Amaedola 17:1-28
17 Abölö sökhi zi sambawa roti ba nomo safönu faʼohahau dödö+Moroi ba gö* si fahöna ba nomo safönu fasosota.+
2 Sawuyu si so faʼaboto ba dödö, ifatörö nono zokhö yaʼia sangaʼasogö fangaila;Itema dania gondröita simane ono zokhö yaʼia.
3 Mutunu wirö ba mbalanga, simanö göi ganaʼa ba galitö,+Hizaʼi Yehowa zamareso tödö niha.+
4 Niha si lö sökhi iʼameʼegö tödö wehede sagafökhö,Ba si falimo ifondrondrongo wehede fangobousi.+
5 Haniha zangoʼaya niha si numana ba no iʼoʼaya Zomböi yaʼia,+Ba haniha zomuso tödö ba gabula dödö niha böʼö, hasambalö tehuku.+
6 Amaedola dakula ba niha sagatua ndra maʼuwura,*Ba faʼomuso dödö ndraono* zatuara.*
7 Lö moadu ba niha si bodo na atulö* wehedenia,+Mendrua manö saʼae na falimo zamatörö.*+
8 Buala andrö amaedola gara sebua böli khö zokhö yaʼia;+Gofu hezo möi ia, ba mofozu nifaluania.+
9 Niha sangefaʼö* olalöwa ba no iforomaʼö waʼomasi,+Hizaʼi aetu wahuwusa na mufuli mufasugi gabula dödö si no awai.+
10 Abölö sökhi zi sambua fanegu ba niha si so faʼaboto ba dödö+Moroi na mubözi niha si bodo mato otu kali.+
11 Ha famadaö zomasi niha si lö sökhi,Hizaʼi lafatenge niha samuʼi ba wanguhuku yaʼia.+
12 Abölö sökhi falukha ita mberua si taya onoMoroi na falukha ita ba niha si bodo ba wa lö tödönia.+
13 Na so zanulöni si sökhi faoma si lö sökhi,Lö aheta ba nösi nomonia waʼalösökhi.+
14 Samobörö faʼudusa hulö zanölaʼö baʼa nidanö;*Ofanö fatua lö alua wasosota.+
15 Sangefasi niha si lö sökhi hegöi samöbögö si lö atulö ba niha si lö olalöwa+Ogoro Yehowa wamaigi yaʼira.
16 Hadia gunania na tola iʼokhögö waʼatua-tua niha si bodo,Hizaʼi lö ibeʼe dödönia ba wanöndra daʼö?*+
17 Sindruhu si fahuwu lö tebulö waʼomasinia ero inötö+Ba tobali talifusö ia ba ginötö* waʼatosasa.+
18 Niha si lö faʼatua-tua, fatabe ia ba ilau fawuʼu liBa weʼamöi ba wali ba niha böʼö föna nawönia.+
19 Niha sangomasiʼö faʼudusa iʼomasiʼö wamalua olalöwa.+
Ba niha sebua bawa* ifakiko ia samösa.+
20 Niha si no tefuyu tödö, ba lö mofozu,*+Ba alabu dania niha samuyuʼö fehedenia ba tekiko.
21 Ono si bodo tobali fangabu dödö namania,Ba lö omuso dödö nama sangokhögö ono si lö tödö.+
22 Faʼomuso dödö andrö ba no dalu-dalu si sökhi,*+Hizaʼi tobali sangohori faʼabölö* waʼafatö dödö.+
23 Niha si lö sökhi itema zölö-sölö ba zi tobini*Ba wamuyuʼö lala satulö.+
24 Bua gera-era niha satua-tua lua-luania aekhu ba waʼaboto ba dödö,Hizaʼi hörö niha si bodo iʼanöröi mbalö danö faföfö.+
25 Ono si bodo tobali fangabu dödö namaniaBa möi fangafökhö dödö ninania.+
26 Lö sökhi na tehuku* niha satulö,Ba no aröu faehu moroi ba zindruhu na mubözi niha nifosumange.
27 Niha si so faʼaboto ba dödö ba itaha mbewenia,+Ba niha si so faʼatua-tua ihonogö ia.+
28 Atua-tua tawaʼö niha si bodo na lö hede-hedenia,Ba niha sondruhö bawania iʼokhögö waʼaboto ba dödö.
Nisura ba gahe zura
^ Sin.: ”zumange”.
^ Mazui ”maʼuwura ira matua”.
^ Mazui ”ndraono matua”.
^ Mazui ”namara”.
^ Mazui ”ndra tuhenöri”.
^ Mazui ”na sökhi”.
^ Sin.: ”sondruhö”.
^ Mazui ”hulö zamokai bawandruhö nidanö”. Sin.: ”sameʼe baero idanö”.
^ Mazui ”lö iʼokhögö waʼaboto ba dödö?”
^ Sin.: ”talifusö niʼadonogö ba”.
^ Mazui ”niha samazökhi bawa göli salawa”.
^ Sin.: ”lö isöndra zi sökhi”.
^ Mazui ”ba tobali famadöhö”.
^ Mazui ”fangoköli döla”.
^ Sin.: ”barö dötöʼa”.
^ Mazui ”na tebeʼe dandro ba”.
