Nisura Mataiʼo 7:1-29
7 ”Böi mihuku nawömi+ faböi tehuku ami,
2 börö me tehuku ami dania simane fanguhuku nifatörömi,+ ba hewisa nifaluami ba niha, simane daʼö göi dania nifalua khömi.*+
3 Hana wa öfaigi golowingö ba hörö dalifusöu, ba lö öʼila mboto geu si so bakha ba höröu?+
4 Ba hewisa wa öwaʼö khö dalifusöu, ’Daʼuheta golowingö andrö ba höröu,’ ba hiza sa mboto geu bakha ba höröu?
5 Niha samini tödö! Ofönaiʼö ua heta mboto geu ba höröu, awena dania anehe ndraʼugö ba wangeheta olowingö ba hörö dalifusöu.
6 ”Böi mibeʼe ö nasu niʼamoniʼö andrö, ba böi mifazaumba mutiara ba mbawi,+ enaʼö lö lahundra-hundra ba lasasawi ami mangawuli.
7 ”Böi miböhöli wangandrö ba tebeʼe khömi;+ böi mibato wangalui ba misöndra; mibökö-bökö mbawandruhö ba tebokai khömi;+
8 dozi sangandrö ba latema,+ sangalui ba lasöndra, ba samökö-mökö bawandruhö ba tebokai khönia.
9 Sindruhunia, haniha zatua sameʼe kara khö nononia na iʼandrö roti?
10 Mazui ibeʼe gulö na iʼandrö giʼa?
11 Andrö, hewaʼae niha sebua horö ami ba miʼila mibeʼe zi sökhi ba ndraonomi, mendrua manö Namami si so ba zorugo. Hasambalö ibeʼe zi sökhi+ ba niha sangandrö khönia!+
12 ”Börö daʼö, hadia zomasiʼö lafalua khöu niha, daʼö göi falua khöra.+ Sindruhunia, daʼa fefu rahu-rahu Goroisa Moze hegöi Nisura Ndra Samaʼeleʼö.+
13 ”Mitörö mbawa göli sise-ise andrö,+ me no ebua mbawa göli ba ebolo lala saekhu ba waʼatekiko, ba ato zanörö daʼö.
14 Hizaʼi, no ide-ide mbawa göli ba ise-ise lala saekhu ba waʼauri andrö, ba lö ato zanöndra yaʼia.+
15 ”Miʼangelamaisi zamaʼeleʼö sofaya+ andrö samake nukha mbiri-biri.+ Sindruhunia sa, yaʼira andrö asu gatua soluʼa-luʼa.+
16 Ba mbua-buara aboto ba dödömi ira. Duʼu sodoi lö irai iʼowua mbua nagu mazui bua ara lö?+
17 Simanö göi, eu si sökhi iʼowua mbua si sökhi, hizaʼi eu si lö sökhi iʼowua mbua si lö sökhi.+
18 Eu si sökhi lö iʼowua mbua si lö sökhi, ba eu si lö sökhi tebai iʼowua mbua si sökhi.+
19 Fefu geu si lö mowua bua si sökhi, laʼobö ba lafazaumba ba galitö.+
20 Andrö, moroi ba mbua-buara aboto ba dödömi ira.+
21 ”Lö dozi molala dania ba Wamatörö Lowalangi ba zorugo andrö zoʼangaröfili töigu sangumaʼö, ’He Soʼaya! He Soʼaya!’ Ha samalua somasi Namagu andrö si so ba zorugo.+
22 Ato dania zangumaʼö khögu na luo daʼö, ’He Soʼaya! He Soʼaya!+ Hadia tenga töimö khöma ba wamaʼeleʼö, mafofanö malaʼika si lö sökhi ba döimö, ba oya dandra sahöli-höli dödö mafalua ba waʼabölö döimö?’+
23 Ba umane khöra, ’Lö uʼila haniha ami! Yaʼami samalua si lö sökhi, miheta ami ba daʼa!’+
24 ”Börö daʼö, niha samondrongo fehedegu andre ba samalua yaʼia, hulö niha satua-tua samazökhi omonia ba dete gara.+
25 Me ilau teu sabölö-bölö, molö, ba angi, lö adudu nomo andrö börö me ba dete gara mufazökhi.
26 Hizaʼi, niha samondrongo fehedegu andre ba lö ifalua, hulö niha si bodo samazökhi omonia ba dete gawu.+
27 Me ilau teu sabölö-bölö, molö, ba angi, adudu nomo+ andrö ba abölö-bölö waʼasoʼania.”
28 Me no awai fahuhuo Yesu, ahöli-höli dödö niha sato ba lagu wamahaʼönia,+
29 börö me mamahaʼö ia simane niha sebua kuaso,+ tenga simane ira sangila amakhoita.
Nisura ba gahe zura
^ Mazui ”suʼa-suʼa niʼanuʼaʼömi ba laʼanuʼaʼö göi khömi dania”.
