Nisura Mataiʼo 5:1-48
5 Ba me iʼila niha sato, möi ia ba hili, ilau modadao. Ba möi ndra nifahaʼönia khönia.
2 Ba ibörötaigö wamahaʼö yaʼira. Imane,
3 ”Yaʼahowu niha soʼameʼegö tödö soguna ba wamati,*+ me khöra dania Wamatörö Lowalangi ba zorugo andrö.
4 ”Yaʼahowu niha sabu tödö, me yaʼira nirara tödö dania.+
5 ”Yaʼahowu niha sangide-ngideʼö yaʼia,+ me yaʼira zangokhögö ulidanö dania.+
6 ”Yaʼahowu niha solofo ba sowökhi tödö+ ba zindruhu, me yaʼira niʼabusoiʼö dania.+
7 ”Yaʼahowu niha sohakhösi tödö niha böʼö,+ me yaʼira nihakhösi tödö dania.
8 ”Yaʼahowu niha satulö tödö,+ me yaʼira zangila Lowalangi dania.
9 ”Yaʼahowu niha sangaʼasogö faʼatulö,*+ me yaʼira dania nifotöi ono Lowalangi.
10 ”Yaʼahowu niha nifakao ba zindruhu,+ me yaʼira zi fao ba Wamatörö Lowalangi ba zorugo andrö.
11 ”Yaʼahowu ami na laʼoʼaya,+ lafakao,+ ba laböbögö khömi ngawalö zi lö duhu börö ndraʼo.+
12 Simanö göi wamakao si göna ndra samaʼeleʼö me föna.+ Miʼomusoiʼö dödömi ba miʼowua-wuaʼö dödömi,+ me ebua luomi ba zorugo.+
13 ”Yaʼami nasio+ gulidanö. Na taya waʼasi-asi nasio, hewisa wa tola ifuli azi-azi? Lö hadöi gunania saʼae ba mutiboʼö,+ ba nihundra-hundra niha.
14 ”Yaʼami haga gulidanö.+ Lö tobini mbanua si so ba zuzu hili.
15 Lö niha sanunu fandru, aefa daʼö ibiniʼö barö raga-raga.* Ibeʼe ba nahia salawa wandru andrö, enaʼö ihagaini fefu niha si so ba nomo.+
16 Andrö, yamohaga göi ami föna niha sato+ enaʼö laʼila mbua-buami si sökhi+ ba lafolakhömi Namami si so ba zorugo.+
17 ”Böi miwaʼö tödömi wa so ndraʼodo ba wangeheta Oroisa Moze mazui Nisura Ndra Samaʼeleʼö. Tohare ndraʼo tenga ba wangeheta yaʼia, hizaʼi ba wamalua enaʼö itörö.+
18 Yafaduhu dödömi, sagötö nasa so mbanua awö danö, lö taya sambua titi mazui sambua hurufo moroi ba Goroisa Moze na lö hadöi itörö fefu niwaʼönia.+
19 Börö daʼö, haniha zanawö fazambua moroi ba goroisa fondrege zide-ide ba ifahaʼö göi niha böʼö enaʼö lasawö, tenga sinangea tefaʼamöi ia ba Wamatörö Lowalangi ba zorugo. Hizaʼi, haniha zamalua ba samahaʼö, daʼö zinangea tefaʼamöi ba Wamatörö Lowalangi ba zorugo.
20 Börö daʼö uwaʼö khömi, na lö tohude gamuatami moroi khö ndra sangila amakhoita hegöi ira Farizaiʼo,+ tebai fao ami ba Wamatörö Lowalangi ba zorugo.+
21 ”Aboto ba dödömi fareta nibeʼe khö ndra tuami me föna, ’Böi mibunu niha.+ Haniha zamunu niha, teʼohe föna zanguhuku.’+
22 Hizaʼi ufatunö khömi, haniha zi lö aetu mofönu+ khö dalifusönia, teʼohe föna zanguhuku. Haniha zamotöi-töi talifusönia si fao fangoʼaya, teʼohe föna Zangetuʼö Huku.* Ba haniha zangumaʼö, ’He bodo!’ tehuku ba Gehena* soʼali-alitö.+
23 ”Andrö, na öʼohe zumange nibeʼeu ba naha wanunu sumange,+ ba itörö tödöu wa so zabao dödö dalifusöu khöu,
24 röi nibeʼemö andrö ba naha wanunu sumange. Alui dalifusömö andrö, ba atulöʼö ua ndraʼugö khönia. Aefa daʼö, fuliʼö ba wameʼe sumange nibeʼeu.+
25 ”Na so niha soʼangadugö yaʼugö khö zanguhuku, miʼaliokö miʼasiwai ba gotaluami sagötö fofanömi ba lala, enaʼö lö ibeʼe ndraʼugö ba danga zanguhuku, ba moroi ba danga zanguhuku numalö ba danga safi gurunga, lua-luania labeʼeʼö ba gurunga.+
26 Sindruhu-ndruhu uwaʼö khöu wa tebai aefa ndraʼugö moroi ba daʼö fatua lö abuʼa fefu woʼömöu irege ahori fefu loga side-ide* niʼokhögöu.
