Nisura Mataiʼo 27:1-66
27 Me no moluo, fefu gafalo gere awö zondröniaʼö ba soi daʼö, lafatunö hadia zinangea lafalua ba wamunu Yesu.+
2 Me no aefa laböbö ia, ba laʼohe ia föna Gubernur Filato.+
3 Me iʼila Yuda si manga mböli wa no muʼetuʼö hukuma faʼamate khö Yesu, maniasa ia ba ifangawuli zi 30 loga firö andrö khö gafalo gere hegöi khö ndra sondröniaʼö.+
4 Imane, ”No ufalua horö börö me no uʼa mböli ndro niha si lö sala.” Lamane khönia, ”Yaʼugö saʼae daʼö, bali-baliu!”
5 Ifazawili gefe daʼö ba gosali, ba mofanö ia itawi mbaginia.+
6 Laʼozaragö gefe daʼö ira kafalo gere ba lamane, ”Kefe daʼa böli ndro, tebai laʼiröʼö ba gosali.”
7 Lahalö gangetula wangogunaʼö kefe daʼö ba wowöli tanö zamöbözi tambu laʼuri ba labaliʼö lewatö niha sikoli.
8 Daʼö mbörö wa lafotöi danö andrö irugi iadaʼa Tanö Do.+
9 Itörö niwaʼö Yeremia samaʼeleʼö me imane, ”Lahalö zi 30 loga firö, böli nihonogöi ndraono Gizaraʼeli ba wamawa niha andrö,
10 ba laʼogunaʼö ba wowöli tanö zamöbözi tambu laʼuri, simane niwaʼö Yehowa* khögu.”+
11 No mozizio Yesu föna gubernur ba manofu khönia gubernur daʼö imane, ”Hadia Razo Niha Yahudi ndraʼugö?” Imane Yesu, ”Atulö, simane niwaʼömö.”+
12 Hizaʼi, me laböbögö khönia zi lö duhu ira sondröniaʼö hegöi kafalo gere, lö hede-hedenia.+
13 Imane khönia Filato, ”Hadia lö örongo-rongo? Oya sibai niböbögöra khöu si lö duhu.”
14 Hizaʼi, lö itema zambua fehede, irege ahöli-höli dödö gubernur.
15 Ero mufalua Gowasa Fasa, si toʼölönia nifalua gubernur iʼefasi niha si so ba gurunga, gofu haniha zomasi niha sato.+
16 Me luo daʼö, so samösa niha gurunga si tehöngö waʼalösökhi, töinia Baraba.
17 Manofu Wilato ba niha sato imane, ”Haniha zomasi ami uʼefasi Baraba mazui Yesu nifotöi Keriso?”
18 Aboto ba dödö Wilato wa labeʼe Yesu ba dangania börö waʼafökhö dödöra.
19 Mendrua manö me modadao Wilato ba gurusi wanguhuku, itema goroisa moroi khö woʼomonia, ”Böi falua hadia ia ba niha si lö sala andrö. Lö sökhi-sökhi dödögu maʼökhö börö wangifigu sanandrösa khönia.”
20 Hizaʼi, ira kafalo gere hegöi sondröniaʼö lafaweʼe niha sato enaʼö Baraba+ niʼefasi ba labunu Yesu.+
21 Manofu gubernur ba niha sato, ”Ba gotalua niha si darua andre, haniha zomasi ami uʼefasi?” Latema linia, ”Baraba.”
22 Imane Filato, ”Na simane daʼö, hadia nifaluagu khö Yesu nifotöi Keriso?” Latema linia niha sato, ”Osö ia ba döla geu!”+
23 Isofu khöra, ”Hadia mbörö? Hadia zala si no ifalua?” Hizaʼi, itugu laʼebuaʼö lira weʼao, ”Osö ia ba döla geu!”+
24 Lö saʼae si tola ifalua Filato börö me itugu kaliru niha. Ihalö nidanö, isasai dangania föna niha sato, aefa daʼö imane, ”Lö horögu ba ndro niha daʼa. Yaʼami zoluʼi.”
25 Lamane niha sato, ”Yamöi ba huluma ndronia andrö hegöi ba ndraonoma.”+
26 Aefa daʼö, iʼefasi Mbaraba. Iʼandrö enaʼö laleasi+ ba laʼohe Yesu irege laʼosö ia ba döla geu.+
27 Aefa daʼö, laʼohe ia ba nomo gubernur ira saradadu ba lakaoni fefu zaradadu enaʼö lafasui Yesu.+
28 Laheta nukhania, aefa daʼö labeʼe khönia mbaru sebua, soyo laʼa-laʼa.+
29 Lafazökhi khönia dakula moroi ba zinanö sodoi ba labeʼe ba högönia. Aefa daʼö, labeʼe ziʼo* ba dangania kambölö. Latuhi danö fönania ba wangoʼaya yaʼia, ”Yaʼahowu Razo Niha Yahudi!”
