Nisura Mataiʼo 21:1-46
21 Me no ahatö ira ba Yeruzalema, me larugi Mbetifage ba Hili Zaitu, ifatenge darua ndra nifahaʼönia Yesu.+
2 Imane khöra, ”Miʼaeʼe ba mbanua side-ide andrö föna, ba miʼila dania sageu galide si no mufesu fao nono. Miʼefasi mböbönia ba miʼohe ba daʼa khögu.
3 Na so zanofu, mimane khöra, ’Moguna khö Zoʼaya.’ Ba hasambalö latehegö khömi.”
4 Sindruhunia wa alua daʼö enaʼö itörö niwaʼö zamaʼeleʼö me imane,
5 ”Waʼö khö Ziona, ’Hiza! Tohare razomö,+ mangide-ngideʼö ia,+ so ia ba hulu nono galide, ono gurifö sonoro.’”+
6 Lafalua niwaʼö Yesu andrö ira nifahaʼö.+
7 Ba laʼohe galide andrö awö nononia. Labeʼe ba hulu galide mbarura tanö baero ba modadao Yesu ba hulu nono galide andrö.+
8 Ato niha samologö ba lala barura tanö baero,+ so göi zanaba daha geu, lafazawili ba lala.
9 Aefa daʼö, muʼao niha sato si so föna hegöi soloʼö Yesu moroi furi, ”He Lowalangi, lumöʼö* Maʼuwu Dawido!+ Yatefahowuʼö zi tohare ba döi Yehowa!*+ Yaʼugö si so ba zorugo, beʼe khönia wangorifi!”+
10 Oi tehöngö ba mbanua me no irugi Yeruzalema ba manofu-nofu ira, ”Haniha niha daʼa?”
11 Lamane niha sato soloʼö Yesu, ”Yaʼia andrö Yesu,+ samaʼeleʼö moroi ba Nazareta, banua Galilaia!”
12 Möi Yesu ba gosali, ifofanö zamawa hegöi sowöli ba daʼö. Ifalaula meza zanukari kefe hegöi baku-baku zamawa marafadi.+
13 Imane, ”No so ba zura, ’Omogu lafotöi omo wangandrö’,+ hizaʼi mibaliʼö omo zorabu.”+
14 Laʼondrasi ia niha sauʼa ba sakela-kela ba gosali, ba ahori ifadöhö ira fefu.
15 Oya dandra sahöli-höli dödö nifalua Yesu niʼila ndra kafalo gere hegöi sangila amakhoita. Ba larongo ndraono matua siʼao-ao ba gosali, ”He Lowalangi, lumöʼö Maʼuwu Dawido!”+ ba abao dödöra.+
16 Lamane khönia, ”Hadia örongo-rongo niwaʼöra andrö?” Itema lira Yesu, ”Urongo. Hadia lö irai mibaso, ’Öbokai mbawa ndraono side-ide hegöi sawena tumbu ba wameʼe fanuno’?”+
17 Aefa daʼö iröi ira, mofanö ia ba Mbetania, ba daʼö mörö ia.+
18 Me mangawuli ia ba Yeruzalema sihulö wongi sibai, irasoi waʼolofo.+
19 Ifaigi döla geu ara ba zinga lala, ba möi ia ba daʼö. Hizaʼi, lö yawa bua. Ha bulu zi so.+ Imane ba döla geu andrö, ”Iʼotarai iadaʼa, yalömowua ndraʼugö saʼae.”+ Iʼanemaiʼö mate döla geu ara andrö.
20 Ahöli-höli dödö ndra nifahaʼö me laʼila daʼö ba lamane, ”Hewisa wa tola iʼanemaiʼö mate döla geu ara andrö?”+
21 Itema lira Yesu, ”Sindruhu niwaʼögu, na mamati ami ba lö aombö dödömi, hasambalö tola mifalua zimane nifaluagu ba döla geu andrö. Ba tenga ha daʼö, na miwaʼö göi ba hili andre enaʼö muzawa ba tezaumba ba nasi, tola alua daʼö.+
22 Na mamati ami, fefu niʼandrömi ba wangandrö hasambalö mitema.”+
23 Aefa daʼö, möi ia ba gosali. Me mamahaʼö ia, laʼondrasi ia ira kafalo gere hegöi sondröniaʼö ba soi daʼö, lamane, ”Hezo moroi khöu waʼabölö ba wamalua daʼa fefu? Haniha zameʼe khöu faʼabölö daʼö?”+
24 Itema lira Yesu, ”So göi nisofugu khömi. Na mitema ligu, awena ufatunö khömi dania hezo usöndra waʼabölö ba wamalua daʼa fefu.
