Sinunö 18:1-50
Khö zondröniaʼö sinunö. Moroi khö Dawido, enoni Yehowa. Isura zinunö daʼa khö Yehowa me iʼefaʼö ia Yehowa ba danga zi faʼudu khönia ba moroi ba danga Zaulo. Imane:+
18 He Yehowa, yaʼugö wangabölögu.+ Uʼomasiʼö ndraʼugö.
2 Hili kara khögu Yehowa ba baʼa-baʼagu, yaʼia Zangorifi yaʼo.+
Gowe saro khögu Lowalangigu,+ sawatögu ba wolumöʼö yaʼo,Balusegu ia ba Sabölö ba wangorifi,* sawatögu* si lö ametaʼuö.+
3 Muʼao ndraʼo khö Yehowa me no sinangea musuno ia,Ba teʼefaʼö ndraʼo ba danga nudugu.+
4 No ikabi ndraʼo sinali waʼamate;+Tobali fametaʼugu molö sebua moroi khö ndra niha si lö sökhi.+
5 Ikabi ndraʼo sinali Lewatö;*So fönagu dandrawa waʼamate.+
6 Na abu dödögu, muʼao ndraʼo khö Yehowa,Lö uböhöli weʼao ba wangandrö fanolo khö Lowalangigu.
Ba gosalinia irongo ligu,+Irongo talingania weʼaogu ba wangandrö fanolo.+
7 Ibörögö modögö danö ba muheu;+Modögö wondrasi hiliBa mudaulu-daulu misa börö wönunia.+
8 Kalua zimbo moroi ba nikhunia,Ba kalua galitö moroi ba mbawania;+Mohola mbo galitö si otarai khönia.
9 Me möi ia mitou, mangalulu khönia mbanua si yawa,+Ba so lawuo saitö ba narö kahenia.+
10 Modadao ia ba hulu kerubi ba muhombo.+
No ifatutue ia ba dete gafi ndra malaʼika.*+
11 Ibaliʼö ambalania waʼogömi-gömi;+Teu lawuo sogömi-gömi ba saweʼe-weʼeTobali ose ba zi fasuinia.+
12 Moroi ba haga andrö fönania,Itörö lawuo andrö teu esi hegöi bo galitö.
13 Ba ibörögö moʼugu-ugu Yehowa ba mbanua si yawa;+Ifarongogö linia Fondrege Zalawa+Faoma teu esi hegöi bo galitö.
14 Iʼefasi nono wanania ba ifazawili nudugu;+Ifohaga gari mbanua ba wamawukaisi yaʼira.+
15 Oroma dambu si tou ba nungo nidanö;+Oroma dane-dane gulidanö ba hagö-hagömö, yaʼugö Yehowa,Ba höfu-höfu hanu-hanumö.+
16 Iʼoroʼö dangania moroi ba nahia salawa;Igogohe ndraʼo ba idönido yawa moroi ba nidanö sabakha.+
17 Iʼefaʼö ndraʼo moroi ba nudugu sagabölö,+Moroi ba niha si fatuwu khögu, sabölö moroi khögu.+
18 Lalawado ba ginötö göna ndraʼo abula dödö,+Hizaʼi itolo ndraʼo Yehowa.
19 Iʼohedo ba nahia sahono dödö;*Ilumöʼö ndraʼo börö waʼomuso dödönia khögu.+
20 Ibeʼe luogu Yehowa moloʼö amuatagu satulö;+Isulöni khögu me lö nifaluagu sala.*+
21 Lö irai uböhöli woloʼö lala Yehowa,Ba lö ufalua zi lö sökhi ba wondröi Lowalangigu.
22 Lö olifudo fefu goroisania;*Lö uʼosiwawöi gamakhoitania.
23 Uhalö gangetula enaʼö lö mosinegu ndraʼo fönania,+Ba uʼaröuʼö ndraʼo ba golalöwa.+
24 Yaʼisulöni khögu Yehowa moloʼö amuatagu satulö,+Börö me lö nifaluagu sala fönania.+
25 Lö faröi ndraʼugö ba niha si lö faröi;+Ba lö mosinegu ndraʼugö ba niha si lö sinegu,+
26 Sökhi dödöu ba niha sadölö tödö,+Ba atua-tua ndraʼugö ba niha samalua faʼonekhe.+
27 Öʼorifi niha si numana,*+Hizaʼi öhöndrögö niha* sasiliyawa.+
28 He Yehowa, yaʼugö zamohaga fandrugu,Lowalangigu sohagaini faʼogömi-gömi si göna yaʼo.+