27 ”No irai mirongo ba goroisa, ’Böi ohorö.’*+
28 Hizaʼi, ufatunö khömi iadaʼa, haniha zotöngö ira alawe+ irege tumbu ba dödönia wangisö, no ifalua horö* bakha ba dödönia.+
29 Börö daʼö, na fasala höröu kambölö, koe ia ba tiboʼö.+ Abölö sökhi ha tambai höröu moroi na fefu mbotou tefazaumba ba Gehena.*+
30 Simanö göi, na fasala dangau kambölö, taba ia ba tiboʼö.+ Abölö sökhi ha tambai dangau moroi na fefu mbotou tefazaumba ba Gehena.*+
31 ”No göi irai mirongo, ’Haniha zamabali* foʼomonia, lö tola löʼö ibeʼe zura wabalisa moloʼö huku.’+
32 Hizaʼi ufatunö khömi, na so zamabali ira alawenia, hewaʼae tenga börö me no ifalua horö,* tola manö daʼö mbörö wa mohorö* woʼomonia ira alawe. Niha sangowalu khö ndra alawe nifabali andrö lafotöi ia göi sohorö.*+
33 ”No göi mirongo goroisa nibeʼe khö ndra tuami me föna, ’Böi ae ba hölu na lö öfalua,+ hasambalö öbuʼa zi no öfabuʼu khö Yehowa.’*+
34 Hizaʼi, ufatunö khömi iadaʼa: Böi miʼae ba hölu.+ Böi mibeʼe ba hölu zorugo börö me dadaoma Lowalangi daʼö,
35 mazui ulidanö börö me dane-dane gahenia daʼö;+ mazui Yeruzalema börö me banua Razo sebua daʼö.+
36 Böi beʼe hölu högöu, börö me lö öʼila öfaböʼöni sara mbu si so ba högöu tobali afusi mazui aitö.
37 Na mohedeʼö, ’Yaʼia’ na yaʼia, ’Tenga’ na tenga.+ Si töra moroi ba daʼö tana khö Gafökha.*+
38 ”No irai mirongo, ’Hörö wangali hörö, ifö wangali nifö.’+
39 Hizaʼi, ufatunö khömi: Böi milawa niha si lö sökhi. Na so zanafari boʼöu kambölö, ba beʼe khönia mboʼöu kabera.+
40 Na so zolohe yaʼugö khö zanguhuku börö me omasi ia iʼokhögö mbarumö, beʼe khönia mbarumö tanö baero.+
41 Na so zamatörö samaso yaʼugö ba wolohe noro sambua za, ba ohe khönia dombua za waʼara.
42 Na so zangandrö khöu hadia ia, beʼe manö. Ba na so zamiza* khöu hadia ia, böi timbagö.+
43 ”No irai mirongo, ’Miʼomasiʼö nawömi,+ ba yafatiu dödömi ba zi faʼudu khömi.’
44 Hizaʼi ufatunö khömi: Böi tebulö miʼomasiʼö zi faʼudu khömi,+ ba miʼohe ba wangandrö niha samakao yaʼami,+
45 enaʼö tobali ami ono Namami andrö ba zorugo,+ börö me ibeʼe haga luo ba niha si sökhi hegöi ba niha si lö sökhi, ba ibeʼe deu ba niha satulö hegöi ba niha si lö atulö.+
46 Na ha ba niha sangomasiʼö yaʼami miforomaʼö waʼomasi, hadia mitema howu-howu?+ Sanugi pajak manö lafalua zimane daʼö.
47 Ba na ha talifusömi miʼowai, hadia hudemi? Lafalua göi daʼö niha sato ba gulidanö.
48 Börö daʼö, yamoʼahonoa ami simane famoʼahonoa Namami andrö ba zorugo.+
Nisura ba gahe zura
^ Sin.: ”niha si numana mazui sangandrö-ngandrö eheha; niha saboto ba dödö wa moguna Lowalangi ba waʼaurira”.
^ Mazui ”niha somasi atulö”.
^ Raga-raga niʼogunaʼö ba daʼa eluahania fanuʼa gö simane gandru, rigi, mazui böra.
^ Eluahania Sangetuʼö Huku ba niha Yahudi.
^ Naha wanunu sasao baero Yeruzalema. Faigi Geluaha Ngawua Wehede.
^ Yaʼia daʼö niha si no mangowalu, orudu ia ba zi tenga dongania.
^ Faigi Geluaha Ngawua Wehede.
^ Faigi Geluaha Ngawua Wehede.
^ Ba li Yunani, eluahania angetula wamabali si faronga moloʼö huku.
^ Ba li Yunani: porneia. Faigi Geluaha Ngawua Wehede.
^ Sin.: ”si lö sökhi”.
^ Eluahania ba daʼa, lö mobunga.