30 Ladiloi ia+ ba lahalö ziʼo no mege ba wamözi högönia.
31 Me no aefa laʼoʼaya ia, laheta mbarunia sebua ba labeʼe khönia nukha tanö baero. Aefa daʼö, laʼohe ia ba laʼosö ba döla geu.+
32 Ba dalu lala, falukha ira niha Kirene sotöi Simoni. Lafaso ia ba wolohe töla geu famakao* Yesu.+
33 Larugi nahia nifotöi Gologata, eluahania Naha Gamatela.+
34 Aefa daʼö, lafabadugö khönia nagu nifaruka awökhu.*+ Me no itandra ba lö aʼozu ibadu.
35 Me no laʼosö ia ba döla geu, labagi-bagi mbarunia tanö baero, ba fadahö-dahö ira.+
36 Modadao ira ba daʼö ba wanarogö yaʼia.
37 So wafa nisura tanö yawa ba högönia ba wamöbögö khönia si lö duhu, ”Daʼa Yesu, Razo Niha Yahudi.”+
38 Darua göi zorabu niʼosö ba ngainia, samösa ba gambölö ba samösa ba gabera.+
39 Laʼoʼaya-aya ia niha sanörö+ ba lafalikhö-likhö högöra+
40 lamane, ”Yaʼugö zangumaʼö ödudugö gosali ba öfuli öfazökhi ha ba zi tölu hari,+ orifiʼö na sindruhu ono Lowalangi ndraʼugö! Ae tou moroi ba döla geu famakao* andrö!”+
41 Laʼoʼaya-aya ia ira kafalo gere, sangila amakhoita hegöi ira sondröniaʼö lamane,+
42 ”Iʼorifi sa niha böʼö, ba tebai iʼorifi ia samösa! Na sindruhu Razo ndraono Gizaraʼeli ia,+ hasambalö möi ia tou ba döla geu famakao* andrö, ba faduhu dödöda khönia.
43 Faduhu sibai dödönia khö Lowalangi. Akha iʼorifi ia Lowalangi iadaʼa na sindruhu iʼomasiʼö ia Lowalangi,+ börö me iwaʼö ’Ono Lowalangi ia’”.+
44 Simanö göi zorabu niʼosö ba zingania, laʼoʼaya ia.+
45 Iʼotarai bözi 12 waʼalawa luo,* ogömi fefu mbanua daʼö irugi mato bözi 3 tanö owi.*+
46 Mato bözi tölu tanö owi, muʼao Yesu ebua linia, ”Eli, Eli, lama sabakhtani?” eluahania, ”He Lowalangigu, he Lowalangigu, hana wa öröi ndraʼo?”+
47 So ösa zozizio ba daʼö, ba me larongo wehede Yesu lamane, ”Hiza! Ikaoni Gelia.”+
48 Iʼanemaiʼö fagohi samösa niha ba wangai bulu gara nasi, iʼungu bakha ba nagu saisö ba ibeʼe ba mbalö geu. Aefa daʼö ifabadugö khö Yesu.+
49 Hizaʼi, lamane niha tanö böʼö, ”Ha iʼagö manö daʼö! Datafaigi hadia tohare Gelia ba wanolo yaʼia.”
50 Ifuli iʼebuaʼö linia Yesu weʼao, aefa daʼö aetu nosonia.+
51 Hiza, asika nukha mbaʼa-baʼa ba naha niʼamoniʼö,+ tebagi dua+ iʼotarai si yawa numalö mitou+ ba modögö danö, asila hili sokara.
52 Teboka lewatö ba oya tezaumba baero mboto niha niʼamoniʼö si no mate,
53 ba ato niha sangila. (So niha si möi mamaigi lewatö daʼö me no tesusugi Yesu, ba mofanö ira ba Yeruzalema.*)
54 Ataʼu gumandru zaradadu hegöi niha sozago Yesu me laʼila ndruru danö awö ngawalö zalua. Lamane, ”Sindruhu wa Ono Lowalangi ia.”+
55 Ato göi ndra alawe ba daʼö, lafaigi-faigi moroi ba zaröu. No laʼoʼö Yesu iʼotarai Galilaia ba wanolo yaʼia.+
56 So ba gotaluara Maria Magadala, Maria ina Yakobo ba Yose, awö nina ndraono Zebedaiʼo.+
57 Me arakhagö bongi, tohare zotöi Yosefo, niha si kayo moroi ba Garimatea. No göi tobali ia nifahaʼö Yesu.+
58 Ifalukhaisi Wilato, iʼandrö enaʼö yaʼia zogoʼo Yesu.+ Aefa daʼö, ibeʼe fareta Filato enaʼö labeʼe khönia mboto Yesu.+
59 Ihalö Yosefo mboto Yesu, ibukusi ba nukha si sökhi si lö taʼunö,+
60 ibeʼe ba lewatö si bohou+ si no lafazökhi ba dögi gara. Ifagaölö gara sebua ba wondruhö lewatö daʼö. Aefa daʼö mofanö ia.
61 Hizaʼi, Maria Magadala hegöi Maria tanö böʼö, so ira ba daʼö. No modadao ira föna lewatö Yesu.+
62 Mahemolunia yaʼia daʼö luo Wangöhöna.+ Laʼondrasi Wilato ira kafalo gere hegöi ira Farizaiʼo,
63 lamane, ”He Pa, itörö tödöma me auri nasa niha si falimo andrö, iwaʼö wa tesusugi ia ba ngaluo si tölu.+
64 Börö daʼö faretakö niha enaʼö lazago lewatönia irugi ngaluo si tölu, enaʼö böi tohare ndra nifahaʼönia ba latagö mbotonia,+ ba lafatunö ba niha wa no tesusugi ia moroi ba gotalua zi mate. Na alua daʼö, abölö-bölö walimosa daʼa moroi ba ziföföna.”
65 Imane Filato, ”Tola miʼohe zanaro ba daʼö. Mihaogö wozago lewatönia andrö.”
66 Mofanö ira, lahaogö wondruhö lewatö andrö faoma kara ba lafataro zozago ba daʼö.
Nisura ba gahe zura
^ Mazui ”döla zukhu”.
^ Faigi Geluaha Ngawua Wehede.
^ Idanö safeto.
^ Faigi Geluaha Ngawua Wehede.
^ Faigi Geluaha Ngawua Wehede.
^ Sin.: ”Iʼotarai ginötö si meʼönö”.
^ Sin.: ”irugi inötö si meziwa”.
^ Sin.: ”banua niʼamoniʼö”.
