Nisura Mataiʼo 25:1-46
25 ”Famatörö Lowalangi ba zorugo andrö amaedola nono alawe si dafulu solohe fandru+ ba si möi baero ba wotemaʼö marafule.+
2 Si dalima bodo, ba si dalima tö atua-tua.+
3 Si bodo laʼohe wandru hizaʼi lö laʼohe nönö-nönö wanikha.
4 Ba satua-tua, no laʼohe khöra nönö-nönö wanikha.
5 Börö me lö si tohare nasa marafule, manuköu ira fefu ba mörö.
6 Me talu mbongi, so ziʼao, ’Hiza marafule! Aine tatemaʼö ia.’
7 Maoso fefu ndraono alawe andrö ba lafaʼanö wandrura.+
8 Lamane si bodo khö zatua-tua, ’Beʼe khöma wanikhami andrö maʼifu, arakhagö mate wandruma.’
9 Lamane satua-tua, ’Te ambö khöda fefu. Miʼae miʼöli ba zamawa fanikha.’
10 Gasa-gasa wowölira fanikha tohare marafule. Iraono alawe si no mamaʼanö yaʼira, möi ira yomo fao khö marafule andrö ba walöwa+ ba laduhö mbawandruhö.
11 Aefa daʼö, tohare ndraono alawe si dalima no mege, lamane, ’He Pa, he Pa, bokai khöma mbawandruhö!’+
12 Itema lira, ’Lö uʼila haniha ami.’
13 ”Andrö böi miförö+ börö me lö miʼila mbaŵa hegöi inötö.+
14 ”Famatörö Lowalangi ba zorugo andrö hulö simane ira matua sofanö ba danö saröu, iwaʼö khö ndra sawuyunia enaʼö larorogö haratonia.+
15 Ibeʼe ba zi samösa lima talenta,* ba zi samösa dua talenta, ba safuria ibeʼe sambua talenta, dali waʼasagu khöra zamösana. Aefa daʼö mofanö ia ba danö saröu.
16 Sawuyu si no manema lima talenta, iʼanemaiʼö möi ia mogale, isöndra harenia lima talenta.
17 Sawuyu si no manema dua talenta, isöndra göi hare dua talenta.
18 Hizaʼi, sawuyu si no manema sambua talenta, mofanö ia, ikoʼo ba danö gefe* zokhö yaʼia andrö.
19 ”Ara aefa daʼö, tohare zokhö yaʼira ba wamareso hadia zi no lafalua ira sawuyunia andrö ba gefenia.+
20 Sawuyu si no manema lima talenta, möi ia föna iʼohe lima talenta tö zi no ifohare. Imane, ’He Sokhö yaʼo, no öbeʼe khögu lima talenta. Yaʼe hare nisöndragu, lima talenta tö.’+
21 Imane sokhö yaʼia, ’Sökhi sibai, sawuyu si sökhi ndraʼugö ba lö faröi! Lö si faröi ndraʼugö ba wondrorogö si ha maʼifu. Börö daʼö, ufataro ndraʼugö ba wamatörö sabölö oya.+ Omusoiʼö dödöu ba waʼomuso dödö zokhö yaʼugö.’+
22 Aefa daʼö, möi föna zawuyu si no manema dua talenta. Imane, ’He Sokhö yaʼo, no öbeʼe khögu dua talenta. Yaʼe hare nisöndragu, dua talenta tö.’+
23 Imane sokhö yaʼia, ’Sökhi sibai, sawuyu si sökhi ndraʼugö ba lö faröi! Lö si faröi ndraʼugö ba wondrorogö si ha maʼifu. Börö daʼö, ufataro ndraʼugö ba wamatörö sabölö oya. Omusoiʼö dödöu ba waʼomuso dödö zokhö yaʼugö.’
24 ”Ba gafuriata, möi föna zawuyu si no manema sambua talenta. Imane, ’He Sokhö yaʼo, aboto ba dödögu wa sabeʼe huku ndraʼugö. Öbasi zi lö nitanöu ba öʼowuloi mbua nowi ba zi lö mohalöwöʼö.+
25 Daʼö mbörö wa ataʼudo ba ukoʼo ba danö talenta nibeʼemö. Yaʼe ufuli khöu.’
26 Itema linia sokhö yaʼia, ’Sawuyu si lö sökhi ndraʼugö ba sareu, öʼila wa ubasi hewaʼae lö nitanögu ba uʼowuloi mbua nowi ba zi lö mohalöwödo.
