Danieli 1:1-21
1 Me no tölu fakhe mamatörö Razo Yoyaki+ ba Yehuda, tohare Nebukanesa razo Mbabilona ba wamaʼuʼu Yeruzalema.+
2 Itehegö Yehowa Lowalangi sindruhu khö Nebukanesa ba wangoloiʼö Yoyaki razo Yehuda+ awö gama-gama si so ba gosali. Iʼohe fefu gama-gama daʼö ba nahia wamosumange* lowalanginia ba danö Zineara*+ ba ibeʼe ba naha wangiröʼö harato.+
3 Aefa daʼö, samösa zondröniaʼö ba gödo razo sotöi Asifena, ifatenge ia Razo ba wolohe ösa iraono Gizaraʼeli, tefarahu ba daʼö ngaʼötö razo hegöi ngaʼötö duhenöri.+
4 Iʼohe ndraono sagawuyu-wuyu si lö laheto, si siga-siga, sagatua-tua, sonekhe, si so faʼaboto ba dödö,+ ba si tola mamalua halöwö ba gödo razo. Ifahaʼö ira Asifena ba wanura hegöi ba li niha Galedaia.
5 Ero maʼökhö, no itatugöi Razo enaʼö labeʼe öra gö sami awö nagu si toʼölö labeʼe önia. Lafahaʼö* ira ba zi tölu fakhe, ba aefa daʼö mohalöwö ira ba gödo razo.
6 Ba gotaluara so zi otarai mado Yehuda yaʼia daʼö Danieli,*+ Hanania,* Mizaeli* ba Asaria.*+
7 Ifalalini döira* sondröniaʼö ba gödo razo. Töi Danieli yaʼia daʼö Belizasari,+ töi Hanania yaʼia daʼö Saderakhi, töi Mizaeli yaʼia daʼö Mezakhi ba töi Gasaria yaʼia daʼö Abedonego.+
8 No ifabuʼu Danieli bakha ba dödönia wa lö iʼa wöfö gö Razo ba lö ibadu nagu, börö me so zi raʼiö ba gotalua daʼö. Iʼandrö khö zondröniaʼö enaʼö lö labeʼe önia daʼö irege lö raʼiö ia.
9 Ibeʼe dödö si sökhi khö zondröniaʼö andrö Lowalangi irege iforomaʼö waʼahakhö dödö ba faʼasökhi dödö khö Danieli.+
10 Imane sondröniaʼö andrö khö Danieli, ”Ataʼudo Razo. Yaʼia zotatugöi ömi awö nibadumi. Hewisa dania na afuo ami wamaiginia moroi ba ndraono tanö böʼö si fagölö döfi khömi? Tola manö ihuku ndraʼo Razo.”
11 Hizaʼi, imane Danieli ba niha nifataro zondröniaʼö andrö sondrorogö Danieli, Hanania, Mizaeli ba Asaria,
12 ”Tema tandraigö ndraʼaga. Ba zi fulu hari, beʼe öma sayu faoma idanö.
13 Ba faedogö dania ndraʼaga ba ndraono tanö böʼö si manga föfö gö Razo. Aefa daʼö, tola ötatugöi hadia nifaluamö khöma.”
14 Fao dödönia ba itandraigö ira ba zi fulu hari.
15 Ba me no irugi fulu hari, abölö sökhi ba egesolo ira moroi ba ndraono tanö böʼö si manga föfö gö Razo.
16 Iʼotarai daʼö, lö tebulö ibeʼe öra sayu, tenga agu mazui föfö gö Razo.
17 Lowalangi sindruhu zameʼe ba dödö ndraono matua si daöfa andre enaʼö laʼila ba aboto ba dödöra ngawalö li* hegöi faʼatua-tua. Baero daʼö, tebeʼe khö Danieli wangiʼila enaʼö aboto ba dödönia ngawalö gangilata hegöi fangifi.+
18 Me no irugi inötö si no itatugöi Razo,+ iʼohe ira sondröniaʼö ba gödo razo andrö wangondrasi Nebukanesa.
19 Fahuhuo Razo khö ndra si bohou ebua andrö, ba lö hadöi si sökhi baero Danieli, Hanania, Mizaeli, ba Asaria.+ Andrö wa toröi ira ba daʼö ba tobali ira ngoni-ngoni Razo.
20 Ero na manofu Razo ba ngawalö hadia ia soʼamakhaita ba waʼatua-tua ba faʼaboto ba dödö, me wulu kali abölö baga wanema li nibeʼera moroi ba zebua elemu hegöi sanahö ngawalö zalua ba zi so miföna+ si so ba zi sagörö famatörö andrö.
21 Lö tebulö toröi ba daʼö Danieli irugi ndröfi si föföna me no mamatörö Razo Kiro.+
Nisura ba gahe zura
^ Mazui ”gosali”.
^ Eluahania Babilona.
^ Mazui te ”Larorogö”.
^ Eluahania ”Lowalangi Zanguhuku Yaʼo”.
^ Eluahania ”Yehowa Zanolo”.
^ Te eluahania ”Haniha Simane Lowalangi”.
^ Eluahania ”No Soböwö Yehowa”.
^ Eluahania ibeʼe khöra döi Mbabilona.
^ Mazui ”nisura”.