25 Famayagö idanö nifalua Yohane andrö, moroi ba zorugo mazui moroi ba niha?” Oi zara fangöngö-ngöngö ira, ”Na tawaʼö, ’Moroi ba zorugo,’ imane khöda dania, ’Ba hana wa lö faduhu dödömi khönia?’+
26 Na tawaʼö, ’Moroi ba niha,’ tola manö mofönu dania niha sato börö me lawaʼö Yohane andrö samaʼeleʼö.”
27 Latema li Yesu, ”Lö maʼila.” Imane göi khöra Yesu, ”Na simane daʼö, lö uʼombakhaʼö khömi göi hezo usöndra waʼabölö ba wamalua daʼa fefu.
28 ”Hewisa moloʼö yaʼami? Samösa ndra matua, darua khönia ndraono. Ifatenge ziaʼa, ’He onogu, ae ohalöwö ba kabu nagu khöda maʼökhö.’
29 Itema li namania, ’Lö möido,’ hizaʼi ba gafuriata maniasa ia ba möi manö ia.
30 Aefa daʼö, ifatenge göi ziakhi. Itema li namania, ’Lau Pa,’ ba lö sa möi ia.
31 Haniha ndraono soloʼö li namania?” Latema linia, ”Siaʼa.” Imane khöra Yesu, ”Yafaduhu dödömi, ira sanugi pajak hegöi sohorö-horö, daʼö zi oföna mondrugi Famatörö Lowalangi moroi khömi.
32 Me tohare Yohane ba wamahaʼö sindruhu, lö faduhu dödömi khönia. Hizaʼi, ira sanugi pajak hegöi sohorö-horö, faduhu dödöra khönia.+ Hewaʼae no miʼila daʼö fefu, lö khömi faniasa ba lö manö nasa faduhu dödömi.
33 ”Mifondrondrongo gamaedola tanö böʼö: Samösa zokhö tanö, ifazökhi kabu nagu.+ Ikölini fasui, ihaogö naha wamera agu ba ifasindro malige naha zanaro.+ Ifaʼokosiʼö ba niha sohalöwö ba danö, aefa daʼö mofanö ia ba danö saröu.+
34 Me irugi inötö waneteu bua nagu, ifatenge zawuyunia khö ndra sohalöwö ba danö ba wangai tana khönia.
35 Hizaʼi, laraʼu zawuyunia andrö ira sohalöwö ba danö, so niböbözi, so nibunu, ba so nitebu kara.+
36 Aefa daʼö, ifuli zui ifatenge zawuyunia sabölö ato, hizaʼi lafalua göi khöra zimane daʼö.+
37 Ba gafuriata, ifatenge nononia imane, ’Tatu laʼataʼufi nonogu andre.’
38 Me laʼila nono zokhö kabu nagu andrö, lamane ira sohalöwö ba danö, ’Yaʼia zangokhögö kabu daʼa dania.+ Aine, tabunu ia ba tahalö gokhötania!’
39 Laraʼu ba ladöni ia moroi ba kabu, aefa daʼö labunu.+
40 Me tohare zokhö kabu, hadia nifaluania khö ndra sohalöwö ba danö andrö?”
41 Latema linia, ”Börö me lö sökhi ndra niha daʼö, hasambalö ibunu ira sokhö kabu, ba ifaʼokosiʼö kabu nagu andrö ba zohalöwö tanö böʼö sameʼe khönia bua na inötö wamasi.”
42 Manofu Yesu, ”Hadia lö irai mibaso ayati daʼa? ’Kara nitimbagö zamazökhi omo, no tobali kara* sabölö moguna.+ Moroi khö Yehowa* daʼö ba ahöli-höli dödöda.’+
43 Andrö wa ufatunö khömi: Laheta dania khömi Wamatörö Lowalangi ba tebeʼe ba soi böʼö samalua ohitö dödönia.
44 Dozi niha saekhu ba dete gara andrö tekiko.+ Ba niha nilangögö gara andrö afufu.”+
45 Me larongo daʼö, aboto ba dödö ndra kafalo gere hegöi ira Farizaiʼo wa khöra ifanandrösa gamaedola daʼö Yesu.+
46 Sindruhunia, omasi ira laraʼu Yesu, ba lö barani ira börö me yaʼia andrö samaʼeleʼö ba wamaigi niha.+
Nisura ba gahe zura
^ Ba li Yunani: hosanna.
^ Kara daʼa labeʼe ba gamaudu watalinga nomo enaʼö aro.
