu.
Nisura ba gahe zura
^ Sin.: ”Te me inötö si medölu”.
^ Sin.: ”Te me inötö si meʼönö”.
^ Sin.: ”Te me inötö si meziwa”.
^ Sin.: ”Te me inötö mewelezara”.
^ Sin.: ”lö sökhi höröu”.
^ Mazui ”oböwö ndraʼo”.