27 Sindruhunia öʼiröʼö menaʼö gefegu* ba bank, enaʼö utema mbunga na mangawulido.
28 ”’Iadaʼa, mihalö khönia talenta andrö ba mibeʼe khö zawuyu sanöndra si fulu talenta.+
29 Dozi sa haniha zi so ba lanönö, ba tedou waʼaso khönia. Hizaʼi, ba niha si löʼö, laheta khönia zi so khönia andrö.+
30 Mifazaumba zawuyu si lö guna andrö baero ba zogömi-gömi. Ba daʼö so wege-ege ba fatangisa mboha.’
31 ”Na tohare Nono niha andrö+ ba lakhöminia si fao ira malaʼika fefu,+ modadao ia ba nahia solakhömi.
32 Teʼowuloi fönania fefu soi, oi zara iföfögö ira simane nifalua gubalo na ifabali mbiri-biri moroi ba nambi.
33 Ifaʼaso ba gambölönia mbiri-biri,+ hizaʼi ba gaberania nambi.+
34 ”Aefa daʼö, imane dania Razo khö zi so ba gambölönia, ’Yaʼami nifahowuʼö Namagu, mitema gondröita Wamatörö Lowalangi si no tehenaigö khömi fatua lö tumbu ngaʼötö niha ba gulidanö.*
35 Börö me olofo ndraʼo, no mibeʼe gögu. Me owökhi dödögu no mifabadugö khögu nidanö. Me tobali ndraʼo niha si fatewu ba no mihaogö wanemaʼö yaʼo.+
36 Me lö nukhagu, ba no mifonukha ndraʼo.+ Me mofökhödo, ba no mirorogö ndraʼo. Me so ndraʼo ba gurunga, no mifaigi ndraʼo.’+
37 Ba latema linia niha satulö andrö, ’He Soʼaya, hamega maʼila olofo ndraʼugö ba mabeʼe göu, mazui owökhi dödöu ba mafabadugö khöu nidanö?+
38 Hamega tobali ndraʼugö niha si fatewu ba mahaogö wanemaʼö yaʼugö, mazui lö nukhamö ba mafonukha ndraʼugö?
39 Hamega maʼila mofökhö ndraʼugö mazui labeʼeʼö ba gurunga ba mafaigiʼö?’
40 Itema lira Razo, ’Yafaduhu dödömi, gofu hadia ia nilaumi khö dalifusögu fondrege zide-ide andre, ba khögu no mifalua daʼö.’+
41 ”Aefa daʼö, imane dania khö zi so ba gaberania, ’Miʼofanö ba daʼa+ yaʼami si göna fangelifi, miʼae ba galitö si lö mate-mate+ si no muhenaigö khö Gafökha awö malaʼikania.+
42 Me olofo ndraʼo, ba lö mibeʼe gögu. Me owökhi dödögu, lö nifabadugömi khögu nidanö.
43 Me tobali ndraʼo niha si fatewu, lö mitemaʼö ndraʼo. Me lö nukhagu, lö mifonukha ndraʼo. Me mofökhödo hegöi me so ndraʼo ba gurunga, lö nirorogömi yaʼo.’
44 Aefa daʼö, latema linia lamane, ’He Soʼaya, hamega maʼila olofo ndraʼugö, owökhi dödöu, tobali ndraʼugö niha si fatewu, lö nukhamö, mofökhöʼö mazui labeʼeʼö ba gurunga ba lö mafaigiʼö?’
45 Aefa daʼö itema lira, ’Yafaduhu dödömi, gofu hadia ia nilaumi khö dalifusögu fondrege zide-ide andre, ba khögu no mifalua daʼö.’+
46 Nihori ndra niha daʼa dania sagötö faʼara.+ Hizaʼi, niha satulö lasöndra waʼauri irugi zi lö aetu.”+
Nisura ba gahe zura
^ Sambua talenta Yunani fagölö ira zi 20,4 kg. Faigi Lamp. B14.
^ Sin.: ”firö”.
^ Sin.: ”firö”.
^ Eluahania daʼa iraono Gadamo ba Khawa.
