Nisura Mataiʼo 6:1-34
6 ”Mitörö tödömi, böi mifalua zi sökhi ha enaʼö laʼila niha.+ Na mifalua zimane daʼö, lö mitema luomi khö Namami si so ba zorugo.
2 Andrö, na mamuala ami,* böi midunö-dunö ba niha, simane nifalua niha samini tödö ba nahia waʼowulo hegöi ba lala enaʼö lasuno ira niha. Yafaduhu dödömi, ha daʼö luora.
3 Hizaʼi, na mamuala ami, böi yaʼiʼila tangami kabera hadia nibeʼe dangami kambölö,
4 enaʼö lö sangila hadia mbuala nibeʼemi. Ifahowuʼö ami Amami sangila ba nahia si tobini.+
5 ”Simanö göi na mangandrö ami, böi simane niha samini tödö.+ Omasi ira mangandrö ba lalau mozizio ba nahia waʼowulo hegöi ba wabaliwa lala enaʼö laʼila ira niha.+ Yafaduhu dödömi, ha daʼö luora.
6 Hizaʼi, na mangandrö ami, miʼaeʼe ba mbateʼe ba mikusi mbawandruhö. Aefa daʼö, miʼangandrö khö Namami si lö laʼila niha.+ Ifahowuʼö ami Amami sangila ba nahia si tobini.
7 Na mangandrö ami, böi mifuli mitötöi wehede si no mitötöi mege simane nifalua soi böʼö. Lawalingagö tefondrondrongo na anau wangandröra.
8 Böi mifaomagö ami khöra, börö me aboto ba dödö Namami hadia zoguna khömi,+ fatua lö niʼandrömi.
9 ”Andrö, mimane wangandrö:+
”’He Ama khöma si so ba zorugo,+ yateʼamoniʼö döimö.+
10 Yatohare Wamatörömö.+ Yaʼitörö zomasi ndraʼugö,+ hulö simane ba zorugo, yasimanö göi ba gulidanö.+
11 Öma* sirugi maʼökhö, beʼe khöma maʼökhö andre,+
12 ba efaʼö khöma horöma,* simane fangefaʼöma sala ba zi so sala* khöma.+
13 Böi ohe ndraʼaga ba wanandraigö,*+ efaʼöga moroi ba zi lö sökhi.’*+
14 ”Na miʼefaʼö zala niha böʼö, iʼefaʼö göi zalami Amami si so ba zorugo.+
15 Ba na lö miʼefaʼö zala niha böʼö, ba lö göi iʼefaʼö zalami Amami.+
16 ”Na fuasö ami,+ böi saʼae mifangerau mbawami simane niha samini tödö. Lö laʼehaogö mbotora enaʼö laʼila niha wa fuasö ira.+ Yafaduhu dödömi, ha daʼö luora.
17 Hizaʼi, na fuasö ndraʼugö, fake wanikha mbu ba sasai mbawau,
18 enaʼö lö sangila wa fuasö ndraʼugö, baero Nama ba zorugo si tebai laʼila niha. Ifahowuʼö ndraʼugö Amau sangila ba nahia si tobini.
19 ”Böi mihöna khömi harato ba gulidanö,+ nifakiko hama ba niʼa howu ba nitagö zanagö.
20 Hizaʼi, mihöna khömi harato ba zorugo+ si tebai ifakiko hama ba si lö iʼa howu+ ba si lö itagö sanagö.
21 Hezo so haratomö, ba daʼö so dödöu.
22 ”Haga mboto hörö.+ Na öʼosambalöʼö* höröu, mohaga mbotou maʼasambua.
23 Ba na lö sökhi* höröu,+ ogömi fefu mbotou. Na ogömi-gömi haga andrö si so ba mbotou, ba hawaʼabölö waʼogömi-göminia!
24 ”Tebai möi sawuyu zi darua zi samösa niha. Fatuwu ia khö zi samösa ba iʼomasiʼö zi samösa.+ Mazui, lö faröi ia khö zi samösa ba iʼaohasi ba dödö zi samösa. Tebai tobali ami sawuyu Lowalangi ba sawuyu Ganaʼa göi.+
25 ”Andrö uwaʼö khömi: Böi mibusi tödö+ waʼaurimi,* hadia niʼa, nibadu, mazui niʼonukha.+ Hadia tenga no ebua mböli waʼaurimi moroi ba gö ba moroi ba nukha?+
26 Haogö wamaigi fofo andrö ba dalu mbanua.+ Lö manaru ira ba lö mamasi, lö mangöhöna ira ba halasa, hizaʼi ibalazoi ira Amami andrö si so ba zorugo. Hadia tenga no aröu faehu ami moroi ba wofo?
27 Haniha ba gotaluami zi tola mondrouʼö maʼifu* faʼanau nosonia na iʼabusi tödö?+
28 Simanö göi, hana wa miʼabusi tödö hadia miʼonukha? Mihalö khömi wamahaʼö moroi ba mbunga lili si tumbu ba mbenua. Bunga daʼö lö mohalöwö ba lö managu,
29 hizaʼi, lö simane faʼasökhi mbunga andrö nukha Zelomo+ ba lakhöminia.
30 Na simanö Lowalangi wamonukha duʼu andrö ba mbenua, si tumbu maʼökhö ba latunu mahemolu, mendrua manö ami, yaʼami sambö famati!
31 Andrö, böi mibusi tödö+ ba mimane, ’Hadia maʼa?’ mazui, ’Hadia mabadu?’ mazui, ’Hadia maʼonukha?’+
32 Oi daʼö fefu niforege niha wangalui. Aboto ba dödö Namami si so ba zorugo wa moguna khömi daʼö fefu.
33 ”Andrö, miʼofönaiʼö wangalui Famatörö Lowalangi awö waʼatulönia, ba tebeʼe khömi nönö-nönö daʼö dania fefu.+
34 Andrö, böi mibusi tödö ngaluo mahemolu,+ börö me mahemolu so zui waʼaombö dödö. Ero maʼökhö oi so gabula dödö.
Nisura ba gahe zura
^ Mazui ”na mameʼe sadaka ami ba niha si numana”. Faigi Geluaha Ngawua Wehede.
^ Sin.: ”roti”.
^ Sin.: ”foʼömö”.
^ Sin.: ”ba zoʼömö”.
^ Mazui ”Böi tehegö awuwu ndraʼaga ba wanandraigö”.
^ Yaʼia daʼö Satana.
^ Sin.: ”öna-öna”.
^ Mazui ”na fayawa”.
^ Mazui ”nosomi”.
