Nisura Mataiʼo 24:1-51
24 Me iröi gosali Yesu, laʼondrasi ia ira nifahaʼönia ba latuturu khönia gosali andrö.
2 Imane khöra, ”Hadia no miʼila daʼö fefu? Yafaduhu dödömi, hasambalö wa tedudugö daʼö fefu dania. Lö hadöi saʼae kara si falaete ba nawönia kara.”+
3 Me modadao ia ba Hili Zaitu, möi khönia ndra nifahaʼönia ba zi ha yaʼi-yaʼira. Manofu ira, ”Ombakhaʼö khöma hawaʼara alua daʼö fefu, hadia dandra weʼasomö*+ hegöi tandra gamozua götö* daʼa?”+
4 Itema lira Yesu, ”Miʼangelama, böi so zamaelungu yaʼami,+
5 börö me ato dania zangogunaʼö töigu ba lamane, ’Yaʼodo Keriso,’ ba ato niha nifaelungura.+
6 Mirongo dania wasuwöta salua misa. Böi miʼataʼufi, börö me hasambalö alua daʼö. Hizaʼi, tenga nasa amozuania daʼa.+
7 ”Maoso dania zi sambua soi isuwö soi böʼö, simanö göi zalua ero sambu-sambua famatörö.+ Alua lofo sabölö-bölö misa+ hegöi duru danö.+
8 Daʼö fefu awena böröta wamakao.*
9 ”Lafakao ami niha dania+ ba labunu ami.+ Ba dozi soi fatiu dödöra khömi börö döigu andrö.+
10 Ato dania zi taya famati, tobali ira si manga mböli ba fatiu dödöra khö nawöra.
11 Ato dania zamaʼeleʼö sofaya samaelungu niha sato.+
12 Börö me tedou waʼalösökhi, ato dania zi taya faʼomasi.
13 Hizaʼi, sanau ölö irugi gamozua daʼö niʼorifi.+
14 Ba teturiaigö dania Wamatörö Lowalangi andrö, turia somuso dödö ba zi sagörö ulidanö misa,+ tobali famaduhuʼö ba ngawalö soi ba awena dania amozua götö danö andre.
15 ”Börö daʼö, so dania zataʼu ita solohe faʼatekiko, sosindro ba nahia niʼamoniʼö+ simane niwaʼö Danieli samaʼeleʼö (enaʼö aboto ba dödö zombaso, moguna ihaogö iʼangeragö). Na miʼila daʼö dania,
16 yaʼami si so ba Yudea, miʼoloi ba hili.+
17 Niha si so ba dete nomo,* böi möi ia tou ba wangai gama-gamania.
18 Niha si so ba kabu böi mangawuli ia yomo wangai barunia.
19 Alai ndra alawe sanabina ba si so ono sawuyu ba ginötö daʼö!
20 Böi miböhöli wangandrö enaʼö böi moloi ami ba mbaŵa deu mazui ba luo Sabato.
21 Ba ginötö daʼö dania, so wamakao sabölö-bölö+ si lö irai alua, iʼotarai me tewöwöi gulidanö irugi iadaʼa, ba lö göi saʼae alua dania.+
22 Sindruhunia, na lö laʼadogoiʼö ginötö andrö, samösa lö sauri. Hizaʼi, börö niha nifili wa laʼadogoiʼö ginötö andrö.+
23 ”Böi mifaduhusi tödö na so zangumaʼö, ’So ba daʼa Keriso!’+ mazui, ’So ia ba daʼö!’+
24 Na luo daʼö, ato Keriso faya ba samaʼeleʼö sofaya.+ Oya dandra sahöli-höli dödö nifaluara+ enaʼö tola lafaelungu niha nifili andrö.