29 Börö wanolo si otarai ndraʼugö, tola usuwö ngawawa zorabu;+Börö waʼabölö si otarai Lowalangi, tola usawö göli.+
30 Lala Lowalangi sindruhu andrö moʼahonoa;+Ba fehede Yehowa andrö no ohau-hau.*+
Baluse ia ba niha solumöʼö yaʼira khönia.+
31 Hadia so Lowalangi baero Yehowa?+
Hadia so gowe saro baero Lowalangida?+
32 Lowalangi sindruhu zangabölöʼö yaʼo,+Yaʼia zamoʼahonoa lalagu.+
33 Iʼabölöʼö gahegu hulö gahe mböhö;Iʼaroʼö gahegu wezizio ba nahia sagalawa.+
34 Ifahaʼö dangagu fasuwö;Tola ifaöndrö tangagu nono* wana tembaga.
35 Öbeʼe khögu mbaluse fangorifi,+Tangamö kambölö zangabeʼeʼö* yaʼo,Ba molakhömi ndraʼo me so khöu wangide-ngideʼö.+
36 Öʼeboloʼö lala nitörögu;Lö irai ahele gahegu.*+
37 Ugohi ba ukhamö fefu zi faʼudu khögu;Lö mangawuli ndraʼo na lö sahori mate ira.
38 Uhori ira irege tebai maoso saʼae;+Tegaölö tou ira barö gahegu.
39 Yaʼugö zameʼe khögu faʼabölö ba wasuwöta;Ba öʼekhugö tou tanö fönagu zi faʼudu khögu.+
40 Öfoloi zi faʼudu khögu,Ba uhori* niha si fatiu tödö khögu dania.+
41 Muʼao ira ba wangandrö fanolo, hizaʼi lö hadöi sanolo;Ba muʼao ira khö Yehowa ba lö ifondrondrongo.
42 Ututu ira simane faʼohama gawu-gawu nitöri nangi;Utiboʼö ira simane tambu ba lala.
43 Öʼefaʼö ndraʼo moroi ba wasuwöta nifalua soigu.+
Öfataro ndraʼo enaʼö tobali högö ba soi niha fefu.+
Soi si lö uʼila ba mangalulu ira khögu.+
44 Awena turiagu nirongora, ba no laʼoʼö niwaʼögu;Tohare niha si fatewu ba lafaöndrö-faöndrö ira fönagu.+
45 Taya waʼabarani* niha si fatewu;Möi ira baero si fao fanizi-nizi moroi ba nahiara si no lafobaʼa-baʼa.
46 Sauri sa Yehowa! Yatesuno Gowe Saro andrö khögu!+
Yatefolakhömi Lowalangi sangorifi yaʼo!+
47 Lowalangi zanulöni börö ndraʼo;+Yaʼia mbörö wa mangalulu khögu fefu soi.
48 Yaʼia zangefaʼö yaʼo ba danga zi faʼudu sofönu khögu;Öʼalawaʼö wamazawa yaʼo, alawa si yawa moroi ba zanuwö yaʼo;+Öʼefaʼö ndraʼo moroi ba danga niha samuʼi.
49 Daʼö mbörö wa ufolakhömi ndraʼugö ba gotalua soi niha, yaʼugö Yehowa,+Ba uʼanunöisi zinunö fanuno döimö.*+
50 Iʼefaʼö razo nifilinia ba ibeʼe waʼamöna* sebua;+Iforomaʼö waʼomasi si lö faröi ba niha nibayoininia,+Khö Dawido hegöi ba ngaʼötönia irugi zi lö aetu.+
Nisura ba gahe zura
^ Sin.: ”tandru fangorifi khögu”. Faigi duho ”Tandru” ba Geluaha Ngawua Wehede.
^ Mazui ”nahia salawa khögu”.
^ Mazui ”Syeol”. Daʼa lewatö niha sato. Faigi Geluaha Ngawua Wehede.
^ Mazui ”nangi”.
^ Mazui ”sebolo”.
^ Sin.: ”me lö si taʼunö dangagu”.
^ Sin.: ”gangetula hukunia”.
^ Mazui ”niha si göna famakao”.
^ Sin.: ”hörö”.
^ Mazui ”itörö galitö”.
^ Mazui ”ifasa tangagu tali”.
^ Mazui ”zotuhini”.
^ Mazui ”mbuʼu kawonogu”.
^ Sin.: ”uduhö mbawa”.
^ Mazui ”Ataʼu”.
^ Mazui ”ufoli wakake zinunö ba wanuno töimö”.
^ Mazui ”wangorifi”.