25 Hiza! No ufangelama ami.
26 Börö daʼö, na so zangumaʼö, ’So ia ba danö si mate,’ böi ae ba daʼö. Mazui, ’So ia ba nahia si tobini,’ böi faduhusi tödö.+
27 Feʼaso* Nono niha andrö hulö gari mbanua si haga moroi ba gatumbukha irugi gaekhula.+
28 Gofu hezo so gamatela, ba daʼö owulo moyo.+
29 ”Lö ara me no aefa ginötö wamakao andrö, taya haga luo+ hegöi haga mbaŵa, atoru ndröfi ba modögö waʼabölö si so ba dalu mbanua.+
30 Aefa daʼö, oroma dandra Nono niha ba mbanua si yawa, ba mege-ege fefu mado ba gulidanö börö waʼabu dödö,+ laʼila waʼatohare Nono niha+ ba dete lawuo* si fao faʼabölö ba lakhömi sebua.+
31 Lafoli dorofe sebua li, ba ifatenge ndra malaʼikania ba wangowuloi niha nifili ba zi öfa watalinga nangi, iʼotarai mbalö mbanua si yawa irugi mbalö faföfö.+
32 ”Mihalö khömi wamahaʼö moroi ba döla geu ara: Na no tumbu ndrahania ba ibörögö mobulu, miʼila wa no ahatö mbaŵa lökhö.+
33 Simanö göi, na miʼila alua daʼö fefu, yaʼaboto ba dödömi wa lö ara tö tohare* Nono niha.+
34 Sindruhu niwaʼögu, lö ahori mate niha si sagötö andre irege alua daʼö fefu.
35 Awuʼa mbanua ba awuʼa danö, hizaʼi lö tebulö niwaʼögu sagötö faʼara.+
36 ”Samösa lö sangila baŵa hegöi inötö,+ he ira malaʼika ba zorugo, he Ono, ha Ama zangila.+
37 Feʼaso* Nono niha andrö+ hulö simane ba götö Noakhi.+
38 Fatua lö Anönö Danö Idanö, arörö niha ba wemanga-manga hegöi ba wamadu-madu, lafangowalu ndra matua ba labeʼe nihalö ndra alawe irege möi Noakhi ba nowo.+
39 Lö labeʼe dödöra irege Anönö Danö Idanö ba ahori ira fefu.+ Simane daʼö göi zalua dania na tohare Nono niha.
40 Ba luo daʼö, na so darua ndra matua ba nowi, laʼohe zi samösa ba laröi zi samösa.
41 Na so darua ndra alawe sanutu gandru, laʼohe zi samösa ba laröi zi samösa.+
42 Andrö böi miförö me lö miʼila ginötö waʼatohare Zoʼaya.+
43 ”Miʼangeragö daʼa: Na iʼila sokhö omo hauga bözi tohare zanagö ba zi bongi,+ tatu manö lö mörö ia enaʼö lö möi zanagö ba nomonia.+
44 Börö daʼö, mifaʼanö-anö ami+ börö me lö midöna-döna waʼatohare Nono niha.
45 ”Haniha zindruhunia zawuyu si lö faröi ba satua-tua, nifohalöwö zokhö yaʼia ba wondrorogö sohalöwö ba nomonia, ba wameʼe göra ba ginötö si tefaudu?+
46 Yaʼahowu zawuyu andrö me mohalö-halöwö ia ba ginötö tohare zokhö yaʼia!+
47 Yafaduhu dödömi, sawuyu daʼö nituyu zokhö yaʼia ba wondrorogö fefu haratonia.
48 ”Hizaʼi, na lö sökhi zawuyu andrö ba imane tödönia wa ara nasa tohare zokhö yaʼia,+
49 aefa daʼö ibörögö wamözi awönia sawuyu ba fao ia wemanga ba mamadu-madu ba niha si mabu-mabu,
50 tohare zokhö yaʼia ba ngaluo hegöi inötö si lö idöna-döna.+
51 Abölö-bölö wanguhukunia sawuyu andrö, ifazaumba ba naha niha samini tödö. Ba daʼö so wege-ege ba fatangisa mboha.+
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Hulö waʼafökhö nirasoi ndra alawe soʼono.
^ Oya nomo ba götö föna saloʼo tete si tola laʼogunaʼö ba wamalua halöwö.
^ Faigi Geluaha Ngawua Wehede.
^ Sin.: ”lawuo ba mbanua”.
^ Mazui ”so föna mbawandruhö”.
^ Faigi Geluaha Ngawua Wehede.
